ប្រមុខរដ្ឋាភិបាល អះអាងថា ដើម្បីឆ្លើយតបទៅនឹងបញ្ហាប្រឈមរបស់ស្ត្រី និងក្មេងស្រី កន្លងមក រដ្ឋាភិបាលមានយន្តការច្បាប់ ផែនការសកម្មភាពជាតិ គោលនយោបាយជាតិ ព្រមទាំងមានការផ្តល់សេវាជួយដល់ស្ត្រី និងក្មេងស្រីរងគ្រោះទៀតផង។
ថ្លែងក្នុងទិវាអន្តរជាតិនារី ៨មីនា លើកទី១០៩ នៅថ្ងៃសុក្រនេះ លោកនាយករដ្ឋមន្ត្រី ហ៊ុន សែន បានដាក់ចេញនូវចំណុចសំខាន់ៗមួយចំនួន ដើម្បីលើកកម្ពស់សមភាពយេនឌ័រ ព្រមទាំងទប់ស្កាត់រាល់ទម្រង់អំពើហិង្សាលើស្ត្រី និងក្មេងស្រីឱ្យមានប្រសិទ្ធភាព។
ចំណុចទាំងនោះ លោកថាមានដូចជា ជំរុញឱ្យក្រសួងអប់រំត្រូវណែនាំដល់គ្រប់គ្រឹះស្ថានទាំងអស់ឱ្យពង្រឹងវិន័យ ហើយមានទំនាក់ទំនងជាមួយឪពុកម្តាយ ឬអាណាព្យាបាលសិស្សគ្រប់រូបជាប្រចាំ ដោយណែនាំពួកគេយកចិត្តទុកដាក់អប់រំកូនចៅឱ្យខំរៀនសូត្រ មានសីលធម៌ល្អ និងត្រូវប្រកាន់យកវប្បធម៌អហិង្សាក្នុងគ្រួសារ និងក្នុងសង្គមជាតិ។
បន្ថែមពីនេះ លោកជំរុញឱ្យគ្រប់ភាគីពាក់ព័ន្ធទាំងឯកជន រដ្ឋ និងអង្គការសង្គមស៊ីវិល សហការគ្នាប្រើប្រាស់នូវទិន្នន័យរដ្ឋបាលមូលដ្ឋានលើកិច្ចអន្តរាគមន៍ជួយស្ត្រី និងក្មេងស្រីរងគ្រោះ ក្នុងគោលដៅបង្កើនប្រសិទ្ធភាពដោះស្រាយបញ្ហានេះ។
លោកមានប្រសាសន៍ថា៖ «ត្រូវរួមគ្នាទប់ស្កាត់ និងអន្តរាគមន៍ឱ្យបានទាន់ពេលវេលា និងគ្រប់ទិដ្ឋភាពនៃអំពើហិង្សាដែលទាក់ទងនឹងបញ្ហាយេនឌ័រ ជាពិសេសការប្រើប្រាស់ប្រព័ន្ធអ៊ិនធឺណិត ពាក់ព័ន្ធនឹងការជួញដូរផ្លូវភេទ។ ត្រូវពង្រីកការបង្កើតក្រុមការងារពហុវិស័យ ឆ្លើយតបនឹងអំពើហិង្សា ទាក់ទងនឹងយេនឌ័រ ឱ្យបាននូវគ្រប់រាជធានី ខេត្តទាំងអស់ »។
លោកនាយករដ្ឋមន្ត្រី អះអាងថា រដ្ឋាភិបាលបានបង្កើនកញ្ចប់ថវិកាដល់ក្រុមប្រឹក្សាជាតិកម្ពុជាដើម្បីស្ត្រី ក្នុងមួយឆ្នាំ ៥០០លានរៀល ព្រមទាំងមានក្រុមមេធាវីរបស់លោកផ្ទាល់ ដើម្បីជួយដល់ស្ត្រី និងក្មេងស្រី ក្នុងការស្វែងរកសេវាយុត្តិធម៌ផងដែរ។
នាយិការអង្គការក្លាហាន កញ្ញា បុណ្យ រចនា មានប្រសាសន៍ថា យន្តការ និងគោលនយោបាយរបស់រដ្ឋមានច្រើន ប៉ុន្តែ ខាងអង្គការសង្គមស៊ីវិលនៅព្រួយបារម្ភចំពោះការអនុវត្តជាក់ស្តែង ត្បិតថវិការបស់រដ្ឋសម្រាប់អនុវត្តផែនការទាំងនោះនៅមានកម្រិត។ លើសពីនេះ កញ្ញាថា ការអនុវត្តច្បាប់នៅមានភាពធូររលុង និងមានស្តង់ដារច្រើន ដែលធ្វើឱ្យជនល្មើសមួយចំនួនមិនទាន់ត្រូវបានចាប់ខ្លួនយកមកផ្តន្ទាទោសនៅឡើយ។
