រដ្ឋាភិបាលកម្ពុជាសម្រេចបើកតំបន់សម្បទានស្វែងរករ៉ែក្នុងខេត្តចំនួន៣ ដែលមានទំហំជិត៨០០គីឡូម៉ែត្រក្រឡា ស្ថិតនៅក្នុងខេត្តព្រះវិហារ ខេត្តមណ្ឌលគិរី និងខេត្តឧត្តរមានជ័យ។
ក្នុងសេចក្តីជូនដំណឹងចុះថ្ងៃទី២៣ ខែមីនា ក្រសួងរ៉ែ និងថាមពល បានប្រកាសឱ្យក្រុមហ៊ុនជាតិ និងអន្តរជាតិដែលមានបំណងរុករករ៉ែនៅកម្ពុជា ដាក់ពាក្យប្រកួតប្រជែងសម្រាប់ទទួលបានអាជ្ញាបណ្ណស្វែងរករ៉ែចំនួន៤កន្លែង ដែលមាននៅតំបន់ត្រពាំងទៀម ស្រុកត្រពាំងប្រាសាទ ខេត្តឧត្តរមានជ័យ ទំហំ ២០០គីឡូម៉ែត្រក្រឡា តំបន់ទំនប់ដាច់ ស្រុកត្រពាំងប្រាសាទ ខេត្តឧត្តរមានជ័យ និងស្រុកជាំក្សាន្ត ខេត្តព្រះវិហារ ទំហំ ១៩៤គីឡូម៉ែត្រក្រឡា និងតំបន់ព្រែកគៀង និងអន្រ្ទង ស្រុកពេជ្រាដា ខេត្តមណ្ឌលគិរី ទំហំ ៤០០គីឡូម៉ែត្រក្រឡា(២តំបន់)។
ក្នុងលិខិតនោះបញ្ជាក់ថា៖ «ពាក្យស្នើសុំអាជ្ញាបណ្ណស្វែងរុករករ៉ែ ដែលបានបំពេញរួចរាល់ ត្រូវភ្ជាប់មកជាមួយនូវឯកសារ និងរបាយការណ៍តម្រូវពាក់ព័ន្ធ ហើយដាក់ក្នុងស្រោមសំបុត្របិទជិតដោយការខ្នង “ឯកសារស្នើសុំប្រកួតប្រជែង” រួចប្រគល់ជូន ការិយាល័យច្រកចេញចូលតែមួយ របស់ក្រសួងរ៉ែ និងថាមពល យ៉ាងយូរបំផុតត្រឹមថ្ងៃទី២០ ខែមេសា ឆ្នាំ២០២០ វេលាម៉ោង ១៧ និង០០នាទី»។
អគ្គនាយកនៃអគ្គនាយកដ្ឋានរ៉ែ លោក យស់ មុនីរ៉ាត់ មានប្រសាសន៍ប្រាប់VOD ថា ទីតាំងរ៉ែទាំង៤ទីតាំងនោះ សម្រាប់ខេត្តមណ្ឌលគិរី មានតំរុយរ៉ែមាស ខណៈនៅខេត្តឧត្តរមានជ័យ និងព្រះវិហារ មានតំរុយរ៉ែទង់ដែង ដែលលោកសង្ឃឹមថា ការបើកឱ្យរុករកនេះ នឹងអាចធ្វើឱ្យកម្ពុជារកឃើញពីសក្តានុពលនៃធនធានរ៉ែរបស់ខ្លួនកាន់តែច្រើនបន្ថែមទៀត។
លោកថា៖ «វិស័យរ៉ែវាពិបាកដែរ គឺក្នុងគម្រោងសិក្សាស្រាវជ្រាវ១០០ ជោគជ័យដែលធ្វើអាជីវកម្មបានមានតែ១ ឬ១កន្លះអីហ្នឹង ច្រើនបំផុតហើយ។ ដូច្នេះ ការសិក្សាស្រាវជ្រាវនៅក្នុងដី វាពិបាករកឃើញ។ […] តែទោះជាយ៉ាងណា ក៏យើងមានការរំពឹង តែមិនមែនការទៅរករបស់យើងគឺទៅរកទាំងប្រថុយទេ។ ទាល់តែយើងមានរចនាសម្ព័ន្ធភូគុព្ភសាស្ត្រហ្នឹង វាមានរចនាសម្ព័ន្ធយ៉ាងម៉េចដែលមានកំណកំណើតរ៉ែហ្នឹង»។
បើតាមក្រសួងរ៉ែ និងថាមពល បច្ចុប្បន្ន មានក្រុមហ៊ុនរុករករ៉ែជាង៣០ក្រុមហ៊ុនរួចទៅហើយ កំពុងរុករករ៉ែក្នុងប្រទេសកម្ពុជា ដែលមានក្នុងខេត្តកំពង់ស្ពឺ ក្រចេះ មណ្ឌលគិរី រតនគិរី ស្ទឹងត្រែង ព្រះវិហារ និងខេត្តឧត្តរមានជ័យ។
សកម្មជនចលនាមាតាធម្មជាតិ អ្នកនាង លឹម គឹមស័រ មានប្រសាសន៍ថា ការរុករករ៉ែបច្ចុប្បន្នគឺមានច្រើនរួចទៅហើយ ខណៈអ្នកនាងមានក្ដីបារម្ភពីការប៉ះពាល់ដល់ដីធ្លីរបស់ប្រជាពលរដ្ឋដែលកើតចេញពីការរុករករ៉ែនេះផងដែរ។
អ្នកនាងមិនមានជំនឿថា ការរុករករ៉ែនេះនឹងផ្ដល់ប្រយោជន៍ដល់ប្រទេសជាតិបានច្រើននោះទេ។
អ្នកនាង លឹម គឹមស័រ៖ «វាទាល់តែគាត់ទៅសិក្សាពីផលប៉ះពាល់ដល់ប្រជាពលរដ្ឋសិន ថាប្រជាពលរដ្ឋនៅតំបន់ហ្នឹងគាត់អាចទទួលបានអីពីការរុករកនេះ។ ជារួម សម្រាប់ប្រទេសយើង បើសិនជានៅតែមានអំពើពុករលួយ ច្បាប់វិនិយោគគាត់នៅតែអត់អនុវត្តឱ្យបានខ្ជាប់ខ្ជួនទេ ខ្ញុំគិតថា វាអត់មានផលចំណេញអីសម្រាប់ប្រជាជនខ្មែរយើង វាចំណេញតែក្រុមហ៊ុន និងអ្នកធ្វើការងារខាងហ្នឹងតែប៉ុន្មាននាក់ទេ»។
ការបើកឱ្យរុករករ៉ែនេះគឺជាការបើកឱ្យរុករកលើកទីពីរហើយនៅឆ្នាំ២០២០នេះ បន្ទាប់ពីរដ្ឋាភិបាលសម្រេចបើកឱ្យរុករកលើទីតាំងចំនួន៨កន្លែង កាលពីខែមករាកន្លងទៅ ក្នុងខេត្តស្ទឹងត្រែង ព្រះវិហារ សៀមរាប និងខេត្តមណ្ឌលគិរី ដែលមានផ្ទៃក្រឡារុករកសរុបជាង១ពាន់គីឡូម៉ែត្រក្រឡា៕
