សាលាដំបូងរាជធានីភ្នំពេញសម្រេចឃុំខ្លួនបុគ្គល៣នាក់ ដោយគេដឹងថា ជាបក្ខពួកអតីតអភិបាលខេត្តឧត្តរមានជ័យ និងបច្ចុប្បន្នជាអនុរដ្ឋលេខាធិការក្រសួងការពារជាតិ លោក ស ថាវី ដោយចោទថា ជាប់ពាក់ព័ន្ធករណីលួចលក់ដីអ្នកដទៃនៅក្នុងខណ្ឌព្រែកព្នៅ រាជធានីភ្នំពេញ។
ការសម្រេចឃុំខ្លួនជាបណ្តោះអាសន្ននេះ ក្រោយពេលតុលាការចោទប្រកាន់ពួកគេទាំង៣នាក់ រួមនឹងអតីតអភិបាលខេត្តឧត្តរមានជ័យ ពីបទផ្តើមគំនិតក្នុងអំពើលួចលក់ដីដែលមិនមែនជារបស់ខ្លួនទំហំជាង២ម៉ឺនម៉ែត្រការ៉េ (២២៩០០) នៅខណ្ឌព្រែកព្នៅ រាជធានីភ្នំពេញ។
ក្នុងដីកាបីដាច់ដោយឡែកពីគ្នារបស់ចៅក្រមស៊ើបសួរ លោក ពេជ្រ វិជ្ជាធរ កាលពីថ្ងៃម្សិលមិញ ដែលចេញផ្សាយនៅថ្ងៃនេះ បានបង្គាប់ឱ្យឃុំខ្លួនមនុស្សបីនាក់ជាបណ្តោះអាសន្ននៅពន្ធនាគារក្រុងភ្នំពេញ ឬ PJ។
ដីកាបីដដែលឱ្យដឹងថា បុគ្គលទាំងបីនាក់នោះ រួមមានឈ្មោះ ឡុង ដារ៉ា ហៅ ណាង ភេទប្រុសមានមុខរបរជាអ្នកគួកជេរដី។ ទី២ ឈ្មោះ ឡូញ រស់ ភេទប្រុសមុខរបរប្រជាការពារភូមិឌួង រាជធានីភ្នំពេញ និងម្នាក់ទៀតឈ្មោះ ប៉ូច ថេន មុខរបរកសិករ។
ប្រភពដដែលឱ្យដឹងថា ពួកគេទាំង៣នាក់ ត្រូវបានដាក់ស្ថិតក្រោមការត្រួតពិនិត្យ បន្ទាប់ពីព្រះរាជអាជ្ញារងក្រុងភ្នំពេញ លោក សាយ ណូរ៉ា កាលពីថ្ងៃចន្ទម្សិលមិញ សម្រេចចោទប្រកាន់ពីបទ លួចលក់អចលនវត្ថុដែលមិនមែនជារបស់ខ្លួន ប្រព្រឹត្តទៅកាលពីខែកញ្ញា ឆ្នាំ២០១៨។
ដីកាបង្កាប់ឱ្យឃុំខ្លួនទាំងនោះសរសេរចំណុចដូចគ្នាថា៖ «ជននេះ ត្រូវដាក់ឱ្យស្ថិតក្រោមការពិនិត្យពីបទ លួចលក់អចលនវត្ថុដែលមិនមែនជារបស់ខ្លួន ប្រព្រឹត្តទៅនៅភូមិសំរោងត្បូង សង្កាត់សំរោង ខណ្ឌព្រែកព្នៅ រាជធានីភ្នំពេញ កាលពីថ្ងៃទី១៧ កញ្ញា ឆ្នាំ២០១៨។ បទល្មើសព្រហ្មទណ្ឌដែលមានចែង និងផ្តន្ទាទោសតាមបញ្ញត្តិមាត្រា ២៥៥ នៃច្បាប់ភូមិបាល»។
វី.អូ.ឌី បានព្យាយាមទាក់ទងទៅអ្នកនាំពាក្យក្រសួងការពារជាតិ លោក ឈុំ សុជាតិ និងអ្នកនាំពាក្យអយ្យការអមសាលាដំបូងរាជធានីភ្នំពេញ លោក អ៊ី រិន្ទ ជាច្រើនសារ តែគ្មានការឆ្លើយតបឡើយចំពោះបញ្ហានេះ។ ដោយឡែកលេខទូរសព្ទរបស់លោក ស ថាវី ដែលធ្លាប់ប្រើរាល់ដង ក៏ត្រូវបានអ្នកទទួលប្រាប់ថា មិនមែនជាលេខរបស់លោកទៀតនោះដែរ។