កញ្ញាបន្តថា៖ «ការអនុវត្តច្បាប់នៅមានភាពធូររលុង ហើយមានស្តង់ដារពីរបីអីចឹង ដោយសារនៅមានករណីអំពើរំលោភសេពសន្ថវៈជាច្រើន គឺមិនត្រូវបានដោះស្រាយ ឬជនប្រព្រឹត្តហ្នឹងនៅមិនទាន់ត្រូវបាននាំយកមកផ្តន្ទាទោសតាមច្បាប់នៅឡើយទេ»។
ស្រដៀងគ្នានេះ នាយករងអង្គការការពារសិទ្ធិមនុស្សលីកាដូ (Licadho) លោក អំ សំអាត កត់សម្គាល់ថា មានកត្តាមួយចំនួនបណ្តាលឱ្យស្ត្រី និងក្មេងស្រី ក្លាយជាជនរងគ្រោះ ដោយអំពើហិង្សា ឬការរំលោភបំពាននានា ទាំងក្នុងគ្រួសារ និងក្នុងសង្គម ដូចជាកត្តាគ្រឿងញៀន គ្រឿងស្រវឹង ហើយការអនុវត្តច្បាប់ក៏មានភាពធូររលុងផងដែរ។
មន្ត្រីសង្គមស៊ីវិលរូបនេះថា ដើម្បីបណ្តុះសីលធម៌ ការប្រកាន់យកធម៌អហិង្សាក្នុងសង្គមឱ្យបានប្រសើរ គប្បីផ្តើមចេញពីថ្នាក់ដឹកនាំប្រទេសមុនគេ បន្ទាប់មកមន្ត្រីរាជការ គ្រូបង្រៀន ថ្នាក់ដឹកនាំក្នុងសហគមន៍ និងថ្នាក់ដឹកនាំក្នុងគ្រួសារ ដោយផ្តល់ភាពជាគម្រូគេ ចៀសវាងការប្រើប្រាស់ទម្រង់ហិង្សាទាំងកាយ និងវាចាចិត្ត។
លោកមានប្រសាសន៍ថា៖ «ទីមួយ ខ្ញុំគិតថា ការអប់រំ និងការផ្សព្វផ្សាយ ដើម្បីឱ្យប្រជាពលរដ្ឋបានយល់ដឹង នូវរាល់ទង្វើហិង្សា ការទប់ស្កាត់នូវអំពើហិង្សា ឬការបៀតបៀន រំលោភសេពសន្ថវៈអី កើតឡើងជាដើមហ្នឹងគឺជាតួនាទីសំខាន់ណាស់ ជាពិសេសរដ្ឋាភិបាល រួមទាំងសង្គមស៊ីវិល ហើយនិងពលរដ្ឋទាំងអស់គ្នាផងដែរ ត្រូវតែយល់ដឹងអំពីបញ្ហាទាំងអស់នេះ» ។
របាយការណ៍របស់អង្គការលីកាដូសម្រាប់១៤ខេត្ត-រាជធានី ដែលអង្គការនេះបានឃ្លាំមើលបង្ហាញថា នៅឆ្នាំ២០១៩ ករណីអំពើហិង្សាក្នុងគ្រួសារលើស្រ្តី មានចំនួន៦៣ករណី ហើយករណីរំលោភសេពសន្ថវៈលើស្រ្តី និងកុមារី មានចំនួនជាង១រយករណី និងមានរំលោភបូក ៣ករណី (ក្នុងនោះ មានស្ត្រី ២៣ករណី និងកុមារី ១០៥ករណី)។ ករណីរំលោភសេពសន្ថវៈ និងអំពើហិង្សាលើស្ត្រី និងកុមារី បានបណ្តាលឱ្យជនរងគ្រោះស្លាប់ ១២នាក់ ក្នុងនោះមានស្រ្តី ៧នាក់ និងកុមារី ៥នាក់៕
