មន្ត្រីជាន់ខ្ពស់ផ្នែកកងទ័ព បានឱ្យដឹងថា នៅថ្ងៃសុក្រ និងថ្ងៃសៅរ៍ស្អែកនេះ នឹងមានការចល័តរថគ្រោះ រថពាសដែកចំនួន ២២គ្រឿង ចូលរាជធានីភ្នំពេញ ប៉ុន្តែ ជាការចល័តគ្រឿងយុទ្ធភណ្ឌសឹកទាំងនោះចូលបន្ទាយដើមវិញប៉ុណ្ណោះ ដោយពលរដ្ឋមិនគួរព្រួយបារម្ភនោះឡើយ។
អគ្គមេបញ្ជាការកងយោធពលខេមរភូមិន្ទ នាយឧត្តមសេនីយ៍ លោក វង្ស ពិសេន បានចេញបទបញ្ជាកាលពីថ្ងៃម្សិលមិញ ស្តីពីការចល័តរថក្រោះ រថពាសដែក របស់កងពលតូចលេខ៧០ ឬ ង៧០។
លិខិតនេះបានបញ្ជាឱ្យមេបញ្ជាការកងទ័ពជើងគោក ត្រូវចល័តរថក្រោះចំនួន ១០គ្រឿង និងរថពាសដែកចំនួន ១២គ្រឿង ពីសាលាហ្វឹកហ្វឺនតេជោសែន ជុំគិរី ក្នុងខេត្តកំពត មកទីបញ្ជាការកងពលតូចលេខ៧០ ស្ថិតនៅសង្កាត់ចោមចៅ៣ រាជធានីភ្នំពេញ ដើម្បីវិលចូលអង្គភាពដើមវិញ។
លោក វង្ស ពិសេន ក៏បានបញ្ជាទៀតថា ការធ្វើយុទ្ធដំណើរនេះ ត្រូវធ្វើឡើងនៅថ្ងៃទី១០ និងថ្ងៃទី១១ ខែមេសា ជាកំហិត ដោយត្រូវរៀបចំផែនការឱ្យបានច្បាស់លាស់ ដើម្បីធានារក្សាឱ្យបាននូវសន្តិសុខ សុវត្ថិភាពផងដែរ។
បទបញ្ជាសរសេរថា៖ «នាយខុទ្ទកាល័យអគ្គបញ្ជាការដ្ឋាន មេបញ្ជាការកងទ័ពជើងគោក មេបញ្ជាការកងរាជអាវុធហត្ថលើផ្ទៃប្រទេស និងស្ថាប័នពាក់ព័ន្ធ ត្រូវអនុវត្តបញ្ជានេះឱ្យមានប្រសិទ្ធភាពខ្ពស់»។
អ្នកនាំពាក្យអគ្គបញ្ជាការនៃកងយោធពលខេមរភូមិន្ទ ឧត្តមសេនីយ៍ទោ ថោង សូលីម៉ូ មានប្រសាសន៍បន្ថែមនៅថ្ងៃនេះថា ការចល័តរថក្រោះ និងរថពាសដែកជាង ២០គ្រឿងចូលបន្ទាយនៅភ្នំពេញវិញនេះ បន្ទាប់ពីគ្រឿងយុទ្ធភណ្ឌសឹកទាំងនោះបានយកទៅហ្វឹកហ្វឺន និងធ្វើសមយុទ្ធយោធានាគមាសជាមួយភាគីចិនកាលពីខែមីនាចប់។
លោកបន្តថា ជាធម្មតា ការចល័តរថគ្រោះ ឬរថពាសដែកចេញ ឬចូលបន្ទាយ តែងមានការជូនដំណឹងដើម្បីកុំឱ្យពលរដ្ឋព្រួយបារម្ភ ហើយនេះគឺជាការចល័តចូលកន្លែងដើមវិញប៉ុណ្ណោះ មិនពាក់ព័ន្ធរឿងផ្សេង ពិសេសរឿងយកកម្លាំងមកទប់ស្កាត់ពលរដ្ឋក្នុងស្ថានភាពនេះនោះឡើយ។
លោកមានប្រសាសន៍ថា៖ «តាមខ្ញុំតាមដានព័ត៌មានរយៈពេលប៉ុន្មានថ្ងៃនេះ ប្រជាពលរដ្ឋភាគច្រើនគឺគាត់គោរពទៅតាមការណែនាំរបស់ប្រមុខរដ្ឋាភិបាល ដោយមិនមានការព្រួយបារម្ភអំពីរឿងហ្នឹងទេ [រឿងចល័តរថក្រោះ និងរថពាសដែក]។ ភាគតិចទេ ឬស្ទើរតែគ្មានផងទេ ព្រោះការចល័តនេះវាជារឿងធម្មតា មិនមែនយកទៅធ្វើរឿងផ្សេងនោះទេ។ អីចឹង សុំកុំឱ្យមានការភាន់ច្រឡំអី ដោយការផ្អាកមិនឱ្យប្រជាពលរដ្ឋទៅស្រុកកំណើតហ្នឹង គេចៀសវាងការឆ្លងមេរោគប៉ុណ្ណឹងទេ។ យើងមិនបានហាមឃាត់បិទសិទ្ធិសេរីភាព រហូតដល់យើងទៅប្រើប្រាស់កម្លាំងហ្នុងទេ វាខុសស្រឡះហ្មង។ អីចឹង សុំកុំឱ្យមានការយល់ច្រឡំ»។
