មេធាវីការពារក្តីឱ្យលោក កឹម សុខា និងតំណាងអយ្យការ នៅក្នុងសវនាការនៅព្រឹកថ្ងៃព្រហស្បតិ៍នេះ បានបកស្រាយផ្សេងគ្នាលើខ្លឹមសារមួយចំនួននៃក្រមនីតិវិធីព្រហ្មទណ្ឌ ដែលចែងពាក់ព័ន្ធការដាក់បន្ថែមភស្តុតាងដាក់បន្ទុក។
ក្នុងដំណើរការជំនុំជម្រះក្តីលោក កឹម សុខា នៅព្រឹកនេះ តំណាងអយ្យការដាក់ភស្តុតាងថ្មីចំនួន៧បន្ថែមទៀត ដោយរួមមានវីដេអូខ្លី និងអត្ថបទចម្លងជាលាយលក្ខណ៍អក្សរ ដើម្បីឱ្យក្រុមប្រឹក្សាជំនុំជម្រះពិចារណា។ ការដាក់ភស្តុតាងនេះ តំណាងអយ្យការ លោក ផ្លង់ សុផល អះអាងថា ជាការឆ្លើយតបទៅនឹងភស្តុតាងដែលដាក់កន្លងមកដោយជនជាប់ចោទ និងមេធាវីរបស់ជនជាប់ចោទ។
ប៉ុន្តែ ក្រុមមេធាវីការពារក្តីលោក កឹម សុខា បានជំទាស់ចំពោះការដាក់ភស្តុតាងថ្មីនេះ ដោយថា ការដាក់ភស្តុតាងថ្មីបន្ថែមទៀត មិនគួរធ្វើឡើងក្នុងដំណាក់ការជំនុំជម្រះក្តីឡើយ ដោយផ្អែកទៅលើក្រមនីតិវិធីព្រហ្មទណ្ឌ មាត្រា៣២១ និងមាត្រា២៤៦ និង២៤៧។
មេធាវីការពារក្តីអតីតប្រធានគណបក្សប្រឆាំងមួយរូប លោក អាង ឧត្តម អះអាងថា តំណាងអយ្យការបានចេញដីកាសន្និដ្ឋានស្ថាពររួចហើយ ព្រមទាំងចៅក្រមស៊ើបបានចេញដីកាដំណោះស្រាយដើម្បីបញ្ជូនកូនក្តីរបស់ខ្លួនមកជំនុំជម្រះផងដែរ។ ដូច្នេះ សំណុំរឿងនេះបានបញ្ចប់ការស៊ើបអង្កេត និងមានលក្ខណៈពេញលេញរួចទៅហើយ។ លោកថា ការយកភស្តុតាងបន្ថែមទៀត នឹងប៉ះពាល់សិទ្ធិកូនក្តីរបស់ខ្លួន។
មេធាវីលោកកឹម សុខា គឺលោក អាង ឧត្តម មានប្រសាសន៍ថា៖ «បើតុលាការទទួលយកឯកសារដែលដាក់ដោយតំណាងអយ្យការនេះ វានឹងប៉ះពាល់ដល់សិទ្ធិទទួលបានការជម្រះក្តីប្រកបដោយយុត្តិធម៌របស់ជនជាប់ចោទ។ ដូច្នេះ ខ្ញុំសុំឱ្យប្រធានក្រុមប្រឹក្សាជំនុំជម្រះច្រានចោលភស្តុតាងថ្មីនៅពេលនេះ និងនៅពេលអនាគតផងដែរ»។
ក្រុមមេធាវីការពារក្តីលោក កឹម សុខា ហៅការដាក់ភស្តុតាងថ្មីបន្ថែមទៀតនោះ នាំឱ្យរឿងនេះមានវិមតិសង្ស័យ ដោយថា វិមតិសង្ស័យគឺបានជាប្រយោជន៍សម្រាប់កូនក្តីរបស់ខ្លួន ហើយលោកក៏បានស្នើឱ្យទម្លាក់បទចោទប្រកាន់លើលោក កឹម សុខា ផងដែរ។
