ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក ស ខេង បានលើកឡើងថា កម្ពុជាមិនទាន់មានវិធានការបង្ខាំងមនុស្សឱ្យនៅក្នុងផ្ទះទេ តែជំរុញដល់មន្ត្រីថ្នាក់ក្រោមជាតិបង្កើនការផ្សព្វផ្សាយឱ្យកាន់តែខ្លាំងពីជំងឺCovid-19។
ក្រោយពីពលរដ្ឋខ្មែរជាច្រើនគំហុកត្រលប់ពីប្រទេសថៃមកកម្ពុជាវិញកាលពីចុងសប្ដាហ៍មុន ចំពេលដែលមានក្ដីបារម្ភអំពីការរីករាលដាលនៃមេរោគកូរ៉ូណាថ្មី (Covid-19) នៅក្នុងចំណោមពលករទាំងនោះ។ របាយការណ៍របស់រដ្ឋាភិបាលឱ្យដឹងថា ពលរដ្ឋទាំងនោះ មានប្រមាណមួយម៉ឺនប្រាំពាន់នាក់បានត្រលប់ទៅផ្ទះរបស់ពួកគេវិញរៀងខ្លួននៅក្នុងប្រទេសកម្ពុជា។
អ្នកនាំពាក្យក្រសួងសុខាភិបាល អ្នកស្រី ឱ វណ្ណឌីន លើកឡើងក្នុងតេឡេក្រាមដោយសំណូមពរដល់ពលរដ្ឋខ្មែរទាំងនោះដាក់ខ្លួនឱ្យនៅដាច់ដោយឡែកចំនួន១៤ថ្ងៃសិន ដោយបារម្ភពីការចម្លង Covid-19។
លោកស្រីថា៖ «ខ្ញុំសូមអំពាវនាវ អំពាវនាវទៀត ខ្ញុំសុំលើកដៃសំពះដល់បងប្អូនជនរួមជាតិយើងទាំងអស់ ត្រូវតែរួបរួមគ្នាកាត់ផ្តាច់ឱ្យបាននូវការចម្លងពីបុគ្គលដែលមានវីរុសកូវីដ១៩ ទៅបុគ្គលផ្សេងទៀត ជាពិសេសអ្នកដែលនៅជិតស្និទ្ធ ឬក្រុមគ្រួសារ មិត្តភក្តិគាត់ជាដើម»។
ថ្លែងបន្ទាប់ពីជួបសំណេះសំណាលជាមួយមន្ត្រីនគរបាលអន្តោប្រវេសន៍ នៅអាកាសយានដ្ឋានអន្តរជាតិភ្នំពេញ នៅព្រឹកថ្ងៃទី២៤នេះ លោក ស ខេង បានថ្លែងថា កម្ពុជាគ្មានគោលការណ៍បង្ខំមនុស្សឱ្យនៅក្នុងផ្ទះនោះទេ តែលោកជំរុញដល់មន្ត្រីមូលដ្ឋានឱ្យចុះទៅផ្សព្វផ្សាយដល់ពលរដ្ឋឱ្យបានយល់ច្បាស់ពីបញ្ហានេះ។
លោកបន្ថែមថា៖ «ឥឡូវ យើងយកវិធានការដូចការឃោសនាបោះឆ្នោតអ៊ីចឹង ដាក់ម៉ូតូរួចហើយមានឧគ្ឃោសនាសព្ទអ៊ីចឹងទៅ ហើយទៅចាក់ផ្សាយឱ្យគាត់។ ចាក់ទៅ សួរគាត់ទៅ ថាគាត់យល់ ឬនៅ គាត់អាចធ្វើបានទេ? បើគាត់មិនយល់ ចាក់ទៀត! ហើយបើគាត់យល់ យើងទៅកន្លែងមួយផ្សេងទៀត»។
កាលពីថ្ងៃទី១៩ ខែមីនាកន្លងទៅ រដ្ឋមន្ត្រីក្រសួងមហាផ្ទៃបានចេញសេចក្តីណែនាំមួយ ដោយបញ្ជាទៅរដ្ឋបាលថ្នាក់ក្រោមជាតិឱ្យយកចិត្តទុកដាក់ខ្លាំងពីបញ្ហាជំងឺ Covid-19 មានការតាមដាន និងផ្សព្វផ្សាយស្ដីពីការបង្ការ ទប់ស្កាត់ការរាតត្បាតនៃជំងឺនេះផងដែរ។
