លោកនាយករដ្ឋមន្ត្រី បានប្រកាសដាក់កំហិតផ្អាកការនាំអង្ករ.ស និងស្រូវ ចេញទៅក្រៅប្រទេសត្រឹមថ្ងៃទី៥ ខែមេសាខាងមុខ ដោយលើសពីថ្ងៃនេះ នឹងមិនអនុញ្ញាតឱ្យមានការនាំចេញស្រូវ និងអង្ករ.សទៅលក់នៅក្រៅប្រទេសទៀតឡើយ។
ថ្លែងក្នុងពិធីសន្និសីទកាសែតនៅវិមានរដ្ឋសភានៅព្រឹកនេះ លោក ហ៊ុន សែន មានប្រសាសន៍ថា ការទុករយៈពេល១សប្តាហ៍នេះ ដើម្បីឱ្យពលរដ្ឋ និងឈ្មួញទិញស្រូវគាត់បានបញ្ចេញស្រូវរបស់ពួកគាត់ដែលទិញបម្រុងនឹងយកទៅលក់នៅវៀតណាម ឬថៃ ឱ្យអស់ ក្រៅពីនោះ នឹងមិនអនុញ្ញាតឱ្យមានការនាំចេញទៀតឡើយ។
លោកបន្ថែមថា ដោយឡែក ប្រភេទអង្ករលេខ១ ឬប្រភេទអង្ករក្រអូប ដែលកម្ពុជានាំទៅលក់នៅអឺរ៉ុប នៅអនុញ្ញាតឱ្យនាំចេញធម្មតា។
លោកថា វិធានការបិទការនាំអង្ករ.ស និងស្រូវ ចេញទៅលក់ក្រៅប្រទេសនេះ ដើម្បីជាយន្តការរក្សាស្បៀងទុកក្នុងប្រទេសឱ្យបានច្រើន ទប់ទល់ស្ថានភាពនៃវិបត្តិជំងឺកូវីដ១៩ ហើយរដ្ឋនឹងបញ្ចេញថវិកាជួយដល់រោងម៉ាស៊ីនកិនស្រូវ ដើម្បីប្រមូលទិញស្រូវពលរដ្ឋក្នុងតម្លៃសមរម្យសម្រាប់ស្តុកទុក ប៉ុន្តែ លោកមិនបានបញ្ជាក់ពីទំហំទឹកប្រាក់ដែលរដ្ឋនឹងបញ្ចេញជួយដល់ម្ចាស់រោងម៉ាស៊ីនកិនស្រូវនៅឡើយទេ។
លោក ហ៊ុន សែន មានប្រសាសន៍ថា៖ «រដ្ឋត្រូវផ្តល់ទុនទៅម៉ាស៊ីនកិនស្រូវ ទិញស្រូវយកមករក្សាទុក ដើម្បីជាការបម្រុងរបស់រដ្ឋនៅក្នុងដំណាក់កាលណាមួយ រហូតដល់មានបទបញ្ជាជាថ្មី។ យើងត្រូវតែរក្សាស្បៀងនៅក្នុងស្រុកយើង ហើយស្បៀងនេះ ខ្ញុំមិនសំដៅទៅលើដំឡូងមី ទៅលើពោត ទៅលើសណ្តែកទេ គឺទៅលើអង្ករតែម្តង។ ហើយអង្ករនេះ សំដៅតែទៅលើអង្ករ.ស និងស្រូវតែប៉ុណ្ណោះ ប៉ុន្តែ អង្ករក្រអូបរបស់យើង ដែលចុះកុងត្រានាំចេញទៅសហភាពអឺរ៉ុប និងប្រទេសមួយចំនួន ហើយដែលវាមានបរិមាណមិនច្រើន គឺសូមឱ្យបន្តការនាំចេញ »។
ប្រធានក្រុមប្រឹក្សាភិបាលសហព័ន្ធស្រូវអង្ករកម្ពុជា លោក ហ៊ុន ឡាក់ សម្តែងការគាំទ្រចំពោះការសម្រេចចិត្តរបស់រដ្ឋាភិបាលពេលនេះ ត្បិតជាពេលដែលរដ្ឋាភិបាលនៅលើពិភពលោកកំពុងយកចិត្តទុកដាក់លើបញ្ហាសន្តិសុខស្បៀងដល់ពលរដ្ឋជាសំខាន់ ដើម្បីទប់ទល់នឹងវិបត្តិជំងឺកូវីដ១៩ រួមទាំងកម្ពុជាផងដែរ។
