លោកនាយករដ្ឋមន្ត្រី ហ៊ុន សែន បានសម្រេចបង្វែរប្រាក់ខែលោកចំនួន៧ខែទៅឱ្យគណៈកម្មាធិការជាតិប្រយុទ្ធនឹងជំងឺកូវីដ១៩។
ក្នុងលិខិតមួយច្បាប់ជំរាបជូនដល់រដ្ឋមន្ត្រីក្រសួងសេដ្ឋកិច្ច លោក ហ៊ុន សែន បានសម្រេចផ្ទេរប្រាក់បៀវត្សរបស់លោកចំនួន៧ខែ ចាប់ពីខែមីនា រហូតដល់ខែកញ្ញា ឆ្នាំ២០២០ ទៅឱ្យគណៈកម្មាធិការជាតិប្រយុទ្ធនឹងជំងឺកូវីដ១៩។
លោកបានបញ្ជាក់ថា៖ «អាស្រ័យហេតុនេះ សូមឯកឧត្តមឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ចាត់ចែងធ្វើការបង្វែរប្រាប់បៀវត្សរបស់ខ្ញុំ ដូចបានជំរាបជូនខាងលើ បញ្ចូលទៅក្នុងគណនីរបស់គណៈកម្មាធិការជាតិប្រយុទ្ធនឹងជំងឺកូវីដ១៩ តាមការគួរ»។
ចាប់ពីឆ្នាំ២០១៧មក ប្រាក់ខែនាយករដ្ឋមន្ត្រីត្រូវបានដំឡើងពី ៣លាន៦សែនរៀល រហូតដល់ ១០លានរៀល ដែលការតម្លើងនេះត្រូវបានរដ្ឋាភិបាលលើកឡើងថា ដោយសារកម្ពុជាមានសមត្ថភាពក្នុងការប្រមូលប្រាក់ចំណូលដើម្បីគាំទ្រដល់ប្រតិបត្តិការរបស់ខ្លួន៕
