អតីតប្រធានគណបក្សសង្រ្គោះជាតិ លោក កឹម សុខា បានចូលរួមថវិកាទៅរដ្ឋាភិបាលចំនួន ៥០០០ដុល្លារសហរដ្ឋអាមេរិក ដើម្បីឧបត្ថម្ភដល់ការងារទប់ស្កាត់ ឬបង្ការជំងឺកូវីដ១៩ ក្នុងស្ថានភាពបច្ចុប្បន្ន។
នៅលើទំព័រហ្វេសប៊ុករបស់ខ្លួននៅថ្ងៃនេះ លោក កឹម សុខា បញ្ជាក់ថា ថវិកាចំនួន៥ពាន់ដុល្លារនោះ ជាថវិការបស់បងប្អូនខ្មែរនៅក្រៅប្រទេស ដែលមានចិត្តសប្បុរសធម៌ធ្វើវិភាគទានថវិកាផ្ទាល់ខ្លួនតាមរយៈលោក ដើម្បីចូលរួមប្រយុទ្ធប្រឆាំងនឹងការរីករាលដាលជំងឺ Covid-19 នៅក្នុងប្រទេសកម្ពុជាបច្ចុប្បន្ន។
លោកបញ្ជាក់ថា នៅព្រឹកមិញនេះ លោកបានប្រគល់ថវិកាសប្បុរសធម៌ទាំងនោះ ជូនទៅគណៈកម្មការជាតិប្រយុទ្ធនឹងជំងឺកូវីដ-១៩រួចហើយ។
លោក កឹម សុខា ក្រៅពីថ្លែងអំណរគុណដល់សប្បុរសជនទាំងនោះហើយ លោកក៏សូមកោតសរសើរនូវសន្តានចិត្តចែករំលែក អាណិត ស្រឡាញ់ខ្មែរដូចគ្នាក្នុងគ្រាអាសន្ននេះ ទោះបីបងប្អូនក៏កំពុងជួបការលំបាករៀងៗខ្លួនពេលនេះក៏ដោយ។
ហ្វេសប៊ុកលោក កឹម សុខា សរសេរថា៖ «សូមកុសលផលបុណ្យដោយទឹកចិត្តសប្បុរសធម៌របស់បងប្អូននេះ សូមឱ្យបងប្អូនទទួលបាននូវសេចក្ដីសុខចំរើន ចៀសផុតទុក្ខទាំងឡាយ ជាពិសេសសូមកុំឱ្យមានជំងឺឈឺថ្កាត់ណាមកបៀតបៀនបងប្អូន និងក្រុមគ្រួសារបានឡើយ»។
កាលពីថ្ងៃម្សិលមិញ អតីតមេដឹកនាំគណបក្សសង្គ្រោះជាតិរូបនេះ បានអំពាវនាវឱ្យមានឯកភាពជាតិ សាមគ្គីជាតិ និងអន្តរជាតិ ដោយលោកចាត់ទុកថា សាមគ្គីជាតិ និងអន្តរជាតិ ជាការចំបាច់ក្នុងការប្រយុទ្ធប្រឆាំងនឹងការរីករាលដាលនៃជំងឺរលាកផ្លូវដង្ហើមថ្មី ឬហៅថា កូវីដ-១៩ ត្បិតបញ្ហានេះមិនមែនជារឿងបុគ្គលណា សហគមន៍ណា ប្រទេសណាមួយ ប៉ុន្តែ វាជាវិបត្តិសកលលោកទាំងមូល។
កាលពីយប់មិញ ក្រសួងសុខាភិបាលឱ្យដឹងថា កម្ពុជាបានរកឃើញអ្នកផ្ទុកមេរោគកូវីដ-១៩ ចំនួន៨៧នាក់ហើយ ក្នុងនោះមានទាំងជនបរទេស ដែលមកលេងកម្ពុជា ពលរដ្ឋខ្មែរឥស្លាមទើបមកពីចូលរួមប្រារព្ធពិធីសាសនានៅម៉ាឡេស៊ី និងពលរដ្ឋខ្មែរផងដែរ។
កាលពីសប្តាហ៍មុន រដ្ឋាភិបាលប្រកាសទទួលជំនួយ ឬថវិកាពីសប្បុរសជនតាមរយៈមន្ត្រីរបស់ខ្លួន ដើម្បីយកមកបម្រើក្នុងបុព្វហេតុជួយទប់ស្កាត់ជំងឺកូរ៉ូណា ក្នុងស្ថានភាពលំបាកនេះ និងការពារជីវិតរបស់ពលរដ្ឋកម្ពុជាផង៕