លោកមានប្រសាសន៍ថា៖ «តាមពិតទៅ សម្រាប់អង្ករហូបចុក មិនខ្វះទេ ដោយសារយើងជាប្រទេសនាំចេញ។ អីចឹង រដ្ឋាភិបាលគាត់មានភាពប្រយ័ត្នប្រយែងក្នុងការបម្រុងទុកស្បៀង ខ្លាចយើងមិនបានគិតតែនាំចេញៗ អាប្រភេទស្រូវផង អាប្រភេទអង្ករ.សធម្មតាផង ដោយយើងមិនបានគិតដែលនាំចេញជ្រុលទៅអាចធ្វើឱ្យខ្វះ។ អីចឹង វិធានការទប់ [ការនាំចេញស្រូវ និងអង្ករ.ស] ហ្នឹងល្អមែនទែន ដើម្បីក្តាប់ឱ្យបាននូវបញ្ហាសន្តិសុខស្បៀង»។
ស្រដៀងគ្នានេះ ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន សាទរចំពោះវិធានការរក្សាទុកស្រូវ និងអង្ករ.ស សម្រាប់ប្រើប្រាស់ក្នុងស្រុកដោយផ្អាកការនាំចេញក្នុងស្ថានភាពនេះ ដោយថា សន្តិសុខស្បៀងគឺជារឿងចាំបាច់សម្រាប់ពលរដ្ឋ។
លើសពីនេះ លោកថា រដ្ឋគប្បីផ្តល់ជាកញ្ចប់ថវិកា និងផ្តល់អ្នកជំនាញបច្ចេកទេសបង្រៀនពលរដ្ឋអំពីការដាំបន្លែ ចិញ្ចឹមសត្វ ត្រី ជាដើម ដើម្បីបង្កើនការផលិតស្បៀងសម្រាប់ប្រើប្រាស់ក្នុងស្រុកបន្ថែមទៀត។
លោក ថេង សាវឿន ក៏ចង់ឃើញរដ្ឋមានយន្តការតាមដានការអនុវត្តរបស់ឈ្មួញ ឬម្ចាស់រោងម៉ាស៊ីនកិនស្រូវទាំងអស់ បន្ទាប់ពីទទួលបានកញ្ចប់ថវិកាពីរដ្ឋ ដើម្បីធានាភាពត្រឹមត្រូវ ជៀសវាងការកេងចំណេញពីលើពលរដ្ឋក្នុងស្ថានភាពនេះ។
លោកមានប្រសាសន៍ថា៖ «ត្រឹមត្រូវហើយ! ការទម្លាក់លុយពីរដ្ឋ ទាល់តែមានយន្តការតាមដានត្រួតពិនិត្យ ជៀសវាងមានជនឱកាសនិយមលួចកេងចំណេញ ឬលួចទម្លាក់តម្លៃស្រូវរបស់ប្រជាពលរដ្ឋ ខណៈទុនរដ្ឋបានផ្តល់ជាច្រើនសម្រាប់កសិករ។ ប៉ុន្តែ បែរជាមានការកេងប្រវ័ញ្ចលើលុយអីហ្នឹង ក៏ជាហេតុផលដែលរដ្ឋាភិបាលត្រូវមានយន្តការតាមដានអីចឹងហើយ»។
លោក ហ៊ុន ឡាក់ បញ្ជាក់ថា កាលពីឆ្នាំ២០១៩ កម្ពុជាបាននាំចេញស្រូវទៅលក់ក្រៅប្រទេសជាង ៩លានតោន ហើយលោកថា សម្រាប់តម្រូវការប្រើប្រាស់ ឬហូបចុកក្នុងស្រុកវិញ ក្នុងមួយឆ្នាំមានតម្រូវការប្រមាណជាង ២លានតោន។
ដោយឡែក បញ្ហាអង្ករវិញ សហព័ន្ធស្រូវអង្ករកម្ពុជា បានឱ្យដឹងថា រយៈពេល២ខែដើមឆ្នាំ២០២០ កម្ពុជានាំចេញអង្ករទៅទីផ្សារអន្តរជាតិមានចំនួនជាង ១សែនតោន(១៣៦ ៤៩៩)។ ចំនួននេះ មានការកើនឡើងជាង ២២% បើធៀបនឹងរយៈពេលដូចគ្នាកាលពីឆ្នាំមុន៕
