លោកនាយករដ្ឋមន្ត្រី ហ៊ុន សែន បានអះអាងថា រដ្ឋាភិបាលកំពុងសិក្សាផ្លូវច្បាប់ ដើម្បីឈានទៅរឹបអូសយកម៉ាស់ និងបិទអាជីវកម្មម្ចាស់ហាង ឬឱសថស្ថានទាំងឡាយណាដែលលក់ម៉ាស់ឱ្យពលរដ្ឋថ្លៃ ខណៈតម្រូវការម៉ាស់ និងសម្ភារដើម្បីការពារជំងឺកូវីដ១៩ នាពេលបច្ចុប្បន្នមានការកើនឡើងខ្ពស់។
ថ្លែងក្នុងពិធីជួបសំណេះសំណាលជាមួយគ្រូពេទ្យ ស្ម័គ្រចិត្តជាង៤០០នាក់នៅទីស្តីការគណៈរដ្ឋមន្ត្រីនាព្រឹកថ្ងៃពុធនេះ លោក ហ៊ុន សែន មានប្រសាសន៍ថា ប្រសិនបើម្ចាស់អាវីកម្ម ឬឱសថស្ថានទាំងឡាយណាបន្តលក់ម៉ាស់ឱ្យពលរដ្ឋក្នុងតម្លៃខ្ពស់បន្តទៀត លោកនឹងបញ្ជាឱ្យមានការរឹបអូសម៉ាស់ និងបិទកន្លែងនោះចោល ព្រមទាំងមិនអនុញ្ញាតឱ្យរកស៊ីអស់មួយជីវិតតែម្តង ។
លោកមានប្រសាសន៍ថា៖ «ខ្ញុំកំពុងសិក្សាពិនិត្យមើលអំពីផ្លូវច្បាប់ បើអ្នកឯងនៅតែបន្តលក់ម៉ាស់ឡើងថ្លៃ ទៅរឹបអូសយកតែម្តង ដាក់បញ្ជាទៅរឹបអូសយកតែម្តង។ កុំឱ្យវារកស៊ីតទៅទៀត ឱ្យបិទអាឱសថស្ថានហ្នឹងចោលតែម្តង។ សុំទម្លាក់ថ្លៃទាន់ពេលរាជរដ្ឋាភិបាលប្រើកណ្តាប់ដៃដែក។ បិទលើកនេះមិនត្រឹមតែដកម៉ាស់ទេ គឺដកមិនឱ្យអ្នកឯងរកស៊ីមួយជីវិត ដើម្បីឱ្យរាងចាល។ ឥលូវ ក្រសួងសុខាភិបាលពិនិត្យមើលមានប៉ុន្មាន ប្រជាពលរដ្ឋរាយការណ៍មានប៉ុន្មានឱសថស្ថាន គឺថាបិទ ហើយបិទមួយជីវិត មិនឱ្យរកស៊ីអាហ្នឹងទៀត។ និយាយគ្នាមិនស្តាប់ ឆ្លៀតយកចំណេញហ្អេស»។
ការប្រកាសនេះ បន្ទាប់ពីលោកនាយករដ្ឋមន្ត្រី បានណែនាំដល់មន្ត្រីគណបក្សប្រជាជនកម្ពុជាដែលចុះមូលដ្ឋានទាំងអស់ត្រូវជួយទិញក្រមា និងម៉ាស់ ចែកជូនពលរដ្ឋដើម្បីការពារជំងឺកូវីដ១៩ ដោយត្រូវចែកជូនពួកគេដល់គេហដ្ឋានតែម្តង។
បើតាមលោកនាយករដ្ឋមន្ត្រី បញ្ជាក់ថា គិតមកដល់ថ្ងៃទី២៥ ខែមីនានេះ កម្ពុជាបានរកឃើញអ្នកមានជំងឺកូវីត១៩ ចំនួន ៩៣នាក់ហើយ ដោយក្នុងនោះមានអ្នកជំងឺចំនួន ៤នាក់ គឺជនជាតិចិនម្នាក់ អង់គ្លេសម្នាក់ និងខ្មែរពីរនាក់ ត្រូវបានព្យាបាលឱ្យជាសះស្បើយរួចរាល់ហើយ៕