ក្រសួងរ៉ែទុកពេល៥ខែទៀតឱ្យស្ថានីយប្រេងដែលគ្មានច្បាប់ទាំងអស់ទៅចុះអាជ្ញាបណ្ណ មុនពេលខ្លួនមានចំណាត់ការផ្លូវច្បាប់លើស្ថានីយប្រេងទាំងនោះ។
អគ្គនាយកនៃអគ្គនាយកដ្ឋានប្រេងកាត លោក ជៀប សួរ មានប្រសាសន៍ប្រាប់VOD ថា ដោយសារច្បាប់ប្រេងកាតទើបតែចេញនៅខែកក្កដា ឆ្នាំ២០១៩ ដោយទុកពេល១ឆ្នាំដល់ម្ចាស់ស្ថានីយប្រេងនៅទូទាំងប្រទេសទាំងអស់ទៅចុះអាជ្ញាបណ្ណ ដូច្នេះវិធានការរបស់អគ្គនាយកដ្ឋាននៅពេលនេះគឺ មានតែចុះទៅណែនាំដល់ម្ចាស់ស្ថានីយទាំងនោះប៉ុណ្ណោះ។
លោកបន្ថែមថា ចាប់ពីថ្ងៃទី១២ ខែកក្កដា ឆ្នាំ២០២០ទៅ អគ្គនាយកដ្ឋាននឹងចាប់ផ្ដើមមានវិធានការលើស្ថានីយដែលគ្មានអាជ្ញាបណ្ណ និងគ្មានលិខិតសុវត្ថិភាពទាំងនោះហើយ។
លោកថា៖ «បើសិនជាក្រោយហ្នឹង [ថ្ងៃទី១២ កក្កដា] បើគាត់មិនទាន់មកចុះអាជ្ញាបណ្ណទេ គឺយើងនឹងចាត់វិធានការផ្លូវច្បាប់ ក្នុងហ្នឹងវាអាចមានពិន័យជាប្រាក់ជាដើម។ ដូច្នេះ ជាវិធានការយើងពីឥឡូវទៅនេះគឺមានតែវិធានការអប់រំការចុះជំរុញឱ្យគាត់យល់ពីច្បាប់ ឱ្យគាត់យល់ពីលិខិតបទដ្ឋានគតិយុត្តិ ថាគាត់ត្រូវដាក់ពាក្យស្នើសុំអីយ៉ាងម៉េចខ្លះ។ យើងនឹងខិតខំគ្រប់២៥រាជធានីខេត្ត ដែលមានមន្ទីររ៉ែ និងថាមពល យើងនឹងខិតខំធ្វើការរួមគ្នាជាមួយអាជ្ញាធរពាក់ព័ន្ធផងដែរ»។
លោក ជៀប សួរ ក៏បានទទួលស្គាល់ថា មុនពេលក្រសួងរ៉ែមិនទាន់បង្កើត បូករួមជាមួយច្បាប់ប្រេងកាតមិនទាន់ចេញនោះគឺបង្កឱ្យមានភាពស្មុគស្មាញ និងភាពចន្លោះប្រហោងច្រើនក្នុងការអនុញ្ញាតឱ្យបង្កើតស្ថានីយប្រេងនៅកម្ពុជា ទោះជាយ៉ាងណា លោកបញ្ជាក់ថា ចាប់ពីពេលនេះទៅគឺគ្មានស្ថានភាពបែបនេះកើតឡើងទៀតឡើយ។
ក្នុងសេចក្តីប្រកាសព័ត៌មានរបស់ក្រសួងរ៉ែ និងថាមពល ចេញផ្សាយនៅល្ងាចថ្ងៃពុធ ទី១២ ខែកុម្ភៈ បានបង្ហាញថា ស្ថានីយប្រេងឥន្ធនៈ និងឧស្ម័ននៅទូទាំងប្រទេសកម្ពុជា មានចំនួន៤ ០០០ស្ថានីយ ក្នុងនោះមានតែ ៧០០ស្ថានីយប៉ុណ្ណោះដែលមានទទួលលិខិតបញ្ជាក់ពីបច្ចេកទេសសុវត្ថិភាព និងវិញ្ញាបនបត្រអនុញ្ញាតឱ្យដំណើរការ។
នាយកប្រតិបត្តិសម្ព័ន្ធគណនេយ្យភាពសង្គម លោក សន ជ័យ មានប្រសាសន៍ថា ការបើកស្ថានីយប្រេង និងឧស្ម័នដោយគ្មានការអនុញ្ញាត និងលិខិតបញ្ជាក់សុវត្ថិភាព បង្កឱ្យមានការប្រឈមនឹងហានិភ័យគ្រោះថ្នាក់ បង្កឱ្យមានភាពភ័យខ្លាចដល់ពលរដ្ឋ និងភាពអនាធិបតេយ្យនៃការបើកស្ថានីយផងដែរ។
