រដ្ឋមន្ត្រីក្រសួងមហាផ្ទៃថ្លែងថា ទោះរដ្ឋាភិបាលខិតខំកសាងពន្ធនាគារយ៉ាងណាក៏មិនគ្រប់គ្រាន់ដែរ ដោយសារការចាប់ខ្លួនអ្នកពាក់ព័ន្ធគ្រឿងញៀន មានចំនួនច្រើនក្នុង១ថ្ងៃៗ ស្របពេលដែលពន្ធនាគារមួយចំនួនពេញ និងខ្លះទៀតចង្អៀត។
ក្នុងពិធីបូកសរុបការងារក្រសួងមហាផ្ទៃនៅថ្ងៃនេះ លោក ស ខេង ថ្លែងថា បច្ចុប្បន្នកំពុងតែមានបញ្ហាកន្លែងឃុំឃាំងចង្អៀត។ លោកថា ករណីចង្អៀតណែនពេកនេះ ដោយសារករណីគ្រឿងញៀន និងការចាប់ខ្លួនមានចំនួនច្រើនរាល់ថ្ងៃ។
លោក ស ខេង៖ «សាកសង់មិនទាន់ទេ បើចាប់ករណីគ្រឿងញៀន១ថ្ងៃៗរាប់សិបយ៉ាងហ្នឹង សាងសង់វាមិនទាន់! អានេះមានវិធីដោះ ធ្វើម៉េចគឺថា កាត់ទោសហើយ លើកលែងទោសមួយចំនួនករណីគ្រឿងញៀនហ្នឹង។ វិធីហ្នឹងល្អដែរ ហើយវិធីផ្សេងៗយើងកំពុងលៃលកដែរ»។
លោកបញ្ជាក់ថា រដ្ឋាភិបាលកំពុងតែខិតខំប្រឹងប្រែងក្នុងការកសាងពន្ធនាគារបន្ថែម កុំឱ្យអ្នកជាប់ឃុំចង្អៀតពេក។
លោក ស ខេង៖ «និយាយចឹង មិនមែនបានន័យយើងមិនខំកសាងពន្ធនាគារទេ យើងខំដែរ ប៉ុន្តែ រត់វាមិនទាន់ដែរ។ កសាងមិនតិចណា ពន្ធនាគារបង្កើតទាំងមណ្ឌលផង អីផង វានៅតែមិនឈ្នះ។ ឥឡូវហ្នឹងកំពុងកសាងកន្លែងមួយទៀតហើយ កំពុងសុំថវិកាមិនទាន់បានផង»។
របាយការណ៍របស់មន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិបង្ហាញថា ក្នុងឆ្នាំ២០១៩ សមត្ថកិច្ចបង្ក្រាបគ្រឿងញៀនបាន ៩៨០៦ករណី និងបានឃាត់ខ្លួនអ្នកពាក់ព័ន្ធ ២០ ៤៨៩នាក់។
អគ្គនាយករងនៃអគ្គនាយកដ្ឋានពន្ធនាគារក្រសួងមហាផ្ទៃ លោក បេ ទាឡេង ថ្លែងថា ចាប់ពីថ្ងៃទី១ ខែមករាមក ពន្ធនាគារព្រៃស មិនទទួលដាក់អ្នកជាប់ឃុំទៀតទេ។ លោកថា ព្រោះមានស្ថានភាពចង្អៀត មានអ្នកជាប់ឃុំ ជាង១ម៉ឺននាក់។