សមត្ថកិច្ចសម្រេចបញ្ជូននាវិក១៦នាក់នៃនាវា MT-COURAGEOUS ដែលបានល្មើសចូលដែនទឹកកម្ពុជាកាលពីចុងខែមុន ទៅតុលាការនៅព្រឹកថ្ងៃអង្គារនេះ។
អគ្គស្នងការរងនគរបាលជាតិ លោកឧត្តមសេនីយ៍ឯក តេង សួន មានប្រសាសន៍ប្រាប់VOD ថា នៅព្រឹកនេះសមត្ថកិច្ចបានបញ្ជូននាវិកនៃនាវា MT-COURAGEOUS ចំនួន១៦នាក់ ក្នុងនោះមាន១២នាក់ជាជនជាតិមីយ៉ាន់ម៉ា និង៤នាក់ជាជនជាតិឥណ្ឌូនេស៊ី ទៅតុលាការខេត្តព្រះសីហនុហើយ បន្ទាប់ពីរកឃើញថា នាវិកទាំងនោះបញ្ជាកប៉ាល់ល្មើសចូលដែនទឹកកម្ពុជាកាលពីថ្ងៃទី២៦ ខែកុម្ភៈកន្លងទៅ។
លោកឧត្តមសេនីយ៍ឯក តេង សួន៖ «យើងបានបំពេញបែបបទគ្រប់ជ្រុងជ្រោយដាក់ជូនតុលាការ ដាក់ជូនព្រះរាជអាជ្ញា ដើម្បីចោទប្រកាន់ អនុវត្តតាមនីតិវិធីច្បាប់ហើយ»។
យោងតាមគេហទំព័រ vesselfinder.com កប៉ាល់ MT-COURAGEOUS ដែលមានលេខសំគាល់ IMO 8617524 ជាប្រភេទកប៉ាល់ដឹកប្រេង បំពាក់ទង់ជាតិកាមេរ៉ូន។ កប៉ាល់នេះក៏មានឈ្មោះផ្សេងទៀតថា SEA PRIMA ដែលបំពាក់ទង់ជាតិប្រទេសនៅតំបន់សមុទ្រការ៉ាអ៊ីត St Kitts & Nevis។ ទោះជាយ៉ាងណា ក្នុងពេលដែលកប៉ាល់នេះចូលដែនទឹកកម្ពុជា កប៉ាល់នេះក៏បានបំពាក់ទង់ជាតិកម្ពុជាផងដែរ។
លោកឧត្តមសេនីយ៍ តេង សួន មានប្រសាសន៍ប្រាប់VOD ថា នាវិកកប៉ាល់នេះបានផ្ដូរទង់ជាតិជាច្រើនដែលធ្វើឱ្យសមត្ថកិច្ចមិនអាចកំណត់ថា មានសញ្ជាតិអ្វីឱ្យច្បាស់នោះទេ។
លោកថា៖ «ជាទូទៅ កប៉ាល់អន្តរជាតិទៅដល់ប្រទេសណា វាត្រូវពាក់ទង់ជាតិប្រទេសហ្នឹង នេះជាច្បាប់អន្តរជាតិ។ ទីពីរ កប៉ាល់ដែលវាល្មើសច្បាប់ វាត្រូវមានគ្រប់លក្ខណៈ ដើម្បីត្រៀមបំរុង និងក្លែងបន្លំ ដើម្បីងាយស្រួលក្នុងការល្មើស បន្លំដល់សមត្ថកិច្ចដែលធ្វើការតាមដែនសមុទ្រ»។
បើតាមលោក តេង សួន កប៉ាល់នេះក៏មានជាប់ពាក់ព័ន្ធនឹងការផ្ទេរទំនិញទៅកប៉ាល់ដឹកទំនិញរបស់ប្រទេសកូរ៉េខាងជើង ដែលល្មើសទៅនឹងសេចក្តីសម្រេចរបស់ក្រុមប្រឹក្សាសន្ដិសុខអង្គការសហប្រជាជាតិដែលបានចេញកាលពីឆ្នាំ២០១៧ ទោះជាយ៉ាងណា លោកមិនបានបញ្ជាក់លំអិតពីបញ្ហានេះនោះទេ។