ក្នុងសេចក្តីណែនាំនោះលើកឡើងថា៖ «ស្ពតវីដេអូ និងស្ពតវិទ្យុដែលមានទំហំតូច នឹងត្រូវផ្ដល់ជូនដល់រដ្ឋបាលថ្នាក់ក្រោមជាតិគ្រប់លំដាប់ថ្នាក់ ដើម្បីងាយស្រួលចែកចាយ និងផ្សព្វផ្សាយដល់ពលរដ្ឋគ្រប់រូប តាមរយៈប្រព័ន្ធបណ្ដាញសង្គម ទូរសព្ទដៃ តេឡេក្រាម ឧបករណ៍ឧគ្ឃោសនាសព្ទ និងតាមបណ្ដាញទំនាក់ទំនងផ្សេងៗទៀតតាមដែលអាចធ្វើទៅបាន»។
អ្នកស្រាវជ្រាវពីការអភិវឌ្ឍសង្គម លោកបណ្ឌិត ប៉ា ចន្ទរឿន មានប្រសាសន៍ថា ការឆ្លើយតបរបស់រដ្ឋាភិបាលចំពោះការសម្រុកចូលរបស់ពលរដ្ឋពីក្រៅប្រទេស ហាក់បីដូចជាយឺតពេលបន្ដិច ខណៈលោកក៏បានបង្ហាញក្ដីបារម្ភផងដែរពីការជួបជុំរបស់ពលរដ្ឋទាំងនោះជាមួយក្រុមគ្រួសារ និងមិត្តភក្តិរបស់ពួកគេ។
លោក ប៉ា ច័ន្ទរឿន គាំទ្រចំពោះចំណាត់ការរបស់រដ្ឋាភិបាលនេះ ដោយថា មានតែការពន្យល់ឱ្យពលរដ្ឋយល់ទេទើបអាចទាញបញ្ហាដែលកំពុងប្រឈមឱ្យមានភាពល្អប្រសើរបាន ខណៈលោកមិនគាំទ្រចំពោះវិធានការរដ្ឋបាល ឬច្បាប់ក្នុងដំណាក់កាលនេះឡើយ។
លោកបន្ថែមថា៖ «វិធីដែលល្អគឺឱ្យពួកគាត់នៅដាច់ពីគេរយៈពេល១៤ថ្ងៃ ចំពោះវិធានការរដ្ឋបាល ឬក៏វិធានការយោធាដូចនៅប្រទេសមួយចំនួន ដែលប្រើនូវច្បាប់អាជ្ញាសឹកក្នុងការដាក់ទោសទណ្ឌពលរដ្ឋដែលផ្ទុក ឬក៏សង្ស័យដែលមានវីរុសហ្នឹង ខ្ញុំមើលអត់ទាន់ដល់ស្ថានភាពហ្នឹងទេ។ តែជាការការពារនៅតាមព្រំដែន គួរតែមានកងកម្លាំង សមត្ថកិច្ចទៅជួយ ដើម្បីជួយសម្រួលទាំងចរាចរណ៍ ទាំងសណ្ដាប់ធ្នាប់។ […] ព្រោះខ្ញុំមើលឃើញថា ប្រជាពលរដ្ឋដែលគាត់ចូលមកហ្នឹងធ្វើដំណើរប្រសេចប្រសាចដូចជាគ្មានសណ្ដាប់ធ្នាប់ ហើយសកម្មភាពដែលគាត់ធ្វើដំណើរ បើមើលពីហានិភ័យនៃការឆ្លង Covid-19 ហ្នឹងគឺពួកគាត់ងាយនឹងរងគ្រោះណាស់»។
គិតត្រឹមថ្ងៃ២៣ ខែមីនា កម្ពុជារកឃើញអ្នកផ្ទុក Covid-19 ចំនួន៨៧នាក់ហើយ ក្នុងនោះមានជនជាតិខ្មែរ៣៥នាក់។ នាយកដ្ឋានប្រយុទ្ធនឹងជំងឺឆ្លង CDC បានលើកឡើងថា បើទោះបីការរកឃើញនេះមិនទាន់មានភស្តុតាងណាមួយបង្ហាញថា មានការចម្លងក្នុងសហគមន៍ តែលទ្ធភាពនៃការឆ្លងក្នុងសហគមន៍គឺនៅតែអាចកើតមានឡើង៕