អាជ្ញាធរអប្សរា រកឃើញសំណង់ឈើដែលមានអាយុកាលជិត ១ពាន់ឆ្នាំ នៅចំកណ្ដាលស្រះខាងជើងនៃប្រាសាទអង្គរវត្ត។
អាជ្ញាធរអប្សរានៅព្រឹកនេះ បានបង្ហាញការរកឃើញថ្មីរបស់ខ្លួននៅពេលស្ដារស្រះទឹកខាងជើងនៃប្រាសាទអង្គរវត្ត ដោយបានរកឃើញសំណង់ឈើ ដែលមានបញ្ចុះព្រះគណេសនៃលិទ្ធិព្រហ្មញ្ញសាសនានៅក្នុងសំណង់នេះផងដែរ។
អ្នកគ្រប់គ្រងគម្រោងស្ដារស្រះទឹកខាងជើងអង្គរវត្ត លោក ស្រ៊ុន តិច មានប្រសាសន៍ថា សំណង់ឈើនេះមាន ឈើដោតចំកណ្ដាល មានធ្នឹមពីរនៅពីក្រោម ដែលក្រាលពីក្រោមដោយថ្មបាយក្រៀមនៅខាងក្រោមសំណង់ផងដែរ។
លោក ស្រ៊ុន តិច៖ «រហូតមកដល់សព្វថ្ងៃនេះ យើងអត់ទាន់បានយល់អ្វីទាំងអស់ពីរចនាសម្ព័ន្ធរូបរាងស្ថាបត្យកម្មនៃសំណង់នៅក្នុង ហើយបំណងនៃសំណង់ឈើដែលបានកប់ក្នុងដីនៅឡើយទេ»។
ប្រធាននាយកដ្ឋានអភិរក្សប្រាសាទក្នុងឧទ្យានអង្គរ លោក អ៊ឹម សុខរិទ្ធី មានប្រសាសន៍ថា សំណង់ឈើនេះនៅមានសភាពល្អ បើទោះបីវាមានអាយុកាលជិត១ពាន់ឆ្នាំទៅហើយក្ដី។ លោកបានពន្យល់ថា សំណង់នេះអាចត្រូវបានកប់ឡើងដោយចេតនាជាមួយរូបសំណាក់ព្រះគណេស ដើម្បីធ្វើឱ្យទីតាំងស្រះក្លាយជាកន្លែងស័ក្តិសិទ្ធិ។
លោកបន្ថែមថា នេះជាលើកទីមួយហើយនៅក្នុងតំបន់អង្គរ ដែលរកឃើញសំណង់ឈើកប់ក្នុងដី និងមានរូបព្រះគណេសនៅខាងក្នុងបែបនេះ។
លោក អ៊ឹម សុខរិទ្ធី៖ «បដិមាព្រះគណេស យើងដឹងជាទូទៅថាជាទេពនៃបញ្ញាញាណ ទេពនៃចំណេះដឹង ទេពនៃក្ដីជ្រះថ្លា ប៉ុន្ដែ មួយទៀតជាទេពទាក់ទងនឹងមន្តអាគមនៃការឈ្នះមាសត្រូវទាំងអស់។ ប្រហែលដោយសាររឿងបែបហ្នឹង បានជាគេយកមកតម្កល់ដោយចេតនា»។
លោកបន្ថែមថា ជាមួយនឹងការរកឃើញថ្មីនេះ ការធ្វើកំណាយនៅស្រះទឹកអង្គរ ក៏មានភស្ភុតាងថ្មីបញ្ជាក់ថាអង្គរវត្តគឺមិនធ្លាប់ត្រូវបានជនជាតិខ្មែរបោះបង់ចោលម្ដងណាឡើយ។
កាលពីខែឧសភា ឆ្នាំ២០១៩ អាជ្ញាធរអប្សរាសម្រេចបង្ខះទឹកនៅកសិណខាងជើងប្រាសាទអង្គរវត្ត ដើម្បីធ្វើកំណាយស្រាវជ្រាវបុរាណវិទ្យា ក៏ដូចជាស្ដារទឹកស្រះនេះផងដែរ។
បើតាមមន្ត្រីជំនាញ ក្នុងរយៈពេល៨០០ឆ្នាំ កំណកដីនៅក្នុងស្រះទឹកខាងជើងប្រាសាទអង្គរវត្ត មានកម្រាស់ពី២ម៉ែត្រ៦០សង់ទីម៉ែត្រ ដល់៣ម៉ែត្រ ដែលត្រូវទាមទារឱ្យមានការយកចិត្តទុកដាក់ខ្ពស់ក្នុងការធ្វើកំណាយ៕