ទោះបីជាយ៉ាងណា តំណាងអយ្យការ លោក ផ្លង់ សុផល នៅតែអះអាងពីភាពស្របច្បាប់នៃការដាក់ភស្តុតាងថ្មីរបស់លោក ដោយបញ្ជាក់ថា ការដាក់ភស្តុតាងថ្មីនេះ ដើម្បីកុំឱ្យជនជាប់ចោទរួចផុតពីការទទួលខុសត្រូវចំពោះការប្រព្រឹត្តរបស់ខ្លួន។ តំណាងអយ្យការដដែលនេះ ក៏បានស្នើឱ្យប្រធានក្រុមប្រឹក្សាពិចារណាអំពីតម្លៃនៃភស្តុតាងថ្មីនេះទៀតផង។
លោកមានប្រសាសន៍ថា៖ «តំណាងអយ្យការមិនអាចដឹងគ្រប់រឿងបាននោះទេ។ វាចាំបាច់ត្រូវមានការដាក់បញ្ចូលភស្តុតាងថ្មីបន្ថែមទៀត ដែលបានមកពីការស្រាវជ្រាវរបស់សមត្ថកិច្ច»។
ក្រមនីតិវិធីព្រហ្មទណ្ឌមាត្រា២៤៦ ស្តីពីដីកាសន្និដ្ឋានស្ថាពររបស់ព្រះរាជអាជ្ញា ដោយមាត្រានេះបញ្ជាក់ថាកាលណាចៅក្រមស៊ើបសួរយល់ឃើញថា ការស៊ើបសួរនោះត្រូវបានបញ្ចប់ ចៅក្រមស៊ើបសួរត្រូវជូនព័ត៌មាននេះទៅព្រះរាជអាជ្ញា ជនត្រូវចោទ ដើមបណ្តឹងរដ្ឋប្បវេណី និងមេធាវី។
មាត្រាដដែលនេះថា ប្រសិនបើព្រះរាជអាជ្ញាធរយល់ឃើញដូចចៅក្រមស៊ើបសួរដែរថា សំណុំរឿងនោះបញ្ចប់ ព្រះរាជអាជ្ញាត្រូវចេញដីកាសន្និដ្ឋានស្ថាពរជាលាយលក្ខណ៍អក្សរ និងមានសំអាងហេតុ។ ជាមួយគ្នានេះ ព្រះរាជអាជ្ញាអាចប្តឹងសុំចៅក្រមស៊ើបសួរសម្រេចបញ្ជូនខ្លួនជនត្រូវចោទទៅកាន់តុលាការជំនុំជម្រះ ឬលើកលែងការចោទប្រកាន់។
រីឯមាត្រា២៤៧វិញ ស្តីពីដីកាដំណោះស្រាយ។ មាត្រានេះ បញ្ជាក់ថា ចៅក្រមស៊ើបសួរត្រូវបិទការស៊ើបសួរ តាមរយៈដីកាដំណោះស្រាយនេះ។ ដីកានេះ អាចជាដីកាបញ្ជូនទៅជំនុំជម្រះ ឬលើកលែងការចោទប្រកាន់។
ក្រមនីតិវិធីព្រហ្មទណ្ឌដដែល មាត្រា៣២១ ដែលនិយាយអំពីការវាយតម្លៃលើភស្តុតាងដោយតុលាការ។ មាត្រានេះ លើកឡើងថា លើកលែងតែបទប្បបញ្ញត្តិច្បាប់ផ្ទុយពីនេះ ភស្តុតាងរឿងព្រហ្មទណ្ឌ អាចដាក់ជូនបានដោយសេរី។
