ស្ថានទូតអាមេរិកប្រចាំកម្ពុជា លើកទឹកចិត្តឱ្យអ្នករកស៊ីរបស់ខ្លួនចូលមកវិនិយោគលើវិស័យកសិកម្មនៅកម្ពុជា ដោយជឿថា វត្តមានក្រុមហ៊ុនអាមេរិកនឹងរួមចំណែកធ្វើឱ្យវិស័យនេះមានការរីកចម្រើន។
ស្ថានទូតអាមេរិកបានរៀបចំជំនួបមួយដែលមានរយៈពេល២ថ្ងៃ ចាប់ពីថ្ងៃទី៦ ដល់៧ ខែកុម្ភៈ រវាងអ្នករកស៊ីអាមេរិក និងរដ្ឋាភិបាលកម្ពុជា ដើម្បីបង្ហាញពីឱកាសនៃការធ្វើពាណិជ្ជកម្មលើវិស័យកសិកម្មនៅកម្ពុជា ដែលក្នុងនោះមានក្រុមហ៊ុនអាមេរិកចំនួន២១ក្រុមហ៊ុនបានចូលរួម។
ថ្លែងក្នុងសន្និសីទសារព័ត៌មាននៅព្រឹកថ្ងៃទី៦ ខែកុម្ភៈ ម្សិលមិញ ឯកអគ្គរដ្ឋទូតអាមេរិកប្រចាំកម្ពុជា លោក Partrick Murphy មានប្រសាសន៍ថា នេះជាឆ្នាំទី២ហើយដែលអាមេរិកបង្កើតឱ្យមានជំនួបនេះ ដោយរំពឹងថាអ្នករកស៊ីរបស់ខ្លួននឹងចាប់អារម្មណ៍ចំពោះការធ្វើពាណិជ្ជកម្មលើវិស័យកសិកម្មនៅក្នុងប្រទេសនេះ។
លោកថា៖ «ការធ្វើកសិកម្មនៅកម្ពុជាពេលបច្ចុប្បន្ននេះ គឺត្រូវការធ្វើឱ្យមានលក្ខណៈជឿនលឿន បច្ចេកទេសកាន់តែខ្ពស់ ហើយនឹងមានប្រសិទ្ធភាពកាន់តែខ្លាំង។ […] ខ្ញុំសូមបញ្ជាក់ពីរឿងពាណិជ្ជកម្មហើយនិងកសិកម្មហ្នឹង គឺថា វាជួយលុបបំបាត់ចោលនូវការខ្វែងគំនិតគ្នាមួយចំនួន ពីព្រោះក្រុមហ៊ុនអាមេរិកដែលមកធ្វើ គឺជាក្រុមហ៊ុនដែលមានបច្ចេកទេសខ្ពស់។ គេមិនពុករលួយ ដែលគេនឹងទាមទារឱ្យមានភាពស្អាតស្អំ គេទាមទារឱ្យមានតម្លាភាព និងនីតិរដ្ឋល្អ»។
ក្រុមហ៊ុនដែលធ្វើការលើវិស័យកសិកម្មអាមេរិកដែលបានមកចូលរួមក្នុងជំនួបនេះមាន២១ក្រុមហ៊ុន ក្នុងនោះក៏មានក្រុមហ៊ុនល្បីៗមួយចំនួនដូចជា ក្រុមហ៊ុនបច្ចេកវិទ្យា IBM ក្រុមហ៊ុនពាណិជ្ជកម្ម Amazon ក្រុមហ៊ុនគ្រឿងចក្រកសិកម្ម Jonh Deere និងក្រុមហ៊ុនផ្កាយរណប Planet.com ជាដើម។
តំណាងក្រុមហ៊ុន Planet.com លោក Josep ow Yong បានថ្លែងក្នុងសន្នីសិទសារព័ត៌មាននៅព្រឹកម្សិលមិញផងដែរថា ក្រុមហ៊ុនលោកជាក្រុមហ៊ុនស្រង់ទិន្នន័យសណ្ឋានដី និងឧតុនិយមតាមរយៈផ្កាយរណប ដែលអាចផ្ដល់នូវព័ត៌មានជាក់លាក់ ដើម្បីឱ្យរដ្ឋាភិបាលអាចធ្វើការវិភាគ និងប្រើប្រាស់ ដើម្បីចេញគោលនយោបាយកសិកម្មបានត្រឹមត្រូវ។ លោកសង្ឃឹមថា តាមរយៈសន្និសីទនេះ ក្រុមហ៊ុននឹងអាចមានឱកាសពិភាក្សាជាមួយរដ្ឋាភិបាលកម្ពុជា ដើម្បីជួយដល់ការងារកសិកម្មកម្ពុជានាថ្ងៃអនាគតផងដែរ។
លោក Josep លើកឡើងថា៖ «យើងមានគំនិតធ្វើការជាមួយរដ្ឋាភិបាល (កម្ពុជា) ហើយយើងនឹងពិភាក្សាគ្នាទៅមើលថា ផ្នែកខាងណាខ្លះដែលត្រូវធ្វើការជាមួយ យើងនឹងជួយ»។
រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្កិ បានថ្លែងក្នុងជំនួបនេះថា លោកស្វាគមន៍ចំពោះក្រុមហ៊ុនបរទេសទាំងអស់ដែលចង់វិនិយោគនៅក្នុងប្រទេស ដោយថា ការចូលមកវិនិយោគនឹងផ្ដល់ផលចំណេញច្រើនដល់ក្រុមហ៊ុនទាំងនោះ។
លោក ប៉ាន សូរស័ក្កិ៖ «ការតាំងចិត្តរបស់យើង រដ្ឋាភិបាលបានប្តេជ្ញាថា នឹងមិនបង្កការលំបាកដល់អ្នករកស៊ីគ្រប់វិស័យទាំងអស់។ រដ្ឋាភិបាលមានតែលើកទឹកចិត្តដើម្បីជំរុញដល់ការធ្វើកសិកម្ម និងកសិពាណិជ្ជកម្មទាំងក្នុងតំបន់សេដ្ឋកិច្ចពិសេស និងក្រៅ»។
ទោះជាយ៉ាងណា ក្នុងរបាយការណ៍ឆ្នាំ២០១៩ របស់ធនាគារពិភពលោក បានដាក់ភាពងាយស្រួលក្នុងការធ្វើពាណិជ្ជកម្មនៅកម្ពុជា មានពិន្ទុ ៥៤,៨០ លើ១០០ពិន្ទុ ខណៈក្នុងចំណោមប្រទេសទាំង១០របស់អាស៊ាន ប្រទេសកម្ពុជាជាប់លេខ៧ ដែលបង្ហាញថា ប្រទេសនេះនៅមានភាពលំបាកក្នុងការធ្វើពាណិជ្ជកម្មនៅឡើយ ។
នាយកប្រតិបត្តិនៃសភាពាណិជ្ជកម្មអាមេរិកប្រចាំកម្ពុជា លោក Erich Phillips បានឱ្យ VOD ដឹងថា រហូតមកដល់ពេលបច្ចុប្បន្ន មានក្រុមហ៊ុនអាមេរិកប្រមាណ១៥០ក្រុមហ៊ុនប៉ុណ្ណោះ ដែលបានមកធ្វើពាណិជ្ជកម្មនៅកម្ពុជា។ លោកបន្ថែមថា បញ្ហាដែលកម្ពុជាមិនអាចទាក់ទាញអ្នកវិនិយោគអាមេរិកចូលប្រទេសខ្លួនបានច្រើន គឺដោយសារខ្វះការប្រកួតប្រជែងជាមួយប្រទេសជិតខាង និងកង្វះការអនុវត្តច្បាប់។
លោក Eric៖ «កម្ពុជាត្រូវគិតពីអ្នកដើរក្នុងតំបន់ បើសិនជាអាមេរិក (អ្នកវិនិយោគ) ត្រូវបានចាប់អារម្មណ៍នៅក្នុងតំបន់ កម្ពុជាត្រូវធ្វើការប្រកួតជាមួយប្រទេសជិតខាង (ដើម្បីទាញយក)។ ហើយខ្ញុំគិតថា កម្ពុជាអាចនឹងក្លាយជាប្រទេសមានការប្រកួតប្រជែង ដែលមានភាពវិជ្ជមានគឺទាក់ទងនឹងការអនុវត្តច្បាប់។ រឿងទីមួយ គឺការអនុវត្តច្បាប់ ការអនុវត្តច្បាប់កាន់តែខ្លាំង ក្នុងប្រទេសគឺភាពល្អប្រសើរនឹងកើតមាន។ ព្រោះអ្នកវិនិយោគពីក្រៅប្រទេស គេចង់ដឹងពីភាពនឹងនររបស់ប្រទេស ដើម្បីបញ្ចៀសនូវបញ្ហាការប្រឈមនៅពេលមានរឿងអ្វីកើតឡើង។ ខ្ញុំគិតថា នៅពេលដែលប្រទេសកម្ពុជាមានតម្លាភាពកាន់តែខ្លាំង វាកាន់តែប្រសើរសម្រាប់ការទាក់ទាញអ្នកវិនិយោគ»។
យោងតាមស្ថិតិពាណិជ្ជកម្មលើវិស័យកសិកម្មកម្ពុជា-អាមេរិក ក្នុងឆ្នាំ២០១៨ កម្ពុជានាំផលិតផលកសិកម្មទៅអាមេរិកមានតម្លៃប្រមាណ១៥៧លានដុល្លារអាមេរិក ដែលក្នុងនោះភាគច្រើនជាផលិតផលឈើ ចំណីសត្វចិញ្ចឹម និងអង្ករ ខណៈអាមេរិកនាំចូលមកកម្ពុជាតម្លៃជាង ៦២លានដុល្លារ ដែលភាគច្រើនជាផលិតចំណីអាហារ និងធញ្ញជាតិសម្រាប់ផលិតស្រាបៀរ៕
