មន្ត្រីសង្គមស៊ីវិលផ្តល់អនុសាសន៍ថា ក្នុងស្ថានភាពនៃការរីករាលដាលជាសកលនៃជំងឺរលាកផ្លូវដង្ហើមកូវីដ-១៩ ពលរដ្ឋគប្បីផ្អាកការជួបជុំគ្នា ពិសេសការជួបជុំផ្នែកសាសនាមួយអន្លើសិន ដើម្បីបញ្ចៀសការឆ្លងរាលដាលនៃជំងឺនេះបន្ថែមទៀត។
ការស្នើនេះធ្វើឡើងក្រោយពេលក្រសួងសុខាភិបាលនៅថ្ងៃអង្គារនេះ បានប្រកាសថា មានពលរដ្ឋកម្ពុជាចំនួន១២នាក់ថ្មីទៀត មានផ្ទុកកូវីដ-១៩។
ប្រធានមជ្ឈមណ្ឌលអប់រំប្រជាពលរដ្ឋដើម្បីការអភិវឌ្ឍ និងសន្តិភាព លោក យង់ គីមអេង មានប្រសាសន៍ថា ក្នុងស្ថានភាពបច្ចុប្បន្ន ការជួបជុំគ្នាទ្រង់ទ្រាយធំ ឬការចូលរួមពិធីសាសនាខ្លះ គប្បីផ្អាកបណ្តោះអាសន្នសិន ដើម្បីបង្ការមិនឱ្យមានការរីករាលដាលជំងឺកូរ៉ូណាបន្ថែមទៀត។
លោកមានប្រសាសន៍ថា៖ «បាទ! ខ្ញុំថា ការជួបជុំផ្សេងៗគួរតែមានការផ្អាកដែរជាការប្រសើរ កុំឱ្យហានិភ័យហ្នឹងកើតឡើងកាន់តែច្រើន ហើយយើងគិតអំពីសុវត្ថិភាព ប្រជាពលរដ្ឋជាចម្បង បាទ»។
ស្រដៀងគ្នានេះ នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ យល់ថា ការផ្អាកសកម្មភាពជួបជុំគ្នាក្នុងពិធីមួយចំនួន ដូចជាពិធីបុណ្យ មង្គលការ ពិធីសាសនា កន្លែងកម្សាន្ត ឬការប្រគុំតន្ត្រី ឬពិធីតាំងពិរព័ណ៍នានា ព្រមទាំងកាត់បន្ថយការធ្វើដំណើរតាមសេវាសាធារណៈ ឬឯកជនដែលមានមនុស្សច្រើនជាដើម។
ក្រៅពីនេះ លោកថា ពលរដ្ឋគប្បីចូលរួមសហការគ្នាទៅពិនិត្យសុខភាពក្នុងករណីសង្ស័យ ឬធ្លាប់ធ្វើដំណើរមកពីក្រៅប្រទេសក្នុងតំបន់មានផ្ទុះជំងឺកូវីដ-១៩ ធ្លាប់ចូលរួមពិធីជួបជុំដែលរកឃើញថាមានករណីឆ្លងជំងឺនេះ ដោយដាក់ខ្លួនឯងនៅឆ្ងាយពីអ្នកដទៃក្នុងរយៈពេលកំណត់តាមវិធានសុខាភិបាលផងដែរ។
លោក សន ជ័យ បន្តថា៖ «យើងឃើញឥរិយាបថ ហានិភ័យហ្នឹងនៅច្រើនសម្រាប់ប្រជាពលរដ្ឋ ពិសេសអ្នករកស៊ីដែលគេហៅថា រកមួយថ្ងៃរស់មួយថ្ងៃ ដូចជា អ្នកលក់ដូរតាមដងផ្លូវ អ្នករត់រ៉ឺម៉ក់ទេសចរណ៍។ អ្នកបំលាស់ទីពីកន្លែងមួយទៅកន្លែងមួយ ពិសេសអ្នកលក់ដូរតាមផ្សារតូចៗអីហ្នឹង ត្រូវប្រុងប្រយ័ត្នខ្ពស់តែម្តង។ ប៉ុន្តែ ជាក់ស្តែងពួកគេហាក់ដូចជានៅមានការធ្វេសប្រហែសនៅឡើយ»។
នៅថ្ងៃអង្គារនេះ ក្រសួងសុខាភិបាលបានប្រកាសរកឃើញអ្នកផ្ទុកជំងឺកូវីដ-១៩ ចំនួន១២ករណីថ្មីផ្សេងទៀត។ ការរកឃើញអ្នកកើតជំងឺកូវីដ-១៩ ចំនួន១២ករណីទៀតនេះ ធ្វើឱ្យចំនួនអ្នកកើតជំងឺនេះនៅកម្ពុជាឡើងដល់២៤ករណីហើយ ចាប់តាំងពីជំងឺនេះបានផ្ទុះឡើងកាលពីចុងឆ្នាំ២០១៩មក។
