លោកនាយករដ្ឋមន្ត្រី ហ៊ុន សែន ស្នើឱ្យមន្ត្រីសង្ឃ និងក្រសួងធម្មការ ពិនិត្យមើលពីការទេសនាបែបកំប្លុកកំប្លែងរបស់ព្រះសង្ឃមួយចំនួន។
ថ្លែងក្នុងពិធី ស្រោចស្រពព្រះសុគន្ធវារី ប្រគេនសម្តេចព្រះសង្ឃនាយករង៣ព្រះអង្គ ដែលព្រះមហាក្សត្រទើបត្រាស់បង្គាប់តែងតាំងនាព្រឹកថ្ងៃសុក្រនេះ នៅរាជធានីភ្នំពេញ លោក ហ៊ុន សែន មានប្រសាសន៍ថា ព្រះពុទ្ធសាសនាអាចបន្តរហូតដល់គ្រប់៥ពាន់ព្រះវស្សាបានគឺអាស្រ័យលើការជឿជាក់របស់ពុទ្ធបរិស័ទ។
លោកថា គេមិនអាចបន្ទោសពលរដ្ឋបានទេ ប៉ុន្តែ សំខាន់នៅត្រង់ថា តើព្រះពុទ្ធសាសនានៅតែអាចផ្តល់ភាពជឿជាក់ដល់ពលរដ្ឋទៀតឬអត់។
ជាមួយគ្នានេះ លោកមើលឃើញទង្វើរបស់ព្រះសង្ឃមួយចំនួនទេសនាលាយឡំការកំប្លុកបំប្លែងច្រើន ហើយលោកជំរុញមន្ត្រីសង្ឃ និងក្រសួងពាក់ព័ន្ធ ចាត់វិធានការដោះស្រាយបញ្ហានេះនៅពេលមានប្រជុំមន្ត្រីសង្ឃទូទាំងប្រទេស ប្រសិនបើសកម្មភាពនោះជារឿងប្រាសចាកពីវិន័យពុទ្ធសាសនា ។
លោកមានប្រសាសន៍បែបនេះថា៖ «ព្រះសង្ឃខ្លះក៏ទេសនាតាមរបៀបកំប្លែងអីចឹងទៅ ហើយពុទ្ធបរិស័ទ លោកយាយលោកតា ក៏ចេះតែសើចតាមអីចឹងទៅ។ អីចឹងទៅជាដណ្តើមការងាររបស់ ព្រហ្ម ម៉ាញ របស់ទៅ។ អីចឹងក៏គិតទៅដល់ពេលអនុសំវច្ចរ មន្ត្រីសង្ឃទូទាំងប្រទេសហ្នឹង ក៏គួរពិនិត្យកែលម្អកន្លែងហ្នឹង។ ក្រសួងធម្មការ ក៏ត្រូវពិនិត្យមើលតើត្រូវនឹងបែបបទព្រះពុទ្ធសាសនា ឬក៏អត់? » ។
អ្នកនាំពាក្យក្រសួងធម្មការ និងសាសនា លោក សេង សុមុនី មានប្រសាសន៍ថា កន្លងមក ខាងគណៈសង្ឃទាំងពីរគណៈបានណែនាំ ឬអប់រំវិន័យដល់ព្រះសង្ឃមួយចំនួនដែលទេសនាមានលក្ខណៈកំប្លែង ឬប្រើពាក្យពេចន៍មិនសមរម្យជាដើម។
ជាមួយគ្នានេះ ក្រសួងក៏គ្រោងនឹងចេញសេចក្តីប្រកាសមួយទៀត ក្នុងចំណោមប្រកាសចំនួន៣ ពាក់ព័ន្ធវិស័យសាសនា ដោយប្រកាសទី២នេះ ទាក់ទងនឹងការបួស ឬសឹក និងការសម្តែងធម៌ទេសនាក្នុងពុទ្ធសាសនា ដោយថា ប្រកាសទាំងនោះដើម្បីពង្រឹងដល់វិស័យសាសនា ពិសេសលើកកម្ពស់តម្លៃព្រះពុទ្ធសាសនា ដែលជាសាសនារបស់រដ្ឋតែម្តង។
