ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស ខេង បានបញ្ជាឱ្យមានការកាត់បន្ថយឱ្យបានទាបបំផុតចំពោះវប្បធម៌រត់ការ និងវប្បធម៌អន្តរាគមន៍យកដំណែង។
ថ្លែងក្នុងពិធីអបអរសាទរទិវាសិទ្ធិនារីអន្តរជាតិ ៨មីនា លើកទី១០៩ ក្រោមប្រធានបទ មានសន្តិភាព មានការលើកកម្ពស់សមភាពយេនឌ័រ នៅក្រសួងមហាផ្ទៃនៅថ្ងៃនេះ លោក ស ខេង មានប្រសាសន៍ថា វប្បធម៌រត់ការ ឬអន្តរាគមន៍យកដំណែងនេះ ធ្វើឱ្យលោកមានការលំបាកក្នុងការតែងតាំងមន្ត្រីមានសមត្ថភាព និងស្របទៅតាមច្បាប់ផង ។
លោកថា បញ្ហានេះត្រូវកាត់បន្ថយឱ្យបានអតិបរមាទាំងការតែងតាំងមន្ត្រីថ្នាក់ក្រោមជាតិ និងក្នុងក្របខណ្ឌក្រសួង នូវវប្បធម៌រត់ការ និងអន្តរាគមន៍ ព្រមទាំងគោរពតាមគោលការណ៍ច្បាប់ជាដើម។
លោកមានប្រសាសន៍ថា៖ «ហើយយើងកាត់បន្ថយឱ្យបានជាអតិបរមា ការរត់ ដើម្បីសូកសៀត កន្លែងតួនាទីនីមួយៗ ព្រោះពូកែណាស់មន្ត្រីយើងមួយចំនួន មិនមែនភាគច្រើន ឬទូទៅទេ។ គាត់ពូកែដឹងតែម្តង ពូកែដឹងថា នរណាត្រូវចូលនិវត្តន៍ តាំងពីថ្ងៃខែទៀតណោះ។ ដឹងមែនទែនតែម្តង ដឹងជាងយើង ហើយគាត់ថា សុំទៅកន្លែងហ្នុង ដោយសារកន្លែងហ្នុងត្រូវចូលនិវត្តន៍។ ដល់អីចឹងទៅ បើអ្នកនៅហ្នុងស្រាប់មិនអីទេ ប៉ុន្តែគាត់ហ្នឹងផ្លោះពីណាមក ដល់អីចឹងធ្វើឱ្យវង្វេងតែម្តង »។
ការលើកឡើងពីបញ្ហារត់ការ ឬអន្តរាគមន៍តែងតាំងមន្ត្រីនេះ លោកនាយករដ្ឋមន្ត្រី ហ៊ុន សែន ក៏ធ្លាប់លើកឡើងផងដែរកាលពីពេលកន្លងមក។ សកម្មភាពរត់ការយកដំណែងនេះ ដំណែងនោះ ក្នុងការតែងតាំងមន្ត្រីថ្នាក់ក្រោមជាតិ បានធ្វើឱ្យលោក ហ៊ុន សែន សម្រេចលុបចោលគម្រោងបំបែកខេត្តកណ្តាល និងខេត្តមណ្ឌលគិរី កាលពីឆ្នាំ២០១៨ ថែមទៀតផង។
កាលពីថ្ងៃទី២០ ខែកុម្ភៈ លោក ហ៊ុន សែន ក៏បានបង្ហើបពីសកម្មភាពរត់ការយកដំណែងចៅហ្វាយខេត្តកណ្តាល ចៅហ្វាយខេត្តរង ចៅហ្វាយស្រុក ក្នុងខេត្តនេះ ដែលធ្វើឱ្យលោកធុញទ្រាន់ជាខ្លាំង។
លោកមានប្រសាសន៍ថា៖ «ដំណែងអភិបាលរងមានបញ្ហាទៀត ឯងមិនទាន់តែងតាំងអភិបាលខេត្តផង ស្រាប់ធ្លាយដល់អភិបាលរងខេត្តទៀត។ ដល់ពេលលឺថា អភិបាលស្រុក ស្រាប់តែទៅដល់អភិបាលស្រុកទៀតហើយ»។
យ៉ាងនេះក្តី លោក ស ខេង លើកឡើងថា សម្រាប់លោក ការតែងតាំងមន្ត្រី ត្រូវមើលប្រវត្តិមន្ត្រីណាដែលបានរួមសុខទុក្ខជាមួយពលរដ្ឋបានយូរអង្វែងពីមុនមក ដោយថា ការតែងតាំងមន្ត្រីឡើងមកគឺ ដើម្បីបម្រើរាស្ត្រ និងជាតិ។
ប្រធានមជ្ឈមណ្ឌលអប់រំប្រជាពលរដ្ឋដើម្បីការអភិវឌ្ឍ និងសន្តិភាព លោក យង់ គីមអេង យល់ឃើញថា ចំពោះមុខ ការតែងតាំងមន្ត្រីរាជការក្នុងមុខដំណែងធំៗ មិនអាចលុបបំបាត់ ឬកាត់បន្ថយពីវប្បធម៌រត់ការ សូកប៉ាន់ ឬអន្តរាគមន៍បាននោះទេ ដរាបណាថ្នាក់ដឹកនាំរដ្ឋាភិបាលគ្មានឆន្ទៈពិតប្រាកដដោះស្រាយបញ្ហានេះ។
លោកមានប្រសាសន៍ថា៖ «ខ្ញុំថា សំខាន់បំផុត ដើម្បីលុបបំបាត់បាន គឺទាមទារឱ្យថ្នាក់ដឹកនាំធំៗ លោកត្រូវមានឆន្ទៈតែម្តង។ ថាយើងចង់បានអ្នកមានសមត្ថភាពមកធ្វើការ ប៉ុន្តែ មិនមែនយើងទៅធ្វើធំហ្នឹងដើម្បីទៅរកលាភសក្ការៈ។ ទីពីរ ទៅដើម្បីជួយកូនចៅយើង ដើម្បីឱ្យបានទៅធ្វើធំដែរ ឬក៏ជួយបងប្អូនយើងឱ្យទៅធ្វើធំដែរទេ»។
លោក យង់ គីមអេង មានប្រសាសន៍ថា នៅពេលការតែងតាំងមន្ត្រីធំៗ តាមរយៈវប្បធម៌រត់ការ សូកប៉ាន់ និងបក្ខពួកនិយម នឹងធ្វើឱ្យប៉ះពាល់ដល់ប្រសិទ្ធភាពការងារ ពោលគឺធ្វើការងារបម្រើជាតិ ពួកគេធ្វើឡើងដើម្បីផលប្រយោជន៍ផ្ទាល់ខ្លួន ធំជាងផលប្រយោជន៍ពលរដ្ឋ និងសង្គមជាតិ។ លោកថា លើសពីនេះ ធ្វើឱ្យប៉ះពាល់ដល់ដំណើរការអភិវឌ្ឍជាតិ ដោយបង្កើតភាពអសកម្មក្នុងប្រព័ន្ធរដ្ឋបាល បង្កើតជាទម្លាប់អាក្រក់ ត្បិតអ្នកមានសមត្ថភាពបម្រើរាស្ត្រពិតប្រាកដ មិនត្រូវបានតែងតាំង និងធ្វើឱ្យខាតបង់ថវិកាជាតិ ដោយសារប្រើមនុស្សមិនចំគោលដៅ៕