យ៉ាងនេះក្តី ភ្នាក់ងារសារព័ត៌មានស្និទ្ធនឹងរដ្ឋាភិបាល Fresh News អះអាងថា ព្រះរាជអាជ្ញារងអមសាលាដំបូងរាជធានីភ្នំពេញ លោក សាយ ណូរ៉ា កាលពីថ្ងៃចន្ទម្សិលមិញ ក្រៅពីចោទប្រកាន់អ្នកទាំង៣នាក់ខាងលើ ព្រះរាជអាជ្ញារងរូបនេះក៏បានសម្រេចចោទប្រកាន់អតីតអភិបាលខេត្តឧត្តរមានជ័យ និងជាអនុរដ្ឋលេខាធិការក្រសួងការពារជាតិបច្ចុប្បន្ន លោក ស ថាវី ពីបទ ផ្តើមគំនិតក្នុងអំពើលួចលក់អចលនវត្ថុដែលមិនមែនជារបស់ខ្លួន។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ កត់សម្គាល់ថា កន្លងមក តែងមានសេចក្តីរាយការណ៍ ឬការលើកឡើងពីភាពមិនប្រក្រតីរបស់មន្ត្រីជាន់ខ្ពស់រដ្ឋាភិបាលមួយចំនួន ដែលប្រើប្រាស់អំណាចដោយរំលោភបំពាន ការប្រព្រឹត្តអំពើពុករលួយ ឬការប្រើដើម្បីប្រយោជន៍ខ្លួន និងបក្ខពួកជាដើម។
លោកបន្តថា ប្រសិនបើមានសញ្ញានៃភាពមិនប្រក្រតីរបស់មន្ត្រីជាន់ខ្ពស់រដ្ឋាភិបាលក្នុងការប្រើប្រាស់អំណាចរបស់ខ្លួន ស្ថាប័នមានសមត្ថកិច្ចគប្បីមានការស៊ើបអង្កេតតាំងពីយូរ មិនគួរអូសបន្លាយបែបនេះទេ។
លោកមានប្រសាសន៍ថា៖ «វាមិនគួរអូសបន្លាយបែបនេះ វាគួរតែមានការចាត់វិធានការផ្លូវច្បាប់យូរមកហើយ។ បើសិនជាមានតម្រុយភាពមិនប្រក្រតី ឬការរំលោភអំណាចច្បាប់បែបនេះ។ អាជ្ញាធររដ្ឋាភិបាលហ្នឹងគួរតែមានការចាត់វិធានការឱ្យបានឆាប់រហ័ស ដើម្បីចៀសវាងកុំឱ្យមានជនរងគ្រោះដោយអំពើល្មើសច្បាប់ទាំងអស់នេះ»។
លោក ស ថាវី ត្រូវបានព្រះមហាក្សត្រចេញព្រះរាជក្រឹត្យកាលពីថ្ងៃទី១៤ ខែវិច្ឆិកា ឆ្នាំ២០១៨ បញ្ចប់មុខតំណែងជាអភិបាលខេត្តឧត្តរមានជ័យ ដោយត្រាស់បង្គាប់តែងតាំងលោក ប៉ែន កុសល្យ ជាអភិបាលខេត្តឧត្តរមានជ័យ ជំនួសវិញ។ អតីតអភិបាលខេត្តឧត្តរមានជ័យរូបនេះ ត្រូវប្តូរមកបម្រើការងារនៅទីស្តីការក្រសួងមហាផ្ទៃ ទទួលតំណែងជាអនុរដ្ឋលេខាធិការក្រសួងមហាផ្ទៃ។
លុះនៅចុងឆ្នាំ២០១៩ លោក ស ថាវី ត្រូវបានព្រះមហាក្សត្រ ចេញព្រះរាជក្រឹត្យមួយសម្រេចផ្ទេរតំណែងពីអនុរដ្ឋលេខាធិការក្រសួងមហាផ្ទៃ មកជាអនុរដ្ឋលេខាធិការក្រសួងការពារជាតិវិញ៕