លោកមានប្រសាសន៍ថា៖ «គោលបំណងរបស់ប្រកាសទាំងបីហ្នឹង គឺដើម្បីពង្រឹងការប្រតិបត្តសាសនានៅក្នុងប្រទេសកម្ពុជា ឱ្យមានសុខដុមនីយកម្ម ឱ្យមានសុខដុមរមនាក្នុងសាសនា និងដើម្បីរួមចំណែកក្នុងការអភិវឌ្ឍជាតិជាមួយរដ្ឋាភិបាល។ ដើម្បីលើកតម្កើងនូវតម្លៃសាសនា ពិសេសសាសនាព្រះពុទ្ធដែលជាសាសនារបស់រដ្ឋ»។
នាយកវិទ្យាស្ថានប្រជាធិបតេយ្យកម្ពុជា លោកបណ្ឌិត ប៉ា ច័ន្ទរឿន មានប្រសាសន៍ថា ការប្រើសិល្បៈក្នុងការទេសនាព្រះធម៌ទៅកាន់ពុទ្ធបរិស័ទ ជាសេរីភាពរបស់ព្រះសង្ឃ ប៉ុន្តែ មិនត្រូវប្រើសេរីភាពនៃសិល្បៈនេះប្រាសចាកពីសីលធម៌ ឬវិន័យពុទ្ធសាសនានោះឡើយ។
កន្លងមក លោកកត់សម្គាល់ថា មានព្រះសង្ឃមួយចំនួនពិតជាបានប្រើវេទិកាទេសនាលក្ខណៈកំប្លុកបំប្លែងច្រើន ហើយមានខ្លះទៀតប្រើប្រាស់ពាក្យពេចន៍អសុរោះច្រើន ដែលប្រាសចាកពីសមាវាចា ពិសេសមូលដ្ឋានគ្រឹះព្រះពុទ្ធសាសនាគឺ សីលប្រាំតែម្តង។
លោកមានប្រសាសន៍ថា៖ «ខ្ញុំសាទរនៅពេលលោកនាយករដ្ឋមន្ត្រីលើកចំណុចហ្នឹងឡើង ហើយខ្ញុំគាំទ្រថា ឱ្យគណៈសង្ឃហ្នឹងពិនិត្យមើលព្រះគុណម្ចាស់ខ្លះ មិនមែនទាំងអស់ទេ ដែលការទេសនារបស់លោកហ្នឹងមិនសង្រួម។ មិនមានលក្ខណៈជាសមាវាចា ប៉ុន្តែ ការដាក់ទោសទណ្ឌអីហ្នឹង គួរតែជាការអប់រំទូន្មានម្តងពីរដងអីចឹងទៅ។ បើសិនជាលោក [ព្រះសង្ឃ] មិនស្តាប់ មិនកែខ្លួនទេ សឹមចាត់វិធានការរដ្ឋបាល ឬវិធានការក្តៅ»។
លោកបណ្ឌិត ប៉ា ច័ន្ទរឿន បង្ហាញទស្សនៈថា ការអភិវឌ្ឍសង្គមមួយគឺឈរនៅលើទិដ្ឋភាពពីរជាសំខាន់គឺ ការអភិវឌ្ឍផ្នែកសេដ្ឋកិច្ច និងការអភិវឌ្ឍផ្នែកស្មារតី ហើយស្ថាប្យករផ្នែកស្មារតីនេះ រួមមានគ្រូបង្រៀន ព្រះសង្ឃជាដើម។
លោកថា ព្រះសង្ឃអាចក្លាយជាស្ថាប្យករនៃសង្គមទៅបាន លុះណាតែការបួសរបស់ព្រះអង្គគុណម្ចាស់ទាំងនោះ ជាប់ជាមួយការរៀនសូត្រច្បាស់លាស់ឱ្យមានទាំងសមត្ថភាព ទាំងសីលធម៌ កាយវាចាចិត្តត្រឹមត្រូវ ទាំងផ្លូវពុទ្ធចក្រ និងអាណាចក្រ ទើបអាចទទួលបានការគោរពពេញលេញពីពុទ្ធបរិស័ទ។
រដ្ឋលេខាធិការប្រចាំការនៃក្រសួងធម្មការ និងសាសនា លោក ប្លោក ផន អះអាងថា បច្ចុប្បន្ន វត្តអារាមនៅក្នុងប្រទសកម្ពុជាមានចំនួនជិត៥ពាន់វត្ត(២ ៩៨៥) និងមានព្រះសង្ឃជាង៧ ម៉ឺនអង្គ(៧០ ៥៥៣)៕