ទំនាក់ទំនងអន្តរជាតិ, ព័ត៌មានជាតិ, សន្តិសុខ

អាល្លឺម៉ង់ផ្ដល់ថវិកាជិត៤លានដុល្លារសម្រាប់ការបោសសម្អាតមីននៅកម្ពុជារយៈពេល២ឆ្នាំ

ព័ត៌មានជាតិ ទំនាក់ទំនងអន្តរជាតិ សន្តិសុខ-

លោក ហ៊ុន សិរីវឌ្ឍន៍
| ១៨ មីនា ២០២០
ម៉ោង ១៧:៥១

នៅថ្ងៃទី១៧ ខែមិនា ឆ្នាំ២០២០ លោកឯកអគ្គរដ្ឋទូត Christian Berger (អាវដៃវែងពណ៌ផ្ទៃមេឃ) ក្នុងដំណើរទស្សនកិច្ចរួមគ្នាមួយជាមួយលោកទេសរដ្ឋមន្រ្តី លី ធុជ (អាវដៃវែងពណ៌ត្នោត) ទៅកាន់ចំការមីនមួយនៅអូរស្មាច់ ខេត្តឧត្តរមានជ័យ។ (ហ្វេសប៊ុក German Embassy Cambodia)

រដ្ឋសហព័ន្ធអាល្លឺម៉ង់សម្រេចផ្ដល់លុយចំនួន ៣,៥លានអឺរ៉ូ ដែលស្មើនឹងជិត ៤លានដុល្លារអាមេរិកបន្ថែមដល់ការបោសសម្អាតមីននៅកម្ពុជា ចាប់ពីឆ្នាំ២០២០ ដល់ឆ្នាំ២០២១។

ក្នុងសេចក្តីប្រកាសព័ត៌មាននៅថ្ងៃពុធ ទី១៨ មីនានេះ ស្ថានទូតអាល្លឺម៉ង់ប្រចាំកម្ពុជា ឱ្យដឹងថា ថវិកាទាំងនេះនឹងផ្ដល់ទៅកាន់អង្គការ HALO Trust សម្រាប់អនុវត្តន៍។

ស្ថានទូតអាល្លឺម៉ង់បានដកស្រង់ប្រសាសន៍របស់ឯកអគ្គរដ្ឋទូតរបស់ខ្លួន លោក Christian Berger ថាប្រទេសអាល្លឺម៉ង់នឹងចូលរួមជាមួយកម្ពុជាបន្តទៀត ដើម្បីឱ្យសម្រេចគោលដៅកម្ពុជាគ្មានមីនឆ្នាំ២០២៥។

លោក Christian Berger៖ «មីនគឺជាកេរដំណែលដ៏គួរអោយឈឺចាប់នៃអតីតកាលមួយ និងនៅតែជាឧបសគ្គដល់ការអភិវឌ្ឍ។ យើងរួមគ្នាជាមួយរាជរដ្ឋាភិបាល និងដៃគូអន្តរជាតិ ចាំបាច់ត្រូវបង្កើនការខិតខំរបស់យើង ដើម្បីសម្រេចគោលដៅកម្ពុជាគ្មានមីននៅឆ្នាំ២០២៥»។

របាយការណ៍អាជ្ញាធរមីនកម្ពុជាឱ្យដឹងថា គិតចាប់ពីឆ្នាំ១៩៩២ មកត្រឹមខែធ្នូ ឆ្នាំ២០១៩ កម្ពុជាបានរំដោះផ្ទៃដីមានមីនបានជិត ២ពាន់គីឡូម៉ែត្រក្រឡា រកឃើញ និងបំផ្លាញចោលនូវគ្រាប់មីន និងគ្រាប់មិនទាន់ផ្ទុះគ្រប់ប្រភេទបានជិត ៤លានគ្រាប់ ខណៈជនរងគ្រោះដោយគ្រាប់មីនមានជាង ៦ម៉ឺននាក់ ក្នុងនោះស្លាប់មានជិត ២ម៉ឺននាក់៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។