ប្រទេសជប៉ុនបានផ្ដល់ជំនួយអភិវឌ្ឍន៍ផ្លូវការចំនួន ៣៤,១៣៨លានយ៉េន ស្មើនឹងប្រមាណ ៣១០លានដុល្លារអាមេរិក ដើម្បីអនុវត្តកិច្ចការមនុស្សធម៌ និងគម្រោងអភិវឌ្ឍន៍ចំនួន៥នៅកម្ពុជា។
លោកនាយករដ្ឋមន្ត្រី ហ៊ុន សែន បានឱ្យដឹងនៅលើហ្វេសប៊ុកលោកថា នៅព្រឹកនេះ ប្រទេសជប៉ុនតាមរយៈឯកអគ្គរាជទូតរបស់ខ្លួនប្រចាំកម្ពុជា បានសម្រេចផ្ដល់ជំនួយឥតសំណង ដើម្បីរៀបចំគម្រោងអភិវឌ្ឍន៍ទឹកស្អាតក្នុងក្រុងតាខ្មៅ ខេត្តកណ្ដាល ប្រមាណ ៣១លានដុល្លារ គម្រោងបោសសម្អាតមីន និងសង្គ្រោះជនពិការដោយសារមីនប្រមាណ ៩លានដុល្លារ និងគម្រោងអភិវឌ្ឍន៍សេដ្ឋកិច្ច និងសង្គម ប្រមាណជាង ២,៧លានដុល្លារ។
ក្រៅពីនេះ ក៏មានឥណទានមានសំណង ដើម្បីអភិវឌ្ឍន៍ផ្លូវជាតិលេខ៥ ដំណាក់កាលទី២ និងទី៣ ដែលមានតម្លៃប្រមាណ ២៦៧លានដុល្លារអាមេរិកផងដែរ។
លោកនាយករដ្ឋមន្ត្រីបានកត់សម្គាល់ថា៖ «ហិរញ្ញប្បទានឥតសំណង និងឥណទានសម្បទាន ដែលផ្តល់ដោយរដ្ឋាភិបាលជប៉ុននេះ នឹងជួយលើកកម្ពស់បន្ថែមទៀតនូវការអភិវឌ្ឍសេដ្ឋកិច្ច និងសង្គម នៃព្រះរាជាណាចក្រកម្ពុជា ហើយព្រមទាំងពង្រឹងទំនាក់ទំនងមិត្តភាព និងកិច្ចសហប្រតិបត្តិការ រវាងប្រជាជាតិទាំងពីរផងដែរ»។
យោងតាមរបាយការណ៍បំណុលកម្ពុជា គិតត្រឹមខែមិថុនា ឆ្នាំ២០១៩ កម្ពុជាជំពាក់បំណុលបរទេសសរុបប្រមាណ ៧ពាន២រយលានដុល្លារ ក្នុងនោះជំពាក់ជប៉ុនប្រមាណ ៣៩០លានដុល្លារ ដែលស្មើរនឹង៥,៣៨ភាគរយនៃបំណុលសរុប៕