មន្រ្តីអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានរកឃើញ និងឃាត់ទុកនូវអាល់កុលក្លែងក្លាយ ឬមេតាណុល ចំនួនជិត ៦ម៉ឺនលីត្រ (៥៩,៤០២) ដែលមានទីតាំងនៅរាជធានីភ្នំពេញ និងខេត្តកណ្តាល។
មន្ត្រីជំនាញអះអាងថា យុទ្ធនាការនេះ ក្រោយសង្កេតឃើញថា ក្នុងពេលថ្មីៗនេះ មានជនខិលខូចមួយចំនួន ឆ្លៀតឱកាសនាំចូល និងចែកចាយអាល់កុលក្លែងក្លាយ ដែលធ្វើឱ្យមានផលប៉ះពាល់ដល់សុខភាពរបស់អ្នកប្រើប្រាស់។
លើសពីនេះ បន្ទាប់ពីមានការបញ្ជាពីអគ្គនាយកនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ឬហៅកាត់ថា ក.ប.ប លោក ផាន អូន បញ្ជាដល់មន្រ្តីក្រោមឱវាទ ឱ្យចុះស្រាវជ្រាវ និងបង្ក្រាបជាបន្ទាន់ការធ្វើចរាចរណ៍ចែកចាយនូវសារធាតុអាល់កុលក្លែងក្លាយក្នុងក្របខណ្ឌទូទាំងប្រទេស។
ទំព័រហ្វេសប៊ុករបស់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ឱ្យដឹងនៅថ្ងៃនេះថា ករណីបង្ក្រាបអាល់កុលក្លែងក្លាយជិត ៦ម៉ឺនលីត្រ គឺមានកិច្ចសហការរវាងមន្ត្រីជំនាញ អាជ្ញាធរមូលដ្ឋាន និងមន្ត្រីតុលាការផងដែរ។
ប្រភពដដែលបន្តថា ទីតាំងដែលរកឃើញស្តុកទុកអាល់កុលក្លែងក្លាយនោះមាន ២កន្លែង គឺ ទីតាំងទី១ នៅភូមិត្រពាំងសុក្រំ ឃុំបែកចាន ស្រុកអង្គស្នួល ខេត្តកណ្តាល និងទីតាំងមួយទៀត ស្ថិតនៅផ្ទះ បុរីពិភពថ្មីកំបូល៣ ភូមិស្ងួងពេជ្រ សង្កាត់កន្ទោក ខណ្ឌកំបូល រាជធានីភ្នំពេញ ដោយវត្ថុតាងត្រូវរក្សាទុកបន្តនីតិវិធីតាមផ្លូវច្បាប់។
ទំព័រហ្វេសប៊ុក ក.ប.ប សបញ្ជាក់ថា៖ «ក្រោយការត្រួតពិនិត្យ និងយោងលទ្ធផលវិភាគ អាល់កុលក្លែងក្លាយ (មេតាណុល) ចំនួន ៧៦៣ប៊ីដុង និង ២២៤ពុយ សរុបស្មើនឹង ៥៩,៤០២លីត្រ ត្រូវបានព្រះរាជអាជ្ញារងសម្រេចឱ្យអគ្គនាយកដ្ឋាន ក.ប.ប ធ្វើការដកហូតមករក្សាទុកជាបណ្តោះអាសន្ន ដើម្បីអនុវត្តនីតិវិធីបន្ត»។
អគ្គនាយកដ្ឋាន ក.ប.ប. អះអាងថា គិតត្រឹមថ្ងៃទី៣ ខែមេសានេះ អគ្គនាយកដ្ឋាននេះបានបើកយុទ្ធនាការបង្ក្រាបអាល់កុលក្លែងក្លាយ សរុបបានចំនួន ៦៤,១៧៨លីត្រ មករក្សាទុកដើម្បីអនុវត្តតាមនីតិវិធី ប៉ុន្តែ នៅមិនទាន់បង្ហាញពីការឃាត់ខ្លួនម្ចាស់អាជីវកម្ម ឬមនុស្សពាក់ព័ន្ធករណីនេះនៅឡើយទេ។
កាលពីថ្ងៃម្សិលមិញ ក្រសួងសុខាភិបាលបានចេញសេចក្តីប្រកាសព័ត៌មានស្តីពីការហាមឃាត់គណនីហ្វេសប៊ុកចំនួន៤ ដែលផ្សព្វផ្សាយលក់ ម៉ាស អាល់កុល ជែល និងសារធាតុសម្លាប់មេរោគ ដោយគ្មានការទទួលស្គាល់ពីក្រសួង។
