រដ្ឋាភិបាលបានបង្ហាញពីវិធានការថ្មីៗបន្ថែមទៀត ដើម្បីឆ្លើយតបទៅនឹងបញ្ហាជំងឺកូវីដ-១៩ សម្រាប់បង្ការ ឬទប់ស្កាត់ជំងឺនេះ ដូចជា ការទទួលយកវេជ្ជបណ្ឌិតជំនាញ និងគ្រឿងបរិក្ខារបច្ចេកទេសពីចិន ព្រមទាំងបានចាត់វិធានការរកទីតាំងបន្ថែមទៀតដើម្បីព្យាបាលអ្នកឆ្លងជំងឺកូវីដ-១៩ ជាដើម។
លោកនាយករដ្ឋមន្ត្រី ហ៊ុន សែន បានលើកឡើងនៅលើទំព័រហ្វេសប៊ុករបស់ខ្លួននៅថ្ងៃនេះថា ក្រុមគ្រូពេទ្យជំនាញ៧នាក់របស់ចិន ព្រមទាំងផ្តល់នូវបរិក្ខារពេទ្យសម្រាប់ប្រើប្រាស់ពាក់ព័ន្ធនឹងជំងឺកូវីដ-១៩ បានមកដល់កម្ពុជាហើយនៅព្រឹកនេះ ដើម្បីជួយបង្ហាត់បង្រៀនអំពីការព្យាបាលជំងឺកូវីដ-១៩ ក្រោយពេលប្រទេសខ្លួនទទួលបានជោគជ័យក្នុងការព្យាបាលអ្នកជំងឺកូវីដ-១៩។
លើសពីនេះ ក្នុងសារជាសំឡេងមួយរបស់លោក ហ៊ុន សែន ក៏បានដាក់បទបញ្ជាថ្មីឱ្យអភិបាលខេត្តទាំងអស់ត្រូវស្វែងរកសណ្ឋាគារ ខុនដូរ ឬផ្ទះសំណាក់ ដោយគិតថ្លៃឱ្យម្ចាស់អាជីវកម្មទាំងនោះ និងជម្រើសចុងក្រោយគឺរកសាលារៀនសម្រាប់ជាទីតាំងព្យាបាល ឬដាក់អ្នកសង្ស័យឆ្លងជំងឺកូវីដ-១៩។
លោក ហ៊ុន សែន មានប្រសាសន៍ក្នុងសារសំឡេងនោះថា៖ «យើងជួលសណ្ឋាគារហ្នឹងតែម្តង ព្រោះវាមានប្រព័ន្ធទឹកប្រព័ន្ធភ្លើងស្រាប់ មានម៉ាស៊ីនត្រជាក់ មានកង្ហារអីគ្រប់គ្រាន់តែម្តង។ អីចឹង យើងជួលយកគ្រប់គ្រង មានគ្រែមានអីហើយស្រេច អីចឹងវាជាការងាយស្រួល។ ចំណុចនេះគឺសុំឱ្យខេត្ត ធ្វើការបន្ទាន់ទៅលើបញ្ហាហ្នឹង។ រីឯសាលារៀន គឺយើងយក ឬយើងធ្វើតែពេលណាដែលយើងមិនអាចរកសណ្ឋាគារ ឬរកអាគារបាន សឹមយើងទៅយកសាលារៀន»។
នាយកដ្ឋានប្រយុទ្ធប្រឆាំងជំងឺឆ្លង ឬCDC បានអះអាងនៅលើទំព័រហ្វេសប៊ុករបស់ខ្លួនថា គិតត្រឹមម៉ោង ១០ព្រឹក ថ្ងៃទី២៣ ខែមីនា ឆ្នាំ២០២០ ក្រសួងរកឃើញអ្នកជំងឺ COVID-19 សរុបទាំងអស់ចំនួន៨៦ករណី ដោយខាងក្រសួងទើបនឹងរកឃើញ២ករណីថ្មីទៀត ដែលត្រូវបានរកឃើញនៅខេត្តកំពង់ចាម ១ករណី និងខេត្តកោះកុង ១ករណី។
ក្រសួង អះអាងថា ខ្លួនបានព្យាបាលជាសះស្បើយ២នាក់ហើយ គឺជនជាតិចិន១នាក់ និងជនជាតិអង់គ្លេស១នាក់។ នាយកដ្ឋានប្រយុទ្ធប្រឆាំងជំងឺឆ្លង លើកឡើងថា ពុំទាន់រកឃើញភស្តុតាងបញ្ជាក់ថា មានការឆ្លងក្នុងសហគមន៍នៅឡើយទេ តែលទ្ធភាពនឹងអាចកើតមានឡើង។
លោក ហ៊ុន សែន បញ្ជាក់ថា រាជរដ្ឋាភិបាលបានបង្កើតគណៈកម្មាធិការជាតិប្រយុទ្ធប្រឆាំងនឹងជំងឺកូវីដ-១៩ ខណៈក្រសួងស្ថាប័នមួយចំនួនចាប់ផ្តើមដាក់វិធានការទប់ស្កាត់ចំពោះការឆ្លងរីករាលដាលផងដែរ។
