ក្រសួងអប់រំបានដាក់ការសិក្សាតាមប្រព័ន្ធអេឡិចត្រូនិច E-learning សម្រាប់ជំនួយដល់សិស្សរៀនថ្នាក់ទី៩ និងទី១២ ក្នុងក្រុងសៀមរាបដែលបានផ្អាកពីការសិក្សាជាបណ្ដោះអាសន្ន ដោយសារវិបត្តិកូវីដ-១៩ (COVID-19)។
ក្រោយពីរកឃើញអ្នកជំងឺជាជនជាតិខ្មែរម្នាក់នៅខេត្តសៀមរាប កាលពីថ្ងៃ៦ ខែមីនា ចុងសប្ដាហ៍មុន ក្រសួងអប់រំបានចេញបញ្ជាឱ្យគ្រប់គ្រឹះស្ថានសិក្សារដ្ឋ និងឯកជនទាំងអស់ក្នុងក្រុងសៀមរាប ត្រូវបិទទ្វារបណ្ដោះអាសន្ន ដោយបារម្ភខ្លាចមានការឆ្លងរាលដាលជំងឺកូវីដ-១៩ (COVID-19) ដល់សិស្សនៅក្នុងខេត្ត។
ក្នុងសេចក្តីប្រកាសព័ត៌មានចុះថ្ងៃទី១៣ ខែមីនានេះ ក្រសួងអប់រំឱ្យដឹងថា ដើម្បីជំនួយដល់ការសិក្សារបស់សិស្សានុសិស្ស ក្រសួងបានបង្កើតកម្មវិធីសិក្សាតាមប្រព័ន្ធអេឡិចត្រូនិច ដោយឥតគិតថ្លៃលើមុខវិជ្ជាសិក្សាចំនួន៦ ដែលរួមមាន គណិតវិទ្យា ប្រវត្តិវិទ្យា រូបវិទ្យា គីមីវិទ្យា និងភាសាខ្មែរ ដាក់លើបណ្ដាញសង្គម និងមជ្ឈមណ្ឌលសិក្សាអេឡិចត្រូនិចរបស់ក្រសួង ចាប់ពីថ្ងៃនេះតទៅ។
គេហទំព័រ និងបណ្ដាញសង្គមដែលសិស្សានុសិស្សអាចចូលទៅរៀនបាននោះមាន បណ្ដាញ Youtube តាមរយៈ www.youtube.com/moeys ទំព័រហ្វេសបុក www.facebook.com/moeys.gov.kh និងមជ្ឈមណ្ឌលសិក្សាអេឡិចត្រូនិចក្រសួង elearning.moeys.gov.kh។
ក្នុងសេចក្តីប្រកាសនោះលើកឡើងថា៖ «កម្មវិធីនេះបង្កើតឡើងក្នុងគោលបំណងជំនួយដល់ការសិក្សារបស់ប្អូនៗសិស្សានុសិស្ស អាចនៅតែបន្តការសិក្សាបានដោយខ្លួនឯង នៅគ្រប់ទីកន្លែង និងស្របតាមពេលវេលាផ្ទាល់ខ្លួនរបស់សិស្សានុសិស្ស សម្រាប់ជំនួយស្មារតីក្នុងការត្រៀមប្រឡងសញ្ញាបត្រមធ្យមសិក្សាបឋមភូមិ និងទុតិយភូមិ តាមកាលបរិច្ឆេទដែលបានគ្រោងទុក»។
អ្នកនាំពាក្យក្រសួងអប់រំ លោក រស់ សុវាចា មានប្រសាសន៍ប្រាប់VOD ថា ការរៀបចំនេះគឺផ្ដោតទៅលើការសិក្សាថ្នាក់ទី៩ និងទី១២ ដោយមានការផ្សាយផ្ទាល់នៅលើបណ្ដាញសង្គមទាំង៣។
លោកថា៖ «នេះគឺជាការងារបច្ចុប្បន្នភាព ហើយខ្ញុំសុំបញ្ជាក់ជូនសាធារណជនផងដែរថា ការបង្រៀននេះគឺក្រសួងបានធ្វើនៅប៉ុន្មានឆ្នាំចុងក្រោយនេះមកហើយ គ្រាន់ថា ពេលនេះគឺផ្ដោតចំពោះមុខ គឺយើងខិតខំបន្ថែមលើចំនួនដងការផ្សាយជូនដល់សិស្សានុសិស្ស»។
លោក រស់ សុវាចា មិនបានបញ្ជាក់ថា មានសាលាប៉ុន្មានដែលបានបិទទ្វារនៅក្រុងសៀមរាបនោះទេ ខណៈប្រធានស្ដីទីមន្ទីរអប់រំខេត្ត លោក ហុង ឧប្បុលវណ្ណា ថាលោករវល់ជាប់ប្រជុំមិនអាចនិយាយទូរសព្ទបាន។
យោងតាមសារព័ត៌មាន Fresh News សាលាក្នុងខេត្តសៀមរាប ចំនួន១១០ ត្រូវបានបិទទ្វារក្រោយក្រសួងអប់រំបញ្ជា ក្នុងនោះមានសាលាឯកជន ៧៧កន្លែង (សាលាមត្តេយ្យ៥០កន្លែង) សាលាបឋមសិក្សា ៥១កន្លែង សាលាមធ្យមសិក្សា ២៣កន្លែង វិទ្យាល័យចំនួន ៧កន្លែង វិទ្យាស្ថានចំនួន ៣កន្លែង និងសាកលវិទ្យាល័យចំនួន ៦កន្លែង។
នាយកប្រតិបត្តិសម្ព័ន្ធគណនេយ្យភាពសង្គម លោក សន ជ័យ មានប្រសាសន៍ថា វិធានការនេះគឺអាចឆ្លើយតបទៅនឹងតម្រូវការនៃការរៀនសូត្ររបស់សិស្សផងដែរ តែក្រសួងគួរបន្ថែមឱ្យមានការសួរឆ្លើយក្នុងការសិក្សាលើថ្នាក់អេឡិចត្រនិចនេះផង។
លោក សន ជ័យ មានប្រសាសន៍ថា៖ «បើយើងមើលជារួម ក៏វាមិនស្រួលអីពេកដែរ ព្រោះអីដូចជាមុខវិជ្ជា គណិត រូបវិទ្យា គីមី ជីវៈ អីជាដើម សូម្បីពន្យល់ផ្ទាល់ក៏ពិបាកនឹងយល់ដែរ។ អ៊ីចឹង ចំនុចហ្នឹងគួរតែមានយុទ្ធសាស្ត្រមួយដើម្បីភ្ជាប់ទំនាក់ទំនងរវាងសិស្សនឹងគ្រូបង្រៀនតាមអនឡាញ ឱ្យពួកគេមានឱកាសឆ្លងឆ្លើយគ្នាទាន់ពេលវេលាដែរ»។
គិតរហូតមកដល់ពេលនេះ ប្រទេសកម្ពុជា រកអ្នកផ្ទុកជំងឺកូវីដ-១៩ (COVID-19)ចំនួន៥នាក់ហើយ ក្នុងនោះមានខ្មែរម្នាក់នៅខេត្តសៀមរាប ៣នាក់ជាជនជាតិអង់គ្លេស រកឃើញនៅលើនាវាទេសចរណ៍មួយនៅខេត្តកំពង់ចាម និងម្នាក់ដែលត្រូវបានព្យាបាលជា ជាជនជាតិចិននៅខេត្តព្រះសីហនុ៕