កម្ពុជារកឃើញអ្នកផ្ទុកជំងឺកូវីដ១៩ ចំនួន២នាក់បន្ថែមទៀតនៅខេត្តសៀមរាប ដែលធ្វើឱ្យចំនួនករណីរកឃើញកើនដល់ ១០៩ករណី។
ក្នុងសេចក្តីប្រកាសព័ត៌មានចុះថ្ងៃទី៣១ ខែមីនានេះ ក្រសួងសុខាភិបាលឱ្យដឹងថា ក្រសួងបានរកឃើញអ្នកផ្ទុកជំងឺកូវីដ១៩ ចំនួន២នាក់ទៀត ដែលជាម្តាយអាយុ ៣៩ឆ្នាំ និងកូនប្រុសអាយុ ១២ឆ្នាំ រស់នៅក្រុងសៀមរាប។ តាមសេចក្ដីប្រកាសដដែល អ្នកទាំងពីរនាក់នេះគឺជាប្រពន្ធ និងកូនរបស់បុរសខ្មែរឥស្លាមម្នាក់ដែលមានផ្ទុកកូវីដ១៩ បន្ទាប់ត្រលប់មកពីការចូលរួមពិធីសាសនាម៉ូស្លីមមួយនៅប្រទេសម៉ាឡេស៊ី កាលពីដើមខែកុម្ភៈកន្លងទៅ។
ក្រសួងបញ្ជាក់ថា៖ «បុគ្គលទាំងពីរនាក់ [ម្ដាយ និងកូន] ត្រូវបានដាក់ឱ្យសម្រាកព្យាបាលនៅមន្ទីរពេទ្យខេត្តសៀមរាប។ រីឯកូន ០២នាក់ទៀត និងឪពុកក្មេកមានលទ្ធផលតេស្តអវិជ្ជមាន»។
បើតាមក្រសួងសុខាភិបាល ក្រៅពីការរកឃើញថ្មី កម្ពុជាក៏បានព្យាបាលជាស្បះស្បើយដល់អ្នកជំងឺ ២៣នាក់ហើយ ក្នុងនោះមានជនជាតិខ្មែរ ១៨នាក់ ខណៈអ្នកដែលកំពុងទទួលការព្យាបាលសរុបចំនួន ៨៦នាក់៕