កាលពីសប្តាហ៍មុន រដ្ឋមន្ត្រីក្រសួងមហាផ្ទៃ ក៏បានចេញសេចក្តីណែនាំមួយស្តីពីវិធានការបង្ការ ទប់ស្កាត់ការរីករាលដាលជំងឺកូវីដ-១៩ នៅរដ្ឋបាលថ្នាក់ក្រោមជាតិ។
លិខិតនោះណែនាំថា គណៈកម្មការប្រយុទ្ធនឹងជំងឺនេះនៅថ្នាក់ក្រោមជាតិ ត្រូវយកចិត្តទុកដាក់ខ្ពស់អំពីបញ្ហានេះ ហើយត្រូវបង្កើតក្រុមការងារ២៤ម៉ោង ដោយប្តូរវេនគ្នា ដើម្បីតាមដានការវិវត្តជំងឺនេះ តាមរាជធានី-ខេត្តរបស់ខ្លួន និងត្រូវចាត់វិធានការនានាតាមគោលការណ៍រដ្ឋាភិបាល និងក្រសួងសុខាភិបាល ព្រមទាំងត្រូវរាយការណ៍មកក្រសួងសុខាភិបាល និងក្រសួងមហាផ្ទៃជាប្រចាំជាដើម។
ប្រធានមជ្ឈមណ្ឌលអប់រំប្រជាពលរដ្ឋដើម្បីការអភិវឌ្ឍ និងសន្តិភាព លោក យង់ គីមអេង មានប្រសាសន៍ថាវិធានការរបស់រដ្ឋាភិបាលមានច្រើន ប៉ុន្តែ លោកចង់ឃើញវិធានការជាក់លាក់ដូចបណ្តាប្រទេសជាច្រើនកំពុងធ្វើ ដូចជា ពិចារណាដាក់បម្រាមម៉ឺងមាត់មិនឱ្យពលរដ្ឋដើរហើរដោយសេរីក្នុងស្ថានភាពនេះ បិទជើងយន្តហោះពីបណ្តាប្រទេសគោលដៅជំងឺនេះជាបណ្តោះអាសន្ន បិទកន្លែង ឬទីតាំងអាជីវកម្មមួយចំនួន ត្រួតពិនិត្យពលរដ្ឋចូលកម្ពុជា និងដាក់ពួកគេឱ្យនៅដាច់ដោយឡែកក្រោមការយកចិត្តទុកដាក់ខ្ពស់ពីរដ្ឋជាដើម។
លោកមានប្រសាសន៍ថា៖ «ដើម្បីកាត់បន្ថយរឿងកូវីដ-១៩ហ្នឹង ហើយគេ [ប្រទេសមួយចំនួន] ក៏ដើម្បីកំណត់ថា នរណាដែលមានរោគសញ្ញាប្រហាក់ប្រហែល ឬឆ្លង ដើម្បីគេប្រមូលមកព្យាបាល ឬដាក់នៅដាច់ដោយឡែកផ្សេងៗ គេបានអនុវត្តហើយ។ អីចឹង កម្ពុជា ចំពោះវិចារណាចំពោះជម្រើសអស់ហ្នឹងដែរ ដើម្បីធានាថា វានឹងមិនមានបញ្ហាហ្នឹងកើតឡើង»។
កាលពីថ្ងៃទី៧ ខែមីនា អង្គការសុខភាពពិភពលោកបានចេញសេចក្តីណែនាំមួយក្នុងការឆ្លើយតបទៅនឹងការរីករាលដាលនៃកូវីដ-១៩ក្នុងសហគមន៍ ដោយជំរុញដល់ប្រទេសទាំងអស់ឱ្យរៀបចំ និងឆ្លើយតប ដោយមានការចូលរួមពីគ្រប់ភាគីទាំងអស់ចាប់ពីផ្នែកសុខាភិបាល រហូតដល់ហិរញ្ញវត្ថុ និងពាណិជ្ជកម្មជាដើម។
សេចក្តីណែនាំនោះក៏ជំរុញឱ្យរដ្ឋនីមួយៗបង្កើតឱ្យមានប្រព័ន្ធឆ្លើយតបទៅនឹងបញ្ហានានាទាក់ទងនឹងវីរុស ជាពិសេសជំរុញដល់សាធារណជនឱ្យដឹងពីតួនាទីរបស់ពួកគេក្នុងការឆ្លើយតបទៅនឹងវីរុស ក្នុងនោះក៏មានការរៀបចំផែនការត្រៀមជាមុនចំពោះការរីករាលដាល ដូចជា ត្រៀមទីកន្លែង និងសម្ភារសម្រាប់ឆ្លើយតបពេលមានការឆ្លងកើតឡើងផងដែរ៕