សេចក្ដីជូនព័ត៌មានរបស់ក្រសួងសុខាភិបាលឱ្យដឹងថា ក្នុងចំណោម១២ករណីថ្មីនេះ មាន១១ករណីរកឃើញលើបុរសខ្មែរឥស្លាមចំនួន១១នាក់ ដែលទើបត្រលប់មកពីចូលរួមក្នុងពិធីសាសនានៅប្រទេសម៉ាឡេស៊ី និងបុរសខ្មែម្នាក់ទៀតទើបធ្វើដំណើរមកពីប្រទេសថៃ។
បុរសខ្មែឥស្លាមទាំង១១នាក់ដែលរកឃើញជំងឺនេះ ជាក្រុមមនុស្សស្ថិតនៅក្នុងចំណោមពលរដ្ឋ ៧៩នាក់ដែលទៅចូលរួមពិធីសាសនានៅម៉ាឡេស៊ីកាលពីចុងខែកុម្ភៈកន្លងទៅ។
អ្នកនាំពាក្យក្រសួងធម្មការ និងសាសនា លោក សេង សុមុនី មានប្រសាសន៍ថា ខាងក្រសួងក៏បានប្រជុំណែនាំដល់ថ្នាក់ដឹកនាំសាសនានានានៅកម្ពុជា អំពីវិធីបង្ការតាមវិធានសុខាភិបាល និងណែនាំឱ្យផ្អាក ឬកាត់បន្ថយការជួបជុំគ្នា ដើម្បីបញ្ចៀសហានិភ័យនេះផងដែរ។
លោកមានប្រសាសន៍ថា៖ «ក៏មានការណែនាំដល់អ្នកគ្រប់គ្រងសាសនា ក៏ដូចជាអ្នកដឹកនាំធ្វើពិធីបុណ្យ សូមឱ្យមានការប្រុងប្រយ័ត្ន និងបញ្ចៀសការរីករាលដាលការឆ្លងតាមរយៈសកម្មភាពហ្នឹង។ លោក [ព្រះសង្ឃ] ថា នៅតែធ្វើបុណ្យ ប៉ុន្តែ ការបញ្ចៀសរបស់លោកហ្នឹង គឺមានចំនួនអ្នកចូលរួមតិច ហើយមានអនាម័យ មានទឹកលាងដៃសម្រាប់អ្នកចូលរួម»។
នៅថ្ងៃនេះ រដ្ឋាភិបាលសម្រេចបិទទីតាំងកម្សាន្ត រួមមានកន្លែងច្រៀងខារ៉ាអូខេ ឬ KTV និងរោងភាពយន្តទូទាំងប្រទេស ដើម្បីបង្ការការរីករាលដាលនៃជំងឺកូវីដ-១៩ ពីថ្ងៃនេះតទៅ រហូតដល់ស្ថានភាពជំងឺនេះបានធូរស្រាល។
ដោយឡែក កាលពីថ្ងៃម្សិលមិញ ក្រសួងអប់រំ ក៏បានចេញលិខិតជូនដំណឹងដល់សាលារៀន និងគ្រឹះស្ថានសិក្សាគ្រប់កម្រិត អំពីការផ្អាក ឬចូលវិស្សមកាលតូចមុនពេលកំណត់ ដើម្បីបង្ការការរីករាលដាលជំងឺនេះ ដោយសេចក្តីជូនដំណឹងចាប់អនុវត្តពីថ្ងៃម្សិលមិញតែម្តង រហូតដល់មានសេចក្តីជូនដំណឹងថ្មី។
ធនាគារអភិវឌ្ឍន៍អាស៊ី (ADB) កាលពីដើមខែមីនា បានចេញរបាយការណ៍មួយដោយលើកឡើងថា ការរីករាលដាលនៃមេរោគ COVID-19 នឹងធ្វើឱ្យប៉ះពាល់ខ្លាំងដល់ប្រទេសកំពុងអភិវឌ្ឍន៍ ក្នុងនោះរួមទាំងកម្ពុជាផងដែរ។ ADB បញ្ជាក់ថា ផលិតផលក្នុងស្រុកសរុប ឬ GDP របស់កម្ពុជា អាចនឹងខាតបង់ជាង ១.៤០ភាគរយ ឬស្មើនឹងទឹកប្រាក់ជិត ៣៥០លានដុល្លារ ក្នុងករណីមានផលប៉ះពាល់កម្រិតតិចបំផុត។
របាយការណ៍ដដែលនេះ ប៉ាន់ប្រមាណទៀតថា សេដ្ឋកិច្ចកម្ពុជា អាចនឹងខាតបង់កំណើនប្រមាណជិត ២ភាគរយ ឬស្មើនឹងជិត ៥រយ(៤៧៣)លានដុល្លារ ក្នុងករណីមានផលប៉ះពាល់កម្រិតមធ្យម ហើយកំណើនសេដ្ឋកិច្ចកម្ពុជា អាចនឹងបាត់បង់ក្នុងរង្វង់ជាង ៣ភាគរយ ក្នុងករណីផលប៉ះពាល់មានកម្រិតខ្ពស់ ប្រសិនបើជំងឺនេះនៅបន្តអូសបន្លាយយូរ៕