លោកនាយករដ្ឋមន្ត្រី ហ៊ុន សែន ណែនាំពលរដ្ឋ មន្ត្រីជំនាញ ធ្វើការងារប្រយុទ្ធប្រឆាំងមេរោគឆ្លងកូរ៉ូណា ដោយគ្មានការរើសអើង ឬប្រកាន់និន្នាការនយោបាយនោះឡើយ ហើយថា ជំងឺនៅកម្ពុជាពិតប្រាកដ គឺជាជំងឺភ័យខ្លាច និងជំងឺនៃការរើសអើង ពុំមែនជាជំងឺ Covid-19 ឬ កូរ៉ូណា ទេ។
ថ្លែងក្នុងពិធីចែកសញ្ញាបត្រឱ្យនិស្សិតជាង៣ពាន់នាក់នៅកោះពេជ្រនាព្រឹកនេះ លោក ហ៊ុន សែន មានប្រសាសន៍ថា ក្នុងស្ថានភាពបច្ចុប្បន្ន ត្រូវរួមគ្នាប្រយុទ្ធប្រឆាំងជំងឺកូរ៉ូណា និងមិនត្រូវរើសអើងចំពោះអ្នកកើតជំងឺនេះ ឬអ្នកដែលសង្ស័យនោះឡើយ។ បន្ថែមពីនេះ ក៏មិនត្រូវភ័យខ្លាចពេកនោះដែរ ប៉ុន្តែ ត្រូវរួមគ្នាទប់ស្កាត់និងបង្ការជំងឺនេះទាំងអស់គ្នា។
លោកមានប្រសាសន៍ថា៖ «ត្រូវតែមានវិធានការ ធ្វើសហប្រតិបត្តិការរួមគ្នាក្នុងចំណោមពលរដ្ឋរបស់យើងមិនថាមាននិន្នាការនយោបាយបែបណាទេ ត្រូវធ្វើការជាមួយគ្នា សហការជាមួយគ្នា។ ឧទាហរណ៍ខ្លួនមានការសង្ស័យលើកម្តៅខ្លួន សុំឱ្យគ្រូពេទ្យជួយពិនិត្យភ្លាម។ តើអាហ្នឹងវាជា កូវីត ឬជាការផ្តាសាយធម្មតា?»
កាលពីថ្ងៃសុក្រសប្តាហ៍មុន អតីតប្រធានគណបក្សសង្រ្គោះជាតិ លោក កឹម សុខា បានលើកឡើងលើទំព័រហ្វេសប៊ុក បច្ចុប្បន្ន ពិភពលោកកំពុងតែប្រឈមនឹងការរីករាលដាលនៃជំងឺ Covid-19 ដែលមិនត្រឹមតែប៉ះពាល់ដល់សុខភាព និងអាយុជីវិតមនុស្សនោះទេ។ ប៉ុន្តែ វាអាចនាំឱ្យប៉ះពាល់ដល់សេដ្ឋកិច្ចជាតិ និងជីវភាពរស់នៅរបស់មនុស្សជាច្រើនទៀត ក្នុងនោះក៏មានប្រទេសកម្ពុជា និងប្រជាពលរដ្ឋខ្មែរយើងផងដែរ។
ក្នុងកាលៈទេសៈនេះ លោក កឹម សុខា ស្នើឱ្យខ្មែរត្រូវរួបរួមគ្នា ដើម្បីទប់ស្កាត់បញ្ហាប្រឈមទាំងនេះ ដោយមិនត្រូវប្រកាន់និន្នាការនយោបាយ កុំប្រើប្រាស់បញ្ហាជំងឺកូរ៉ូណានេះបំផ្លើសបំភ្លៃ ឬវាយប្រហារគ្នា ដើម្បីកេងចំណេញនយោបាយដោយអសីលធម៌។
ដោយឡែក អតីតប្រធានគណបក្សប្រឆាំងនៅក្រៅប្រទេស លោក សម រង្ស៊ី បានបង្ហោះវីដេអូឃ្លីបមួយនៅថ្ងៃនេះ ដោយបង្ហាញពីការស្រាវជ្រាវលើបញ្ហាជំងឺកូរ៉ូណា និងកិច្ចការពារចំពោះជំងឺឆ្លងមួយនេះ។ ក្រៅពីណែនាំដល់ពលរដ្ឋខ្មែរទាំងអស់ឱ្យប្រុងប្រយ័ត្ន ចូលរួមការងារទប់ស្កាត់ជំងឺនេះ លោកក៏បួងសួងឱ្យពលរដ្ឋខ្មែររួចផុតពីជំងឺសាហាវនេះទៀតផង។
