អ្នកជំនាញកិច្ចការអន្តរជាតិ មើលឃើញថា ភាគីថៃ បានដើរប្រាសចាកពីគោលការណ៍សុខភាពជាសកល និងគោលការណ៍មនុស្សធម៌ ក្រោយពេលប្រទេសនេះប្រកាសបិទព្រំដែន ប៉ុន្តែ បណ្តោយឱ្យអ្នកជំងឺកូវីដ១៩មកកាន់កម្ពុជា។
ការលើកឡើងនេះ ក្រោយពេលក្រសួងសុខាភិបាលកម្ពុជា អះអាងនៅយប់មិញថា ជនជាតិឥណ្ឌូនេស៊ី២នាក់ដែលមានជំងឺកូវីដ-១៩ បានធ្វើដំណើរពីប្រទេសថៃ បន្ទាប់ពីរកឃើញមានជំងឺនេះនៅមន្ទីរពេទ្យមួយក្នុងក្រុងបាងកក ដោយសារលឺថា ប្រទេសកម្ពុជាព្យាបាលដោយមិនគិតថ្លៃ។
អ្នកវិភាគនយោបាយ និងទំនាក់ទំនងអន្តរជាតិ លោក ឯម សុវណ្ណរ៉ា មានប្រសាសន៍ថា ស្របពេលថៃខ្លួនឯងប្រកាសបិទព្រំដែនជាមួយកម្ពុជា ប៉ុន្តែ បែរជាអនុញ្ញាតឱ្យបុរសឥណ្ឌូនេស៊ីមានផ្ទុកកូវីដ១៩ មកកម្ពុជា បង្ហាញពីភាពអាត្មានិយមរបស់ថៃ បាត់បង់គោលការណ៍មនុស្សធម៌ ធ្វើឱ្យទំនាក់ទំនងក្នុងតំបន់កាន់តែផុយស្រួយ។
លោកបន្តថា ទាំងថៃ និងវៀតណាម កំពុងដើរផ្ទុយពីគោលការណ៍អាស៊ាន និងគោលការណ៍អង្គការសុខភាពពិភពលោក (WHO) ត្បិតជាគោលការណ៍រួម កាលណារកឃើញអ្នកឆ្លង ឬសង្ស័យមានជំងឺនេះកន្លែងណា ត្រូវព្យាបាលកន្លែងនោះ។
សេចក្តីប្រកាសព័ត៌មានរបស់ក្រសួងសុខាភិបាលនៅយប់មិញនេះ ក្រសួងបញ្ជាក់ថា ជនជាតិឥណ្ឌូនេស៊ីទាំង២នាក់នោះបានពិនិត្យឃើញវិជ្ជមានកូវីដ-១៩ នៅមន្ទីរពេទ្យផាយ៉ាថៃ ក្នុងទីក្រុងបាងកក ប្រទេសថៃ ដោយពុំមានលទ្ធភាពបង់ថ្លៃព្យាបាល ទើបពួកគេសម្រេចចិត្តធ្វើដំណើរមកកម្ពុជា ហើយកម្ពុជាបានរក្សាពួកគេនៅមន្ទីរពេទ្យបង្អែកខេត្តសៀមរាប។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន មានប្រសាសន៍បន្ថែមប្រាប់ក្រុមអ្នកកាសែតថា ជនជាតិឥណ្ឌូនេស៊ីទាំងពីរនាក់នោះ មកកម្ពុជា ព្រោះដឹងថា កម្ពុជាព្យាបាលជំងឺនេះដល់ជនបរទេសលើជំងឺនេះមិនយកប្រាក់ឡើយ។
លោកស្រី បញ្ជាក់ថា នៅពេលដែលធ្វើដំណើរឆ្លងកាត់ព្រំដែនកម្ពុជា ជនជាតិឥណ្ឌូនេស៊ី២នាក់នោះពុំមានរោគសញ្ញា ឬអាការឡើងកម្តៅអ្វីនោះទេ ហើយការធ្វើដំណើរពីប៉ោយប៉ែតមកសៀមរាប មានតែអ្នកបើកបររថយន្តឈ្នួលម្នាក់ប៉ុណ្ណោះ ស្និទ្ធនឹងជនជាតិឥណ្ឌូនេស៊ីនោះ។
