រដ្ឋាភិបាលកំពុងរៀបចំលេខកូដប្រតិបត្តិការខ្លី ដើម្បីផ្ដល់លទ្ធភាពដល់ពលរដ្ឋអាចផ្ដាច់គម្រោង និងសេវាកម្មបន្ថែមរបស់ក្រុមទូរសព្ទចល័ត ដែលកាត់លុយទូរសព្ទពលរដ្ឋដោយមិនដឹងខ្លួន។
ក្នុងសេចក្តីប្រកាសព័ត៌មាននាថ្ងៃទី៥ ខែមីនា ឆ្នាំ២០២០ និយ័តករទូរគមនាគមន៍កម្ពុជា បានឱ្យដឹងថា ដើម្បីបញ្ចប់នូវបញ្ហាកាត់លុយ ឬការភ្ជាប់សេវាផ្សេងៗដោយមិនដឹងខ្លួនរបស់ពលរដ្ឋដែលប្រើប្រាស់សេវាទូរសព្ទ និយ័តករកំពុងពិចារណានឹងស្នើឱ្យមានការប្រើរួមគ្នាគ្រប់ប្រតិបត្តិករនូវលេខកូដខ្លី ដើម្បីឱ្យលទ្ធភាពដល់អតិថិជនអាចផ្ដាច់រាល់គម្រោង និងសេវាកម្មបន្ថែមនានាដែលខ្លួនបានភ្ជាប់។
ក្នុងសេចក្តីប្រកាសនោះលើកឡើងថា៖ «មានន័យថា បើអ្នកប្រើប្រាស់មិនច្បាស់ថា ពួកគាត់កំពុងភ្ជាប់សេវាកម្មមួយណា។ ពួកគាត់អាចផ្ដាច់រាល់សេវាកម្មទាំងអស់ដោយប្រើលេខកូដ ១២០០ ហើយវាប្រៀបដូចជា reset ឱ្យស៊ីមដែលកំពុងដំណើរការ វិលមករកសភាពដើមបំផុត ដូចកាលជាវដំបូង»។
សមាជិកនិយ័តករទូរគមនាគមន៍កម្ពុជា លោក ជា ច័ន្ទតារ៉ា មានប្រសាសន៍ក្នុងសន្និសីទសារព័ត៌មាននៅព្រឹកនេះថា ការរៀបចំលេខពិសេសសម្រាប់ផ្ដាច់នេះ គឺកំពុងស្ថិតក្នុងដំណាក់កាល ពិភាក្សាជាមួយក្រុមហ៊ុនទូរសព្ទនៅឡើយ ដោយថា និយ័តករនឹងជូនដំណឹងបន្ថែមទៀតនៅពេលលេខនេះត្រូវបានក្រុមហ៊ុនទាំងអស់សម្រេចទទួលយកទៅប្រើប្រាស់។
លោក ជា ច័ន្ទតារ៉ា មានប្រសាសន៍ថា៖ «លេខ១២០០នេះ គឺស្ថិតក្នុងដំណាក់ដែល TRC (និយ័តករ) ស្នើសុំឱ្យប្រតិបត្តិករទាំងអស់ពិចារណា ដើម្បីឱ្យអតិថិជន unsubscribe (ឈប់ជាវ) តែម្ដង គឺយើងប្រើលេខ១២០០នេះផ្ដាច់មកជា Normal plan (គម្រោងធម្មតា)វិញ។ អ៊ីចឹង រាល់សេវាកម្មអីគឺនឹងផ្ដាច់ដែលយើងអាចនឹង Subcribe (ជាវ) ឡើងវិញ។ តែលេខកូដទាំងអស់នេះគឺស្ថិតក្នុងលក្ខខណ្ឌក្នុងការពិភាក្សាបច្ចេកទេសជាមួយ Operator (ប្រតិបត្តិករ) បន្តទៀត។ អ៊ីចឹង ចំពោះសំណួរសួរថា នឹងចាប់ផ្ដើមនៅពេលណា និយ័តករទូរគមនាគមន៍នឹងជូនដំណឹងបន្ទាប់ទៀត»។
ប្រជាពលរដ្ឋរស់នៅរាជធានីភ្នំពេញ លោក មីឌី បានថ្លែងក្នុងសន្និសីទ្នសារព័ត៌មាននៅព្រឹកនេះ ដោយគាំទ្រចំពោះការដាក់លេខដើម្បីផ្ដាច់នេះ តែលោកសំណូមពរដល់ក្រុមហ៊ុនទូរសព្ទទាំងអស់គួរបញ្ឈប់ការភ្ជាប់ដោយស្វ័យប្រវត្តិនូវសេវាកម្មរបស់ខ្លួនទៅឱ្យអតិថិជន ដោយថា ការភ្ជាប់ដោយស្វ័យប្រវត្តិនេះគឺជាកិច្ចព្រមព្រៀងដែលមិនស្មើភាពរបស់ក្រុមហ៊ុន។
