ផ្សារលក់ទូរសព្ទដ៏ធំមួយនៅរាជធានីភ្នំពេញ ត្រូវបានម្ចាស់ផ្សារប្រកាសបិទដំណើរការនៅរយៈពេល២ខែទៀត ដើម្បីរៀបចំសាងសង់អាគារថ្មី។
ក្នុងសេចក្តីជូនដំណឹងចុះថ្ងៃទី២៣ មករា ដែលVOD ទើបទទួលបាន តំណាងម្ចាស់មជ្ឈមណ្ឌល ម៉ុងឌីយ៉ាល់ និងផ្សារឃ្លាំងរំសេវ លោកមេធាវី នូវ ណារ៉ូ និងមេធាវី ស៊ិន វ៉ាន់នី ឱ្យដឹងថា ផ្សារឃ្លាំងរំសេវដែលមានទីតាំង ស្ថិតនៅសង្កាត់ផ្សារដើមគរ ខណ្ឌទួលគោក នឹងត្រូវបិទជាស្ថាពរនៅថ្ងៃទី៣០ ខែមេសា ឆ្នាំ២០២០ ដើម្បីយកដីផ្សារទៅសាងសង់អាគារថ្មី ដោយតម្រូវឱ្យអាជីវករលក់ដូរក្នុងផ្សារទាំងអស់ទៅរកទីតាំងថ្មីដើម្បីបន្តអាជីវកម្មខ្លួន។
ក្នុងសេចក្តីជូនដំណឹងនោះបានលើកឡើងថា៖ «ក្នុងរយៈពេលបីខែ ម្ចាស់ទីតាំងពុំគិតប្រាក់ឈ្នួលតូបប្រចាំខែ និងថ្លៃប្រើប្រាស់ចរន្តអគ្គិសនីឡើយ គឺខែកុម្ភៈ ខែមីនា និងខែមេសា ឆ្នាំ២០២០»។
អាជីវករលក់ឧបករណ៍ហ្គេម នៅផ្សារឃ្លាំងរំសេវ លោក អ៊ូ វាសនា យល់ថា ការសម្រេចនេះគឺវាលឿនពេកដែលធ្វើឱ្យពួកគាត់មិនអាចរកកន្លែងថ្មីសម្រាប់បើកអាជីវកម្មទាន់។ លោក ក៏បានលើកឡើងពីក្ដីបារម្ភផងដែរថា ការសម្រេចរបស់ផ្សារនេះ នឹងធ្វើឱ្យប៉ះពាល់ដល់ការលក់ដូររបស់អាជីវករផ្សារ។
លោក វាសនា ប្រាប់ថា៖ «ធម្មតាទេ យើងនៅកន្លែងហ្នឹងមានម៉ូយចាស់ៗដែលមកទិញ ស្គាល់កន្លែង មកដល់ទិញ។ ហើយតម្លៃថ្លៃតូបហ្នឹងវាថេរល្អ ជាតម្លៃដែលយើងអាចទទួលយកបាន។ តែប្រសិនជាគេមានការផ្លាស់ប្ដូរអញ្ចឹង ទី១ការទៅកន្លែងផ្សេង អតិថិជនយើងគាត់ពិបាក បើអ្នកដឹងហើយគឺអត់អីទេ តែអ្នកដែលមិនទាន់ដឹង គាត់អាចពិបាករក ហើយកន្លែងផ្សេងក៏រកតម្លៃដូចនៅផ្សារនេះមិនបានដែរ»។
តំបន់ផ្សារឃ្លាំងរំសេវ ជាអតីតកន្លែងដាក់រថយន្តរបស់ក្រសួងសាធារណការសម័យរដ្ឋកម្ពុជា ទើបតែរហូតដល់ដើមឆ្នាំ២០០០ ត្រូវបានរដ្ឋលក់ឱ្យឯកជនដើម្បីអភិវឌ្ឍជាផ្សារ និងមជ្ឈមណ្ឌល ម៉ុងឌីយ៉ាល់។ កាលពីឆ្នាំ ២០១៩ កន្លងទៅ ផ្សារធ្លាប់បានរងអគ្គិភ័យឆាបឆេះដែលបណ្ដាលឱ្យតូបលក់ទូរសព្ទចំនួន៤០តូប និងសម្ភារក្នុងនោះត្រូវខូចខាតទាំងស្រុង ដែលអគ្គិភ័យនេះត្រូវបានសមត្ថកិច្ចអះអាងថា បណ្ដាលមកពីឆ្លងចរន្តអគ្គិសនី៕