លោកស្រីបន្តថា៖ «ពាក់ព័ន្ធមនុស្សដែលប្រាស័្រយទាក់ទងជាមួយគាត់ [ជនជាតិឥណ្ឌូនេស៊ី២នាក់] ហ្នឹង គឺមិនមានច្រើនទេ ដោយសារពួកគាត់ចេញមកហ្នឹង ក្រុមគ្រូពេទ្យយើងហ្នឹងឆែកឆេរទៅ ហើយគាត់ជិះតាក់ស៊ី ហើយម៉ៅ ហើយជិះតែគ្នាគាត់ អត់មាននរណានៅក្នុងឡានជាមួយគាត់ទេ។ អីចឹង បច្ចុប្បន្ន អ្នកបើកបរតាក់ស៊ីហ្នឹង យើងក៏បានរកឃើញហើយ ហើយក៏បានធ្វើតេស្តគាត់ដែរ ហើយកំពុងរង់ចាំលទ្ធផល»។
កាលពីថ្ងៃពុធ លោកនាយករដ្ឋមន្ត្រី ហ៊ុន សែន ប្រកាសថា ប្រសិនបើជនបរទេសទាំងឡាយណាដែលរកឃើញមានជំងឺកូវីដ១៩ នៅកម្ពុជា នឹងទទួលបានការព្យាបាលដោយឥតបង់ប្រាក់ ព្រមទាំងត្រូវយកចិត្តទុកដាក់ខ្ពស់ក្នុងការមើលថែទាំ។ លោកថា កម្ពុជាជាប្រទេសតូចតែបេះដូងធំ ហើយយន្តការនេះខុសស្រឡះពីវៀតណាម។
លោកមានប្រសាសន៍ថា៖ «ប៉ុន្តែ ខ្ញុំសូមប្រកាសថា យើងក្រ តែយើងចិត្តធំ។ អ្នកណាកើតជំងឺលើដីយើងៗ ចេញលុយព្យាបាល។ នយោបាយនេះគឺប្លែកពីវៀតណាម នាយករដ្ឋមន្ត្រីវៀតណាម បានប្រកាសថាជនជាតិបរទេសដែលកើតជំងឺកូវីដ១៩នេះ ត្រូវចេញលុយព្យាបាលខ្លួនឯង។ កម្ពុជាជាប្រទេសមួយក្រ សូមប្រកាសថា ជនជាតិបរទេសដែលឈឺនៅលើទឹកដីកម្ពុជា ត្រូវទទួលបានការព្យាបាលពីសំណាក់គ្រូពេទ្យកម្ពុជា ដោយមិនបង់ថ្លៃ។ នេះជាគោលនយោបាយរបស់យើង »។
ប្រទេសថៃបានប្រកាសបិទព្រំដែនជាមួយកម្ពុជា កាលពីថ្ងៃទី២៣ ខែមីនា ក្រោមហេតុផលទប់ស្កាត់ការឆ្លងរាលដាលមេរោគកូវីដ១៩។ ចំណែកគោលការណ៍អង្គការសុខភាពពិភពលោក គឺករណីរកឃើញជំងឺឆ្លងនៅក្នុងប្រទេសណា គឺប្រទេសនោះជាអ្នកទទួលខុសត្រូវក្នុងការព្យាបាល។
អ្នកនាំពាក្យក្រសួងការបរទេសកម្ពុជា លោក កុយ គួង មានប្រសាសន៍ថា ថៃជាអ្នកប្រកាសបិទព្រំដែន ចំណែកកម្ពុជាមិនបានបិទទេ ហើយលោកថា ការឱ្យមនុស្សឆ្លងកាត់ព្រំដែន ឬអត់នោះ ការសម្រេចរបស់ថៃ។ ពេលសួរថា តើការអនុញ្ញាតឱ្យអ្នកជំងឺឆ្លងកាត់ព្រំដែនពេលនេះខុសច្បាប់អន្តរជាតិទេ? លោកឱ្យទៅសួរក្រសួងសុខាភិបាលវិញ។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន សុំមិនបកស្រាយករណីនេះទេ ដោយប្រាប់ថា ជាប់រវល់។