លោកមានប្រសាសន៍ថា៖ «ហេតុអីបានត្រូវកាត់ស្វ័យប្រវត្តិរហូតអ៊ីចឹង? គួរតែពេលគេមិនប្រើ សូមកុំកាត់គេ។ អាហ្នឹង គេហៅថា កិច្ចសន្យានៃកិច្ចព្រមព្រៀងដែលមិនស្មើភាពហើយ គេអត់ប្រើផង អ្នកឯងកាត់ស្វ័យប្រវត្តិរហូត»។
មិនមានការឆ្លើយតបជាវិជ្ជមានណានៅឡើយទេ ដោយតំណាងក្រុមហ៊ុនដែលមានវត្តមាននៅក្នុងសន្និសីទនៅព្រឹកនេះ នៅតែជំរុញដល់ពលរដ្ឋដែលមានបញ្ហាជាមួយសេវាកម្មទូរសព្ទរបស់ខ្លួន ធ្វើការទំនាក់ទំនងទៅសេវាបម្រើអតិថិជនរបស់ខ្លួននៅពេលមានការសង្ស័យពីការកាត់លុយទូរសព្ទខុសធម្មតាប៉ុណ្ណោះ។
តំណាងក្រុមហ៊ុន Cellcard លោក លឹម សុខសុផៃ លើកឡើងដោយជំរុញដល់អតិថិជនធ្វើការទំនាក់ទំនងទៅសេវាបម្រើទូរសព្ទរបស់ខ្លួន ដើម្បីឱ្យក្រុមហ៊ុនអាចដោះស្រាយបញ្ហាដែលអតិថិជនជួបប្រទះបាន។
លោក លឹម សុខសុផៃ៖ «តែខ្ញុំគ្រាន់តែចង់បញ្ជាក់ពីលើហ្នឹងទៀតថា រាល់សេវាកម្មហ្នឹង ប្រសិនជាយើងចេះប្រើប្រាស់ឱ្យបានត្រឹមត្រូវ គឺយើងអាចការពារបាន។ ឧទាហរណ៍ ដូចសេវាអ៊ិនធឺណិតអ៊ីចឹង យើងមានទាំងរបៀបភ្ជាប់ និងរបៀបកុំឱ្យវា auto (ស្វ័យប្រវត្តិ) ផងដែរ។ អ៊ីចឹង ខ្ញុំសុំឱ្យបងទំនាក់ទំនងទៅមន្ត្រីសេវាខាងខ្ញុំ ដើម្បីឱ្យយើងខ្ញុំអាចដោះស្រាយជួយបាន»។
តំណាងក្រុមហ៊ុន Smart លោក យូសុះ សារី ថាក្រុមហ៊ុនមានកម្មវិធីទូរសព្ទដែលអាចឱ្យអតិថិជនចូលឆែកពីការប្រើប្រាស់គម្រោងរបស់ខ្លួន និងផ្ដាច់ផងដែរ។
លោក យូសុះ សារី៖ «យើងមាន Platform ច្រើនដូចជា Application (កម្មវិធីទូរស័ព្ទ) ដែលអតិថិជនយើងគាត់បានប្រើប្រាស់ច្រើន អ៊ីចឹងកម្មវិធីទូរសព្ទហ្នឹងគឺអត្ថប្រយោជន៍វា អតិថិជនគាត់អាចពិនិត្យមើលជារួមទៅលើការប្រើប្រាស់របស់គាត់ៗ ភ្ជាប់សេវាអ្វីខ្លះ ហើយរបៀបនៃការផ្ដាច់ និងភ្ជាប់ទាំងអស់គឺមាននៅក្នុងហ្នឹង»។
យោងតាមរបាយការណ៍របស់និយ័តករទូរគមនាគមន៍គិតត្រឹមខែមករា ឆ្នាំ២០២០ ក្រុមហ៊ុនទូរសព្ទទាំងចល័ត និងខ្សែនៅកម្ពុជា មាន១២ក្រុមហ៊ុន ដែលមានអ្នកជាវសេវាទូរសព្ទចល័តជាង២១លាននាក់ និងសេវាអ៊ិនធឺណិតចល័តមានជិត១៦លាននាក់ របាយការណ៍នោះក៏បានរកឃើញផងដែរថា ក្នុង១ខែ ពលរដ្ឋកម្ពុជាម្នាក់ប្រើប្រាស់សេវាទូរសព្ទចន្លោះពី១០ ទៅ២០GB ខណៈពលរដ្ឋប្រទេសជិតខាងប្រើប្រាស់ត្រឹមតែ ៥ទៅ៧GBប៉ុណ្ណោះ៕
