ប្រធានសមាគមផលិតអំបិលកម្ពុជា បញ្ជាក់ថា សមាគមកំពុងបង្កើនការផលិតអំបិលឡើងវិញ ដោយថា នឹងអាចធានាបាននូវការផ្គត់ផ្គង់អំបិលក្នុងស្រុកនាឆ្នាំនេះបាន ខណៈការនាំចូលត្រូវចំណាយច្រើន ហើយពេលនេះអំបិលនៅសល់តែ ៥ពាន់តោន។
ប្រធានសមាគមផលិតអំបិលកម្ពុជា លោក ប៊ុន បារាំង មានប្រសាសន៍ប្រាប់VOD ថា បច្ចុប្បន្ន សមាគមកំពុងបង្កើនការផលិតអំបិលក្នុងស្រុកឡើងវិញ ដើម្បីផ្គត់ផ្គង់តម្រូវការក្នុងស្រុក ដោយលោកបញ្ជាក់ថា នឹងអាចធានាដល់ការផ្គត់ផ្គង់បាននាឆ្នាំនេះ ខណៈអំបិលនាំចូលដែលនៅសល់មានតែជាង ៥ពាន់តោនប៉ុណ្ណោះ។
លោក ប៊ុន បារាំង៖ «បើយើងមើលទៅវាលើស យើងអត់ចាំបាច់នាំចូលមកទេ។ ការនាំចូលពីក្រៅវាខាតយើងខាតសោហ៊ុយខាតអី ព្រោះធម្មតាការនាំចូលពីក្រៅមក យើងមិនមានចំណេញអីទេ។ ការនាំចូលទាល់តែយើងខ្វះខាត តែបើនៅនេះគ្រប់គ្រាន់ គឺអត់ចាំបាច់នាំចូលទេ។ […] ឆ្នាំនេះយើងអាចផលិតបាន មិនមានបញ្ហាចោទទេតាមការមើលទៅ ព្រោះអាកាសធាតុយើងឆ្នាំនេះល្អ យើងអាចផលិតបាន [គ្រប់គ្រាន់] ផលិតបានហើយ អំបិលយើងល្អទៀត»។
កសិករផលិតអំបិលនៅក្នុងសង្កាត់ត្រើយកោះ ក្រុងកំពត ខេត្តកំពត លោក ម៉ម ស៊ាប មានប្រសាសន៍ថា ឆ្នាំនេះអាចផលិតអំបិលបានច្រើនជាងមុន ដោយសារមានពន្លឺថ្ងៃគ្រប់គ្រាន់ ដែលធ្វើឱ្យកំហាប់អំបិលខ្ពស់។ ទោះជាយ៉ាងណា លោកថា ការផលិតនៅតែមានបញ្ហាប្រឈមដដែលដោយសារខ្វះកម្លាំងពលកម្ម។
លោក ម៉ម ស៊ាប៖ «ឥលូវវាប្រឈមដែរ ព្រោះអីកម្មករឥលូវភាគច្រើនគេចង់ធ្វើនៅរោងចក្រអីទៅ ដោយគេថាធ្វើក្ដៅពេកអីអញ្ចឹង។ អញ្ចឹង ម្ចាស់ស្រែផលិតមួយៗ មិនសូវមានកម្លាំងកម្មករទេឥលូវនេះ»។
VOD មិនអាចទាក់ទងអនុរដ្ឋលេខាធិការក្រសួងឧស្សាហកម្មទទួលបន្ទុកកិច្ចការអំបិល លោក សុន សេងហួត បាននោះទេ។
ក្រោយមានវិបត្តិជំងឺកូវីដ១៩ ដែលបានធ្វើឱ្យវិស័យធំៗមួយចំនួនដូចជាឧស្សាហកម្មកាត់ដេរ និងទេសចរណ៍រងគ្រោះនោះ កាលពីថ្ងៃទី១៨ ខែមីនា កន្លងទៅ រដ្ឋាភិបាលបានទម្លាក់លុយប្រមាណ ៥០លានដុល្លារអាមេរិកដល់ធនាគារអភិវឌ្ឍន៍ជនបទ ដើម្បីផ្ដល់កម្ចីក្នុងអត្រាការប្រាក់ទាបដល់សិប្បកម្ម សហគ្រាសធុនតូច និងមធ្យម យកទៅពង្រឹងផលិតកម្មខ្លួន ដើម្បីពង្រឹងមូលដ្ឋានផលិតកម្មក្នុងស្រុក ជំរុញសកម្មភាពសេដ្ឋកិច្ច និងបង្កើតការងារថ្មីដល់ប្រជាពលរដ្ឋ។