សាស្ត្រាចារ្យផ្នែកការទូត និងកិច្ចការពិភពលោកនៅសាកលវិទ្យាល័យ Occidental College សហរដ្ឋអាមេរិក លោក អៀ សុផល ឱ្យដឹងតាមសារអេឡេត្រូនិចអ៊ីម៉ែលថា ការព្រមអនុញ្ញាតឱ្យជនជាតិឥណ្ឌូនេស៊ីមកកម្ពុជា គឺវិធានការលាងដៃខ្លួនឱ្យស្អាតរបស់ថៃ ព្រោះមិនមែនជាជនជាតិថៃ និងមិនមែនជាបញ្ហារបស់ថៃ ដែលនាំឱ្យមានការឆ្លងរាលដាលនៅកម្ពុជាបន្ថែមទៀត។
សាស្ត្រាចារ្យដដែលបន្តថា ទំនាក់ទំនងក្នុងតំបន់ពេលនេះ ឆ្លុះបញ្ចាំងពីភាពគ្មានការទទួលខុសត្រូវ ដោយប្រៀបបាននឹងការលេងបាត់ទាត់ដែលទាត់បន្តឱ្យគ្នារហូត។ ករណីនេះ លោកយល់ថា ចុងក្រោយ អាជ្ញាធរក្រុងភ្នំពេញអាចនឹងបញ្ជូនពួកគេទៅប្រទេសកំណើតវិញ។
លោកបន្ថែមថា៖ «ប្រហែលជាអាជ្ញាធរក្រុងភ្នំពេញ នឹងបញ្ជូនពួកគេទៅប្រទេសឥណ្ឌូនេស៊ីវិញ។ ប្រសិនបើវាជាជនជាតិឥណ្ឌូនេស៊ី ២នាក់ ខ្ញុំគិតថា វាមិនអីទេ ប៉ុន្តែ ប្រសិនបើវាមាន ៥០នាក់ ខ្ញុំប្រាកដថានាយករដ្ឋមន្ត្រីនឹងបញ្ជូនពួកគេទៅវិញហើយ»។
លោក ឯម សុវណ្ណរ៉ា យល់ថា ស្ថានភាពចំពោះមុខ រដ្ឋាភិបាលគប្បីបិទការចូលមកនូវជនបរទេសឱ្យបាន ជៀសវាងធ្វើឱ្យពលរដ្ឋកាន់តែព្រួយបារម្ភថា ពួកគេនាំយកជំងឺមកកម្ពុជាបន្ថែមទៀត ម្យ៉ាង កម្ពុជាគប្បីស្នើសុំជំនួយទៅអន្តរជាតិ ពិសេសWHO ដើម្បីជួយតែម្តង។
លោកមានប្រសាសន៍បន្ថែមថា៖ «ក្នុងករណីហ្នឹង កម្ពុជាមានតែឈរនៅលើគោលការណ៍មួយ ស្នើសុំជំនួយពីអន្តរជាតិ ឬក៏WHO ទេ។ ចំណុចមួយទៀត [រដ្ឋាភិបាល] អាចនឹងធ្វើឱ្យបាត់បង់នូវគាំទ្រពីប្រជាពលរដ្ឋ ព្រោះប្រជាពលរដ្ឋរាល់ថ្ងៃស្ថិតនៅក្នុងលក្ខណៈមួយផុយស្រួយ ក្នុងការថែរក្សាសុវត្ថិភាព សន្តិសុខផ្ទាល់ខ្លួនដែរ។ កាលណាជំងឺហ្នឹងឆ្លងកាត់កម្ពុជា អាជ្ញាធរកម្ពុជានៅតែអនុញ្ញាតឱ្យអ្នកពីខាងក្រៅចូលមកកាន់តែច្រើន ធ្វើឱ្យកម្ពុជាខ្លួនឯងបារម្ភកាន់តែខ្លាំងដែរ »។
គិតត្រឹមយប់ម៉ោង៨ ថ្ងៃទី២៦ ខែមីនា កម្ពុជារកឃើញអ្នកមានកូវីដ-១៩ ចំនួន ៩៨ករណី ដោយក្នុងនោះមានអ្នកព្យាបាល ១១នាក់ហើយ ដែលត្រូវបានព្យាបាលឱ្យជាសះស្បើយ៕
