រដ្ឋាភិបាលបានសម្រេចផ្អាកមិនឱ្យនាវាដឹកអ្នកដំណើរ ឬនាវាដឹកភ្ញៀវទេសចរទាំងអស់ចូលមកកម្ពុជាជាបណ្តោះអាសន្នតាមច្រកអន្តរជាតិក្អមសំណ។
ការសម្រេចផ្អាកនេះធ្វើឡើងក្រោយពេលកម្ពុជារកឃើញភ្ញៀវបរទេសជនជាតិអង់គ្លេសចំនួន ៣នាក់ហើយដែលបានធ្វើដំណើរតាមនាវាទេសចរណ៍មានផ្ទុកជំងឺកូវីដ-១៩ ឬ កូរ៉ូណា ក្រោយពេលនាវានោះបានចុះចតនៅទីរួមខេត្តកំពង់ចាម។
ក្នុងលិខិតជម្រាបជូនម្ចាស់នាវា និងភ្នាក់ងារនាវាដឹកអ្នកដំណើរ ឬដឹកភ្ញៀវទេសចរ របស់អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ នៃក្រសួងសាធារណការ និងដឹកជញ្ជូន នៅថ្ងៃសុក្រនេះ បញ្ជាក់ថា ការសម្រេចផ្អាកមិនឱ្យនាវាដឹកអ្នកដំណើរ ឬភ្ញៀវទេសចរចូលកម្ពុជាតាមច្រកក្អមសំណនេះ ចាប់អនុវត្តពីថ្ងៃនេះតទៅ រហូតដល់មានការសម្រេចជាថ្មី។ ប៉ុន្តែ នាយកដ្ឋានដឹកជញ្ជូនផ្លូវទឹកនេះ មិនបានបញ្ជាក់ពីមូលហេតុនៃការផ្អាកជាបណ្តោះអាសន្ននោះឡើយ។
លិខិតសរសេរថា៖ «អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ សម្រេចផ្អាកជាបណ្តោះអាសន្ន លើការអនុញ្ញាតចូលនាវាទេសចរណ៍មកព្រះរាជាណាចក្រកម្ពុជា តាមច្រកអន្តរជាតិក្អមសំណ ពីថ្ងៃនេះតទៅ រហូតដល់មានសេចក្តីសម្រេចជាថ្មី»។
លិខិតដដែលនេះ ក៏បានប្រកាសនារាករណ៍ ឬលុបចោល លើខ្លឹមសារលិខិតចុះលេខ៥៧០ សក. ដជទ ចុះថ្ងៃទី១៣ ខែមីនា ឆ្នាំ២០២០។
ខ្លឹមសារលិខិតទី១ ឬលិខិតលេខ៥៧០ សក. ដជទ របស់អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ គឺបានសម្រេចផ្អាកមិនឱ្យនាវាដឹកអ្នកដំណើរ ឬនាវាដឹកភ្ញៀវទេសចរទាំងអស់ចូលមកកម្ពុជាជាបណ្តោះអាសន្នតែម្តង។ លិខិតនោះបានបញ្ជាក់ពីមូលហេតុចាំបាច់ក្នុងការសម្រេចផ្អាកនោះថា ដើម្បីទប់ស្កាត់ការរីករាលដាលនៃជំងឺកូរ៉ូណាបន្ថែមទៀតនៅកម្ពុជា។
កាលពីថ្ងៃម្សិលមិញ ក្រសួងសុខាភិបាលបានចេញសេចក្តីប្រកាសព័ត៌មានមួយ បញ្ជាក់ថា សំណាកចេញដោយវិទ្យាស្ថានប៉ាស្ទ័រកម្ពុជា ដោយពិនិត្យលើអ្នកដំណើរលើនាវាទេសចរណ៍មួយគ្រឿងឈ្មោះ Viking Cruise Journey បានចូលចតនៅក្នុងខេត្ដកំពង់ចាម មានចំនួនសរុប៦៤នាក់ ហើយជាលទ្ធផលរកឃើញថាជនជាតិអង់គ្លេស៣នាក់ ក្នុងនោះស្រីពីរនាក់ មានផ្ទុកជំងឺឆ្លង COVID-19។ ស្រ្តីអង់គ្លេសម្នាក់រកឃើញថាមានផ្ទុកជំងឺរលាកផ្លូវដង្ហើមនេះកាលពីថ្ងៃទី១០ ខែមីនា ដោយឡែកប្តីប្រពន្ធពីរនាក់ទៀត ត្រូវបានរកឃើញថាផ្ទុកជំងឺកូរ៉ូណានៅថ្ងៃទី១២ ខែមីនា។
ក្រសួងបញ្ជាក់ថា មនុស្ស៦១នាក់ផ្សេងទៀត លទ្ធផលធ្វើតេស្តបង្ហាញថា អវិជ្ជមាន ប៉ុន្តែ ពួកគេត្រូវដាក់ក្រោមការតាមដានដាច់ដោយឡែកពីគេ ក្នុងសណ្ឋាគារមួយនៃក្រុងកំពង់ចាមបន្តទៀត។
តាំងពីផ្ទុះឡើងវីរុសកូវីដ-១៩ (COVID-19) ដំបូងនៅទីក្រុងវូហាន ប្រទេសចិន មកដល់ត្រឹមថ្ងៃម្សិលមិញក្រសួងសុខាភិបាលបញ្ជាក់ថា កម្ពុជារកឃើញអ្នកឆ្លងកូវីដ-១៩ (COVID-19) ចំនួន ៥នាក់ ឬ៥ករណីហើយ។ ករណីទី១ កើតឡើងលើបុរសជនជាតិចិន មកពីទីក្រុងវូហាន ហើយក្រសួងក៏បានព្យាបាលបុរសចិនរូបនោះ ឱ្យជាសះស្បើយ។ ករណីទី២ កើតឡើងលើបុរសជនជាតិខ្មែរវ័យ៣៨ឆ្នាំ នៅខេត្តសៀមរាប និង៣ករណីទៀត រកឃើញកើតឡើងលើជនជាតិអង់គ្លេសដែលបានធ្វើដំណើរតាមនាវា Viking Cruise Journey ចុះចតនៅខេត្តកំពង់ចាម ដោយម្នាក់ក្នុងចំណោមពលរដ្ឋអង់គ្លេសដែលជាជនពិការនោះ ត្រូវបានបញ្ជូនមកសម្រាកព្យាបាលនៅមន្ទីរពេទ្យរុស្ស៊ី ក្រុងភ្នំពេញ។ ដោយឡែក ប្តីប្រពន្ធជនជាតិអង់គ្លេស២នាក់ទៀត ត្រូវបន្តព្យាបាលនៅមន្ទីរពេទ្យបង្អែកខេត្តកំពង់ចាម៕