មាត្រាដដែលថា តុលាការអាចថ្លឹងថ្លែងតាមចិត្ត អំពីតម្លៃភស្តុតាងដែលគេដាក់ជូនមកខ្លួនពិនិត្យដោយផ្អែកទៅលើជំនឿស្មោះត្រង់របស់ខ្លួន ហើយតុលាការសំអាងក្នុងសេចក្តីសម្រេចរបស់ខ្លួនតែទៅលើភស្តុតាងដែលមានក្នុងសំណុំរឿង ឬដែលត្រូវបានគេយកមកបង្ហាញក្នុងពេលសវនាការជំនុំជម្រះតែប៉ុណ្ណោះ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ដែលចូលតាមដានករណីនេះ មើលឃើញថា ដើម្បីបញ្ចប់ការខ្វែងគំនិតគ្នានេះ ក្រុមប្រឹក្សាចៅក្រមជំនុំជម្រះត្រូវមានអ្វីបង្ហាញឱ្យច្បាស់ មុននឹងសម្រេចថា ទទួល ឬមិនទទួលយកភស្តុតាងថ្មីបន្ថែមនេះ ដើម្បីភាគីទាំងសងខាងអស់ចិត្ត។
លោកមានប្រសាសន៍ថា៖ «ដូច្នេះ រួមទាំងសាធារណជន ដែលគេឃ្លាំមើលរឿងហ្នឹងដែរ មិនដឹងថារឿងហ្នឹងមានកម្រិតនៃការសម្រេចហ្នឹង អាចទទួលយកបានក្នុងកម្រិតណាមួយ។ បើមិនដូច្នេះទេ វាធ្វើឱ្យមានការចោទប្រកាន់ពីភាគីថា លម្អៀងទៅលើភាគីណាមួយហើយ។ អីចឹង គួរតែខាងចៅក្រមហ្នឹងរកវិធីណាសំអាងដោយផ្លូវច្បាប់រឹងមាំ ទើបធ្វើឱ្យភាគីទាំងអស់ស្ងប់ចិត្តបាន»។
ទោះបីជាយ៉ាងណា ប្រធានក្រុមប្រឹក្សាជំនុំជម្រះ កូយ សៅ នឹងអនុញ្ញាតឱ្យភាគីទាំងអស់បន្តពិភាក្សាលើបញ្ហាដាក់ភស្តុតាងបន្ថែមថ្មីនេះនៅថ្ងៃទី១១ ខែមីនា មុនពេលលោកសម្រេចថា ត្រូវទទួលយកភស្តុតាងថ្មីបន្ថែមទៀត ឬច្រានចោលបែបណានោះ។
អតីតមេដឹកនាំគណបក្សសង្គ្រោះជាតិ លោក កឹម សុខា ដែលត្រូវចាប់ខ្លួនដាក់ឃុំចាប់តាំងពីចុងឆ្នាំ២០១៧ មុននឹងដោះលែងនៅក្រៅឃុំបណ្ដោះអាសន្នកាលពីចុងឆ្នាំមុននោះ។ សំណុំរឿងនេះ ត្រូវបានសហគមន៍ជាតិ និងអន្តរជាតិ មើលឃើញថា វាជារឿងនយោបាយ។
ដំណើរការជំនុំជម្រះក្ដីសំណុំរឿង«សន្ទិដ្ឋិភាពជាមួយបរទេស ឬបទត្រូវរ៉ូវជាសម្ងាត់ជាមួយបរទេស» របស់លោក កឹម សុខា នេះ មន្ត្រីតុលាការបញ្ជាក់កាលពីខែមករាថា អាចមានរយៈពេលរហូតដល់ទៅ៣ខែ។
លោក ស៊ឹង សែនករុណា យល់ថា ប្រសិនបើដំណើរការជំនុំជម្រះដូចបច្ចុប្បន្ន សំណុំរឿងក្តីលោក កឹម សុខា នឹងមិនអាចបញ្ចប់តាមការគ្រោងទុកឡើយ។ មន្ត្រីសង្គមស៊ីវិលរូបនេះថា សំណុំរឿងនយោបាយមិនអាចដោះស្រាយបញ្ចប់តាមផ្លូវតុលាការបានទេ ប៉ុន្តែ វាអាចដោះស្រាយបញ្ចប់តាមផ្លូវនយោបាយតែប៉ុណ្ណោះ។
