រដ្ឋសហព័ន្ធអាល្លឺម៉ង់សម្រេចផ្ដល់លុយចំនួន ៣,៥លានអឺរ៉ូ ដែលស្មើនឹងជិត ៤លានដុល្លារអាមេរិកបន្ថែមដល់ការបោសសម្អាតមីននៅកម្ពុជា ចាប់ពីឆ្នាំ២០២០ ដល់ឆ្នាំ២០២១។
ក្នុងសេចក្តីប្រកាសព័ត៌មាននៅថ្ងៃពុធ ទី១៨ មីនានេះ ស្ថានទូតអាល្លឺម៉ង់ប្រចាំកម្ពុជា ឱ្យដឹងថា ថវិកាទាំងនេះនឹងផ្ដល់ទៅកាន់អង្គការ HALO Trust សម្រាប់អនុវត្តន៍។
ស្ថានទូតអាល្លឺម៉ង់បានដកស្រង់ប្រសាសន៍របស់ឯកអគ្គរដ្ឋទូតរបស់ខ្លួន លោក Christian Berger ថាប្រទេសអាល្លឺម៉ង់នឹងចូលរួមជាមួយកម្ពុជាបន្តទៀត ដើម្បីឱ្យសម្រេចគោលដៅកម្ពុជាគ្មានមីនឆ្នាំ២០២៥។
លោក Christian Berger៖ «មីនគឺជាកេរដំណែលដ៏គួរអោយឈឺចាប់នៃអតីតកាលមួយ និងនៅតែជាឧបសគ្គដល់ការអភិវឌ្ឍ។ យើងរួមគ្នាជាមួយរាជរដ្ឋាភិបាល និងដៃគូអន្តរជាតិ ចាំបាច់ត្រូវបង្កើនការខិតខំរបស់យើង ដើម្បីសម្រេចគោលដៅកម្ពុជាគ្មានមីននៅឆ្នាំ២០២៥»។
របាយការណ៍អាជ្ញាធរមីនកម្ពុជាឱ្យដឹងថា គិតចាប់ពីឆ្នាំ១៩៩២ មកត្រឹមខែធ្នូ ឆ្នាំ២០១៩ កម្ពុជាបានរំដោះផ្ទៃដីមានមីនបានជិត ២ពាន់គីឡូម៉ែត្រក្រឡា រកឃើញ និងបំផ្លាញចោលនូវគ្រាប់មីន និងគ្រាប់មិនទាន់ផ្ទុះគ្រប់ប្រភេទបានជិត ៤លានគ្រាប់ ខណៈជនរងគ្រោះដោយគ្រាប់មីនមានជាង ៦ម៉ឺននាក់ ក្នុងនោះស្លាប់មានជិត ២ម៉ឺននាក់៕