ការបញ្ជាឱ្យរថក្រោះ រថពាសដែក ចល័តចូលបន្ទាយដើមវិញនៅភ្នំពេញនេះ ខណៈរដ្ឋាភិបាលបានចេញបញ្ជាឱ្យបិទការធ្វើដំណើររបស់ពលរដ្ឋចូលក្រុងភ្នំពេញ ឬចេញពីក្រុងភ្នំពេញទៅបណ្តាខេត្តនានា និងផ្អាកការធ្វើដំណើររបស់ពលរដ្ឋឆ្លងកាត់រវាងខេត្ត និងខេត្តទៀតផង ដើម្បីជាវិធានការទប់ស្កាត់ និងបង្ការការរីករាលដាលជំងឺកូវីដ១៩។
លើសពីនេះ រដ្ឋាភិបាលកំពុងដំណើរការលើសេចក្តីព្រាងច្បាប់ដាក់ប្រទេសក្នុងគ្រាអាសន្ន ដើម្បីឆ្លើយតបបញ្ហាចំពោះមុខ ទប់ទល់នឹងវិបត្តិជំងឺកូវីដ១៩ ផងដែរ។
កាលពីថ្ងៃម្សិលមិញ លោកនាយករដ្ឋមន្ត្រី ហ៊ុន សែន បានបញ្ជាក់លើទំព័រហ្វេសប៊ុករបស់ខ្លួនថា ប្រសិនមានច្បាប់គ្រប់គ្រងប្រទេសក្នុងគ្រាមានអាសន្ន ប្រហែលជាច្បាប់នោះត្រូវយកមកអនុវត្តនាពេលនេះផងដែរ។
ប្រធានមជ្ឈមណ្ឌលប្រជាពលរដ្ឋដើម្បីការអភិវឌ្ឍ និងសន្តិភាព លោក យង់ គីមអេង មានប្រសាសន៍ថា ការចល័តរថក្រោះ និងរថពាសដែកចូលអង្គភាពដើមវិញ បន្ទាប់ពីយកទៅប្រើប្រាស់ក្នុងសមយុទ្ធយោធាចប់នោះ វាជារឿងធម្មតាប៉ុណ្ណោះ។
យ៉ាងនេះក្តី សង្គមស៊ីវិលរូបនេះ ចង់ឱ្យមានការផ្សព្វផ្សាយឱ្យបានទូលំទូលាយជាងនេះអំពីការចល័តគ្រឿងយុទ្ធភណ្ឌនោះ ចៀសវាងការយល់ច្រឡំ ដែលបង្កើតជាក្តីបារម្ភសម្រាប់ពលរដ្ឋក្នុងស្ថានភាពនេះ។
លោក យង់ គីមអេង បន្តថា៖ «រឿងដែលសំខាន់ យើងអាចឱ្យមានប្រព័ន្ធផ្សព្វផ្សាយ លោកអាចជម្រាបជូនប្រជាពលរដ្ឋឱ្យបានទូលំទូលាយពីសេចក្តីជូនដំណឹងនេះ ចៀសវាងការបកស្រាយផ្សេងៗ ដែលធ្វើឱ្យប្រជាពលរដ្ឋយល់ច្រឡំ និងមានការព្រួយបារម្ភ »។
សមយុទ្ធយោធានាគមាសឆ្នាំ២០២០ រវាងកងទ័ពកម្ពុជា-ចិន បានធ្វើឡើងរយៈពេល១៥ថ្ងៃ ចាប់ពីថ្ងៃទី១៥ ខែមីនា ដល់ថ្ងៃទី៣០ ខែមីនា ដែលមានការចូលរួមពីកងទ័ពប្រទេសទាំងពីរ សរុបជាង ៣ពាន់នាក់ ក្រោមប្រធានបទ «រួមគ្នាប្រឆាំងភេរវកម្ម និងការងារមនុស្សធម៌»។
សមយុទ្ធយោធានាគមាសឆ្នាំ២០២០នេះ ត្រូវបានរៀបចំឡើងស្ថិតនៅទីលានបាញ់គ្រាប់ពិតតេជោសែនជុំគីរី របស់កងពលតូចថ្មើរជើងលេខ៧០ ស្ថិតក្នុងភូមិអូរ ឃុំត្រពាំងរាំង ស្រុកជុំគិរី ខេត្តកំពត។
សមយុទ្ធនាគមាស ត្រូវបានធ្វើឡើងរវាងកងទ័ពកម្ពុជា-ចិន ជាលើកទី៤ហើយ ចាប់តាំពីឆ្នាំ២០១៦មក៕