ក្រសួងក៏បានព្រមានចាត់វិធានការច្បាប់ចំពោះគណនីហ្វេសប៊ុកទាំង៤នោះ ព្រមទាំងគណនីផ្សេងទៀតដែលនាំចូល ចែកចាយ និងផ្សព្វផ្សាយផលិតផលទាំងនេះ ដែលគ្មានការអនុញ្ញាតពីក្រសួងសុខាភិបាលទៀតផង។
អ្នកនាំពាក្យក្រសួងសុខាភិបាល អ្នកស្រី ឱ វណ្ណឌីន មានប្រសាសន៍ថា ក្រសួងកំពុងចាត់វិធានការចំពោះគណនីហ្វេសប៊ុក ឬទំព័រហ្វេសប៊ុក ដែលផ្សព្វផ្សាយលក់ម៉ាស អាល់កុល ជែល និងសារធាតុសម្លាប់មេរោគ ដោយគ្មានការទទួលស្គាល់ពីក្រសួង។ អ្នកស្រីថា ការព្រមានគណនីហ្វេសប៊ុកទាំង៤ កាលពីថ្ងៃម្សិលមិញ ជាវិធានការធ្វើឡើងជាជំហានៗ។
អ្នកស្រីបន្ថែមថា៖ «អាហ្នឹង [ហាមឃាត់គណនីហ្វេសប៊ុក៤] យើងធ្វើបណ្តើរៗណាក្មួយ! ព្រោះអីវាមិនអាចធ្វើទាំងអស់ទៅកើត ព្រោះគ្នា [មន្ត្រី] ក៏ត្រូវចំណាយពេលដើម្បីស្រាវជ្រាវដែរ ចា៎! អីចឹង យើងធ្វើជាបឋមប៉ុណ្ណឹងសិនចុះ ប៉ុន្តែ បើមានទៀត យើងធ្វើទៀត យើងនឹងធ្វើជាបន្តបន្ទាប់»។
ប្រធានសមាគមគ្រូពេទ្យគុណធម៌នៅកម្ពុជា លោកវេជ្ជបណ្ឌិត អ៊ួច វុទ្ធី មានប្រសាសន៍ថា ច្រកដែលនាំចូលអាល់កុលក្លែងក្លាយមកកម្ពុជា មានពីរសំខាន់នៅពេលបច្ចុប្បន្ន រួមមាន ការនាំចូលពីថៃ និងវៀតណាម ហើយករណីនេះអាចនឹងមានច្រើនជាង ៦ម៉ឺនលីត្រ និងអាចមានជាច្រើនកន្លែងទៀត។
លោកបន្តថា អាល់កុលក្លែងក្លាយគឺត្រូវផ្សំឡើងដោយសារធាតុគីមីជាច្រើនប្រភេទ ដែលបណ្តាលឱ្យមានផលប៉ះពាល់ធ្ងន់ធ្ងរដល់សុខភាពអ្នកប្រើប្រាស់ ដូចជា ប៉ះពាល់ផ្លូវដង្ហើម ពងបែក និងរលាកស្បែក ជាដើម។
លោកមានប្រសាសន៍ថា៖ «វាអាឡែកហ្ស៊ីស្បែក វាទៅជាកន្ទួលក្រហម រមាស់មិនដឹងខ្លួន អាហ្នឹងទីមួយ។ ហើយទីពីរ វាចេញពងបែក ដូចអង់ត្រាក់អីចឹង។ បើថាក្មេងៗ តែងឧស្សាហ៍មកប្រាប់ម៉ែ ឱ្យជួយអេះខ្នង អេះដៃអីហ្នឹង។ អាហ្នឹង ជួនកាលមកពីអាល់កុលហ្នឹងដែរបាទ ដូចអាជំងឺរើមអីចឹង អង់ត្រាក់ហ្នឹង។ អាហ្នឹង [អាល់កុលក្លែងក្លាយ] បើបាញ់ វាប៉ះពាល់ស្បែក វាអាឡែកហ្ស៊ី និងប៉ះពាល់ផ្លូវដង្ហើមដែរ»។
ក្រសួងសុខាភិបាលឱ្យដឹងថា គិតមកដល់ព្រឹកថ្ងៃសុក្រនេះ អ្នកមានជំងឺកូវីដ១៩ ដែលបានរកឃើញទាំងអស់នៅកម្ពុជា មានចំនួន ១១៤នាក់ ក្នុងនោះមានអ្នកជំងឺ ៣៥នាក់ហើយ ដែលត្រូវបានព្យាបាលជាសះស្បើយ។
អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ អំពាវនាវដល់សាធារណជន ជាពិសេសអាជីវករលក់ដុំ និងលក់រាយទាំងអស់ ត្រូវចូលរួមសហការ និងស្វែងយល់អំពីការប្រកបអាជីវកម្មដោយការទទួលខុសត្រូវ ចៀសវាងធ្វើឱ្យប៉ះពាល់ដល់សុខភាពអ្នកប្រើប្រាស់ និងប្រឈមចំពោះមុខច្បាប់ថែមទៀតផង៕