លោកមានប្រសាសន៍ថា៖ «ខ្ញុំសូមជូនពរបងប្អូនជនរួមជាតិ ក្មួយៗ និងកូនចៅទាំងអស់ ឱ្យមានសុខភាពល្អ រឹងមាំគ្រប់គ្នា ជាពិសេសសូមកុំឱ្យធ្លាក់ខ្លួនឈឺដោយសារតែវីរុសកូរ៉ូណានេះ»។
ប្រធានមជ្ឈមណ្ឌលអប់រំប្រជាពលរដ្ឋដើម្បីការអភិវឌ្ឍ និងសន្តិភាព លោក យង់ គីមអេង គាំទ្រចំពោះការលើកឡើងរបស់លោកនាយករដ្ឋមន្ត្រី ដោយថា ក្នុងស្ថានភាពជាតិមានបញ្ហាប្រឈម អ្នកនយោបាយគ្រប់និន្នាការទាំងអស់ត្រូវរួមគ្នាដោះស្រាយ ស្តាប់យោបល់គ្នា ឱ្យតម្លៃគ្នា ដើម្បីសេចក្តីសុខរបស់ពលរដ្ឋ និងប្រទេសជាតិ។
លោកមានប្រសាសន៍បន្តថា៖ «បើសិនជាអ្នកនយោបាយមានឆន្ទៈក្នុងការរួបរួមគ្នាក្នុងការដោះស្រាយបញ្ហានេះជារួម ទុកបញ្ហានយោបាយ ការខ្វែងគំនិតគ្នាខាងនយោបាយមួយឡែក ហើយព្យាយាមស្តាប់គ្នាទៅវិញទៅមក គឺជារឿងមួយដែលកម្ពុជាបង្ហាញអំពីសាមគ្គីភាពក្នុងការដោះស្រាយបញ្ហា។ អាហ្នឹងខ្ញុំថាជារឿងល្អ បើសិនជាធ្វើបានមែន។ ខ្ញុំក៏សង្ឃឹមថា អ្នកនយោបាយនឹងយល់អំពីបញ្ហានេះ»។
នាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល បានឱ្យដឹងត្រឹមល្ងាចថ្ងៃម្សិលមិញថា ទូទាំងប្រទេស មន្ត្រីជំនាញបានធ្វើតេស្តរកមេរោគកូរ៉ូណាលើពលរដ្ឋសរុបចំនួន ៤៦២ករណី រកឃើញករណីជំងឺ COVID-19 ចំនួន ២ករណីប៉ុណ្ណោះ។
ប្រភពដដែលថា ករណីទី១ គឺកើតឡើងលើជនជាតិចិន ភេទប្រុសអាយុ៦០ឆ្នាំនៅខេត្តព្រះសីហនុ ប៉ុន្តែ ត្រូវបានក្រុមគ្រូពេទ្យព្យាបាលឱ្យជាសះស្បើយ និងបានបញ្ជូនគាត់ទៅប្រទេសកំណើតកាលពីខែកុម្ភៈហើយដែរ។ ករណីទី២ ក្រសួងរកឃើញជំងឺនេះកើតឡើងលើបុរសជនជាតិខ្មែរ អាយុ៣៨ឆ្នាំ នៅខេត្តសៀមរាប ហើយ កំពុងដាក់ព្យាបាលនៅមន្ទីរពេទ្យបង្អែកខេត្ត ប៉ុន្តែ នាយកដ្ឋានមួយនេះអះអាងថា គាត់មានសុខភាពល្អ គ្រាន់តែនៅមានភាពវិជ្ជមានជំងឺ កូវីត-១៩ ក្នុងខ្លួននៅឡើយ។
នាយកដ្ឋានប្រយុទ្ធជំងឺឆ្លងបញ្ជាក់ថា ចំពោះអ្នកប៉ះពាល់ផ្ទាល់ និងប្រយោលជាមួយអ្នកជំងឺជនជាតិជប៉ុន និងជនជាតិខ្មែរ ត្រូវបានរកឃើញថា ពួកគេអវិជ្ជមានទាំងអស់ ប៉ុន្តែ ត្រូវតាមដានបង្រ្គប់១៤ថ្ងៃបន្តទៀត៕
