សមាគមរោងចក្រកាត់ដេរនៅកម្ពុជា ហៅកាត់ថា GMAC បានអំពាវនាវដល់គ្រប់អ្នកបញ្ជាទិញទំនិញពីកម្ពុជាក្នុងវិស័យឧស្សាហកម្មវាយនភណ្ឌថា មិនត្រូវបោះបង់ចោលកម្ពុជាក្នុងស្ថានភាពសកលលោកកំពុងមានវិបត្តិដោយសារជំងឺកូវីដ១៩ ឬ កូរ៉ូណានោះទេ។
ក្នុងលិខិតអំពាវនាវមួយនៅថ្ងៃអង្គារនេះ GMAC បានលើកឡើងថា ក្នុងដំណាក់កាលនៃការឆ្លងរីករាលដាលនៃជំងឺកូវីដ១៩ បានធ្វើឱ្យមានភាពចលាចលដល់ជីវិតរស់នៅ និងអាជីវកម្មរបស់យើងគ្រប់គ្នា។ GMAC បន្តថា ដើម្បីជម្នះនូវឧបសគ្គដ៏លំបាកនាពេលនេះ ភាគីពាក់ព័ន្ធទាំងអស់ត្រូវរួមដៃគ្នាដើម្បីយើងទាំងអស់គ្នាអាចបន្តរស់បាន។
សមាគមរោងចក្រកាត់ដេរនៅកម្ពុជា ក៏បានអំពាវនាវដល់អ្នកបញ្ជាទិញទាំងអស់ សូមកុំបោះបង់កម្ពុជា ដោយត្រូវបញ្ជាទិញទំនិញតាមអ្វីដែលបានព្រមព្រៀងគ្នា ទូទាត់ប្រាក់តាមលក្ខខណ្ឌធម្មតា ដើម្បីឱ្យភាគីរោងចក្រមានលទ្ធភាពបើកប្រាក់ឈ្នួលជូនកម្មករ និងអាចបន្តការងាររបស់ពួកគេទៅមុខទៀតបាន។
GMAC សរសេរថា៖ «ចំពោះអ្នកបញ្ជាទិញទាំងអស់៖ សូមកុំបោះបង់កម្ពុជា! សមាគមសូមជំរុញអ្នកបញ្ជាទិញបំពេញកាតព្វកិច្ចរបស់ខ្លួនតាមកិច្ចសន្យាដែលបានចុះរួចហើយ ដោយទទួលយកការដឹកទំនិញដែលបានផលិតរួចហើយ និងទំនិញដែលបច្ចុប្បន្នកំពុងផលិត និងទូទាត់ប្រាក់តាមលក្ខខណ្ឌធម្មតា។ ការធ្វើបែបនេះ នឹងអាចធ្វើឱ្យរោងចក្រមានលទ្ធភាពបើកប្រាក់ឈ្នួលជូនកម្មករ និងបន្តការងាររបស់ពួកគេ»។
ប្រភពដដែលលើកឡើងថា សម្រាប់ភាគីរោងចក្រវិញ ត្រូវគិតអំពីសុវត្ថិភាពកម្មករនិយោជិតជាចម្បង ពិសេសយកចិត្តទុកដាក់បញ្ហាអនាម័យកម្រិតខ្ពស់ ដែលជាវិធានការនៅកន្លែងការងារ ដើម្បីការពារកម្មករនិយោជិត និងជួយបង្ការពីការរីករាលដាលនៃជំងឺកូវីដ១៩ ហើយកម្មករ ព្រមទាំងសហជីពក៏ត្រូវចូលរួមអនុវត្តវិធានការដែលរដ្ឋបានដាក់ចេញ ដោយត្រូវធ្វើជាផ្នែកមួយនៃដំណោះស្រាយ។
កាលពីថ្ងៃទី២០ ខែមីនា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បញ្ជាក់ថា គិតមកដល់ថ្ងៃទី២០ ខែមីនា មានរោងចក្រចំនួន ៥៤ បានដាក់សំណើសុំព្យួរការងារ និងប៉ះពាល់កម្មករជិត៣ម៉ឺននាក់។ កាលពីមុន លោក ហេង សួរ បញ្ជាក់ថា វិបត្តិជំងឺកូរ៉ូណានឹងធ្វើឱ្យរោងចក្រប្រមាណ ២០០ រងផលប៉ះពាល់ ហើយនឹងប៉ះពាល់ដល់ការងារកម្មករប្រមាណ ១៦ម៉ឺននាក់។
ទិន្នន័យក្រសួងពាណិជ្ជកម្មកាលពីខែកុម្ភៈ ឱ្យដឹងថា គិតត្រឹមពាក់កណ្ដាលឆ្នាំ២០១៩ កម្ពុជាមានរោងចក្រសរុបប្រមាណជាង ១៥០០រោងចក្រនៅទូទាំងប្រទេស ដោយផ្ដល់ការងារដល់កម្មករជាង ៨០ម៉ឺននាក់ ដែលភាគច្រើនលើសលប់ជាស្ត្រី៕
