លោកនាយករដ្ឋមន្ត្រី ហ៊ុន សែន បានថ្លែងថា នឹងទៅសួរសុខទុក្ខនិស្សិតកម្ពុជា ដែលកំពុងសិក្សានៅទីក្រុងវូហាន នៅថ្ងៃស្អែក ដើម្បីបង្ហាញពីភាពកក់ក្តៅ ខណៈជំងឺកូរ៉ូណាថ្មីកំពុងរាលដាលនៅតំបន់នោះ។
នៅលើហ្វេសប៊ុកលោក ហ៊ុន សែន នៅថ្ងៃនេះ បានសរសេរថា លោកបានរាយការណ៍ទៅថ្នាក់ដឹកនាំចិនរួចហើយថា លោកគ្រោងនឹងទៅសួរសុខទុក្ខនិស្សិតកម្ពុជា ដែលកំពុងសិក្សានៅទីក្រុងវូហាន នៅថ្ងៃទី៥ ខែកុម្ភៈនេះ ដើម្បីបង្ហាញពីភាពកក់ក្តៅ និងកុំឱ្យនិស្សិតខ្មែរនៅទីក្រុងវូហានមានការភ័យខ្លាចចំពោះការឆ្លងរីករាលដាលនៃជំងឺកូរ៉ូណាថ្មីនះ។
និស្សិតបរិញ្ញាបត្រជាន់ខ្ពស់ឆ្នាំទីបី នៅសកលវិទ្យាវ៉ូហាន ជំនាញសន្តិសុខប្រព័ន្ធអ៊ីនធឺណិត លោក គាត ប៉ូជាង មានប្រសាសន៍ថា រូបគាត់មានអារម្មណ៍រីករាយនៅពេលទទួលបានព័ត៌មានថា លោកនាយករដ្ឋមន្ត្រី ហ៊ុន សែន គ្រោងទៅសួរសុខទុក្ខនិស្សិតនៅទីក្រុងវូហាន ដែលជាតំបន់មានជំងឺកូរ៉ូណាថ្មីកើតឡើងនៅតំបន់នោះ និងមានគ្រោះថ្នាក់ខ្ពស់ផងដែរ។
និស្សិតរូបនោះបញ្ជាក់ថា បច្ចុប្បន្ននេះ នៅសកលវិទ្យាល័យដែលគាត់កំពុងស្នាក់នៅ និងរៀននៅទីក្រុងវូហាន មាននិស្សិតខ្មែរចំនួន២៣នាក់ ហើយពួកគេមានសុខភាពល្អធម្មតា ពោលមិនមានអ្នកឆ្លងជំងឺកូរ៉ូណាថ្មីនោះទេ។
គិតត្រឹមព្រឹកថ្ងៃអង្គារនេះ ចំនួនអ្នកស្លាប់ដោយសារមេរោគកូរ៉ូណា កើនដល់ ៤២៦នាក់ ចំណែកអ្នកឆ្លងមាន២០ ៦២២ ករណី។ បញ្ហាមេរោគកូរ៉ូណានេះ បានធ្វើឱ្យប្រទេសចំនួន៨ក្នុងចំណោមសមាជិកអាស៊ាន ទាំង១០(លើកលែងតែ ថៃ និងកម្ពុជា) បានផ្អាកទទួលភ្ញៀវទេសចរពីប្រទេសចិន។
កាលពីចុងខែមករា អង្គការសុខភាពពិភពលោក WHO បានប្រកាសអាសន្នជាសកលអំពីហានិភ័យនៃការរីករាលដាលរបស់មេរោគដែលមានប្រភពពីផ្សារលក់គ្រឿងសមុទ្រមួយកន្លែងក្នុងក្រុងវូហាន បន្ទាប់ពីខ្លួនមើលឃើញសន្ទុះនៃការរាតត្បាតក្នុងតំបន់ និងវិសាលភាពនៃការរីករាលដាលរបស់មេរោគ៕