លោកយល់ថា ហេតុផលដែលបង្កឱ្យមានបញ្ហានេះកើតឡើង ដោយសារការស្នើសុំមានភាពស្មុគស្មាញ អំពើពុករលួយ និងភាពមិនច្បាស់លាស់នៃការកំណត់ស្តង់ដារក្នុងការបើកស្ថានីយជាដើម។
លោក សន ជ័យ មានប្រសាសន៍ថា៖ «យើងដឹងហើយថា ស្ថានីយមួយចំនួនគឺបានប្រើប្រាស់ឈ្មោះខ្លះដែលមានដែលជាឈ្មោះដែលមានឥទ្ធិពល ដែលជាក្រុមហ៊ុនរបស់មនុស្សដែលមានសម្ព័ន្ធភាព ឬក៏មានទំនាក់ទំនងជាមួយអ្នកមានអំណាចតែម្ដង។ អញ្ចឹងវាធ្វើឱ្យមានកើតច្រើនស្កេកស្កះ ក៏ប៉ុន្ដែបើយើងមើលក្រុមហ៊ុនមួយចំនួនគេមានស្ដង់ដារហើយ គេមានការគោរពច្បាប់បានត្រឹមត្រូវដែរ។ […] រឿងស្ថានីយប្រេងឥន្ធនៈនេះវាហាក់បីដូចជាមានភាពអនាធិបតេយ្យមួយចំនួនធំដែលបើប្រៀបធៀបជាមួយនឹងភាពស្របច្បាប់ និងភាពមិនស្របច្បាប់នេះ»។
អ្នកនាំពាក្យក្រសួងសេដ្ឋកិច្ច លោក មាស សុខសេនសាន ប្រាប់បានVODកាលពីម្សិលមិញថា ក្រុមការងារអន្តរក្រសួងកំពុងធ្វើការស្រាវជ្រាវរកម្ចាស់ស្ថានីយទាំងនោះ ដើម្បីឱ្យពួកគេអនុវត្តតាមច្បាប់ ដោយថា ការគេចវេសមិនធ្វើអាជ្ញាបណ្ណរបស់ស្ថានីយប្រេងទាំងនោះ គឺធ្វើឱ្យប៉ះពាល់ដល់ចំណូលជាតិផងដែរ។
លោកមានប្រសាសន៍ថា៖ «ប្រាកដហើយ វាមិនទាន់បាន១០០% [បង់ពន្ធបាន១០០%] ទេ ខ្ញុំអាចឆ្លើយជាគោលនយោបាយអញ្ចឹង។ ហើយសួរថាប៉ុន្មាន ខ្ញុំឆ្លើយអត់ទាន់កើតទេ យើងកំពុងលើកទឹកចិត្តឱ្យគ្រប់អ្នករកស៊ីធន់តូច ធន់មធ្យមទាំងអស់ ឱ្យគាត់មានបញ្ជីស្នាម។ ជាទូទៅដូចខ្ញុំនិយាយអញ្ចឹង យើងខិតខំធ្វើ ដើម្បីឱ្យគ្រប់គ្នាបង់ពន្ធ ទាំងអស់គ្នាត្រូវមានកាតព្វកិច្ចកាន់បញ្ជីស្នាមបង់ពន្ធ»។
ច្បាប់ស្តីពី «ការគ្រប់គ្រងប្រេងកាត និងផលិតផលប្រេងកាត» ឱ្យដឹងថា បុគ្គលណាធ្វើសកម្មភាពអាជីវកម្មប្រេងឥន្ទនៈដោយគ្មានអាជ្ញាបណ្ណអនុញ្ញាត នឹងត្រូវធ្វើការផាកពិន័យពី១លាន ដល់១០០លានរៀល ខណៈម្ចាស់ស្ថានីយដែលគ្មានវិញ្ញាបនបត្របញ្ជាក់សុវត្ថិភាព នឹងត្រូវពិន័យតាមទំហំនៃស្ថានីយរបស់ខ្លួនដែលប្រាក់ពិន័យនោះមានតម្លៃចាប់ពី៤លានរៀល ដល់១០លានរៀល។ ដោយឡែកបើនៅតែបន្តប្រព្រឹត្តទៀត ប្រាក់ពិន័យនឹងតម្លើងទ្វេដង៕