ប្រធានសម្ព័ន្ធសហគមន៍កសិករកម្ពុជា លោក ថេង សាវឿន មានប្រសាសន៍ថា ស្ថិតក្នុងស្ថានភាពបច្ចុប្បន្នដែលពិភពលោកកំពុងបារម្ភពីជំងឺ COVID-19 ដែលធ្វើឱ្យប្រទេសជាច្រើនបិទព្រំដែនរបស់ខ្លួននោះ ការផលិតអំបិលដើម្បីផ្គត់ផ្គង់ទីផ្សារក្នុងស្រុករបស់កម្ពុជាគឺជារឿងសំខាន់ និងជាឱកាសដល់សមាគមអំបិលផងដែរក្នុងការបង្កើនការផលិត និងទទួលនូវការគាំទ្រពីរដ្ឋក្នុងពេលនេះ។
លោក ថេង សាវឿន៖ «ថ្មីៗ រដ្ឋាភិបាលបានប្រកាសនូវការគាំទ្រ ឬក៏ផ្ដល់ទុនឱ្យធនាគារវិនិយោគលើវិស័យកសិកម្ម ឬក៏វិនិយោគលើផលិតផលស្បៀងអាហារ។ អ៊ីចឹង សហគមន៍អំបិលអាចស្នើសុំថវិកាពីធនាគារអភិវឌ្ឍន៍ជនបទ ធ្វើយ៉ាងម៉េចជួយដល់ការផ្គត់ផ្គង់ ឬដោះស្រាយនូវបញ្ហាទាក់ទងនឹងថ្លៃឈ្នួល ហើយនិងការប្រមូលកម្មករចូលមកបំពេញការងារហ្នឹង។ យើងស្នើឱ្យធនាគារអភិវឌ្ឍន៍ជនបទហ្នឹង មេត្តាយោគយល់ ហើយផ្ដល់នូវលក្ខខណ្ឌងាយស្រួលបន្ថែមសម្រាប់សហគមន៍ផលិតអំបិល»។
កម្ពុជាត្រូវការអំបិលប្រមាណ ១០ម៉ឺនតោនសម្រាប់ផ្គត់ផ្គង់ទីផ្សារក្នុងស្រុកក្នុង១ឆ្នាំៗ តែនៅប៉ុន្មានឆ្នាំចុងក្រោយនេះ អំបិលដែលផលិតបានកាន់តែថយចុះ និងត្រូវការនាំចូលពីក្រៅប្រទេសបន្ថែមពីប្រទេសចិន និងឥណ្ឌា។ ឆ្នាំ២០១៧ កម្ពុជាត្រូវនាំចូលប្រមាណ ៣ម៉ឺនតោន ឆ្នាំ២០១៨ ប្រមាណ ៣ម៉ឺនតោន ខណៈនៅឆ្នាំ២០១៩ នាំចូលប្រមាណ ៥ម៉ឺនតោន។
របាយការណ៍ក្រសួងឧស្សាហកម្មបង្ហាញថា បច្ចុប្បន្ន កម្ពុជាមានកសិដ្ឋានផលិតអំបិល ៧កន្លែងក្នុងខេត្តកែប និងកំពត ដោយមានផ្ទៃដីសរុបចំនួន ៤៦០០ហិកតា ក្នុងនោះមានក្រុមផលិតករជាង ២០០នាក់។
កាលពីឆ្នាំ២០១៨ សមាគមផលិតអំបិលកម្ពុជាក៏ប្រកាសពីបំណងរំលាយសមាគមនេះចោល ដោយសារមិនមានលទ្ធភាពផលិតអំបិលបណ្តាលមកពីមូលហេតុខ្វះកម្លាំងពលកម្ម ខ្វះឧបករណ៍បច្ចេកទេស និងបញ្ហាអាកាសធាតុជាដើម៕
