លោកនាយករដ្ឋមន្ត្រី ហ៊ុន សែន ជំរុញដល់ពលរដ្ឋទុកចិត្តលើរដ្ឋាភិបាលខ្លួនឯង កុំភ័យខ្លាចតាមការបំភ័យដោយព័ត៌មានមិនពិត ខណៈលោកស្នើដល់អ្នកលក់កុំឱ្យតម្លើងថ្លៃទំនិញនៅលើទីផ្សារផងដែរ។
ថ្លែងក្នុងពិធីសម្ពោធឱ្យប្រើប្រាស់ផ្លូវជាតិលេខ៥៥ តភ្ជាប់ពីផ្លូវជាតិលេខ៥ នៅខេត្តពោធិ៍សាត់ នៅព្រឹកនេះលោក ហ៊ុន សែន បានថ្លែងថា នៅពេលដែលរដ្ឋបង្ហាញនូវតម្លាភាពនៃព័ត៌មានទាក់ទងនឹងជំងឺកូរ៉ូណាក្នុងប្រទេស បែរជាធ្វើឱ្យពលរដ្ឋមានការជ្រួលជ្រើមភ័យខ្លាចនាំគ្នាទៅទិញស្បៀងទុកនៅផ្ទះរៀងខ្លួន ដែលលោកថា ជាជំងឺភ័យខ្លាចហួសហេតុ។
លោកថា៖ «ឥឡូវដល់និយាយមិនស្ដាប់ មានតែរុញទូកបណ្ដោយទឹកបណ្ដោយទៅ វាធូរផ្លូវដែរ! និយាយចឹងហ្មងទៅ វាស្រួលស្ដាប់។ កាន់តែសំណូមពរ [កុំឱ្យភ័យ] កាន់តែភ័យខ្លាច។ ឥឡូវខ្ញុំគោរពសិទ្ធិអ្នកភ័យ ទិញអីទិញទៅ តែកុំឱ្យអ្នកលក់តម្លៃថ្លៃបានហើយ»។
លោកជំរុញដល់ពលរដ្ឋឱ្យទុកចិត្តលើរដ្ឋាភិបាល ដោយថា បើសិនជាមានជំងឺមែន ប្រទេសវៀតណាម និងថៃ ឬក៏សឹង្ហបុរី ក៏មិនទទួលយកទៅព្យាបាលដែរ។
លោកថា៖ «បើយើងភ័យខ្លាច យើងរត់ទៅរកវៀតណាម តើគេឱ្យយើងទៅទេ? ត្រូវមានជំនឿទុកចិត្តលើខ្លួនឯង ប្រាប់ថា អញអត់ឈឺ អាណាចង់ផុសបំផុសអី ឱ្យវាបំផុសទៅ។ តែបើមានការសង្ស័យ ត្រូវរត់រកពេទ្យ! ដើម្បីសង្គ្រោះខ្លួនឯង»។
ទាក់ទងនឹងការភ័យខ្លាចនេះ លោក ហ៊ុន សែន ថាលោកក៏នឹងទៅខេត្តសៀមរាបដើម្បីបំបាត់អារម្មណ៍ភ័យខ្លាចនេះផងដែរ។
ក្រោយពីក្រសួងសុខាភិបាលកម្ពុជាប្រកាសថា ខ្លួនបានរកឃើញអ្នកជំងឺ Covid-19 ម្នាក់នៅខេត្តសៀមរាប បានធ្វើឱ្យពលរដ្ឋមួយចំនួនមានការជ្រួលច្របល់ រកទិញម៉ាស់ និងអង្ករទុកនៅផ្ទះរៀងខ្លួន ដោយបារម្ភពីការចេញដើរនៅតាមទីសាធារណៈ បើទោះបីរដ្ឋាភិបាលប្រកាសពីសមត្ថកិច្ចរបស់ខ្លួនក្នុងការការពារក៏ដោយ។
កាលពីម្សិលមិញ ក្រសួងពាណិជ្ជកម្មក៏បានអំពាវនាវដល់ពលរដ្ឋកុំឱ្យបារម្ភពីការខ្វះខាតអង្ករដោយសារព័ត៌មាននៃការរីករាលដាលជំងឺឆ្លងកូវីដ-១៩ (COVID-19) ដោយថា អង្ករកម្ពុជាមានសល់ច្រើន និងធានានូវការរក្សាតម្លៃផងដែរ៕