សេចក្តីសម្រេចរបស់ក្រុមប្រឹក្សាសន្ដិសុខអង្គការសហប្រជាជាតិលេខ ២៣៧៥ និង២៣៩៧ ឆ្នាំ២០១៧ បានសម្រេចពីទណ្ឌកម្មទៅលើប្រទេសកូរ៉េខាងជើង ចំពោះសកម្មភាពរបស់ប្រទេសក្នុងការបន្តធ្វើតេស្តសាកល្បងអាវុធនុយក្លេអ៊ែរជាបន្តបន្ទាប់។ ទណ្ឌកម្មនោះរួមមាន ការហាមឃាត់ការនាំចូលប្រេង និងផលិតផលពាណិជ្ជកម្មទៅប្រទេសកូរ៉េខាងជើង និងហាមឃាត់ពលរដ្ឋកូរ៉េខាងជើងទៅធ្វើការនៅក្រៅប្រទេស។
អ្នកនាំពាក្យអយ្យការនៃសាលាដំបូងខេត្តព្រះសីហនុ ព្រះរាជអាជ្ញារង លោក លឹម ប៊ុនហេង មានប្រសាសន៍ប្រាប់VOD នៅរសៀលម៉ោង២នេះថា អយ្យការបានទទួលសំណុំរឿងនេះហើយ និងកំពុងទទួលចាត់ការ។
អ្នកនាំពាក្យក្រសួងការបរទេសកម្ពុជា លោក កុយ គួង បានប្រាប់VOD យ៉ាងខ្លីថា រឿងដែលកើតឡើងនេះគឺស្ថិតក្នុងចំណាត់ការច្បាប់កម្ពុជា។
លោកសរសេរថា៖ «យើងអនុវត្តច្បាប់ និងនីតិវិធីរបស់យើង»។
អ្នកតាមដានបញ្ហានយោបាយ លោក ឯម សុវណ្ណរ៉ា មានប្រសាសន៍ប្រាប់VOD ថា ការចាប់បាននាវាដែលល្មើសនឹងសេចក្តីសម្រេចរបស់ក្រុមប្រឹក្សាសន្ដិសុខអង្គការសហប្រជាជាតិនេះ នឹងអាចធ្វើឱ្យកម្ពុជាមានមុខមាត់ក្នុងការចូលរួមលើសកម្មភាពអន្តរជាតិដែលបានអនុម័តដោយអង្គការសហប្រជាជាតិនេះ។
លោក ឯម សុវណ្ណរ៉ា៖ «និយាយរួមទៅ សកម្មភាពទាំងឡាយណាដែលអន្តរជាតិបានដាក់ចេញ ហើយកម្ពុជាបានចូលរួមទប់ស្កាត់បាន ដូចជាកប៉ាល់ដែលចរាចរចូលមកក្នុងដែនទឹកកម្ពុជា ដែលកម្ពុជាចូលរួមទប់ស្កាត់ និងឃាត់បាន។ គឺវាផ្ដល់ប្រយោជន៍ច្រើនដល់កម្ពុជា ដូចជាមុខមាត់ និងការចូលរួមសកម្មភាពច្រើនរបស់កម្ពុជាក្នុងសហគមន៍អន្តរជាតិ ក្នុងការចូលរួមទប់ស្កាត់នូវសកម្មភាពខុសច្បាប់ ឬក៏ការហាមប្រាមរបស់ក្រុមប្រឹក្សាសន្ដិសុខអង្គការសហប្រជាជាតិ ក្នុងការចរាចរ ឬក៏ដឹកទំនិញទៅតំបន់ហាមឃាត់ដូចជាកូរ៉េខាងជើងជាដើម»។
ក្នុងសេចក្ដីប្រកាសព័ត៌មានចុះថ្ងៃទី១ ខែមីនា អគ្គស្នងការនគរបាលជាតិនៃក្រសួងមហាផ្ទៃ បានឱ្យដឹងថា កប៉ាល់ MT-COURAGEOUS នេះមានផ្ទុកនាវិកចំនួន១៦នាក់ និងបានចាកចេញពីកំពង់ផៃ KAO HSIUNG នៃកោះតៃវ៉ាន់កាលពីថ្ងៃទី១៥ ខែកុម្ភៈកន្លងទៅ និងបានបោះយុថ្កាបំពានដែនទឹកកម្ពុជាកាលពីថ្ងៃទី២៦ ខែកុម្ភៈ។
បើតាមសេចក្តីប្រកាសនោះ នាវានេះធ្លាប់ធ្វើការផ្ទេរទំនិញពីនាវាទៅនាវា ឬទៅទូកដឹកទំនិញរបស់កូរ៉េខាងជើង ដែលត្រូវបានចាត់ទុកជាសកម្មភាពបំពានទៅនឹងសេចក្តីសម្រេចរបស់ក្រុមប្រឹក្សាសន្ដិសុខអង្គការសហប្រជាជាតិដែលបានអនុម័តកាលពីឆ្នាំ២០១៧៕
