កម្ពុជាសង្ឃឹមថា មិត្តភាពកម្ពុជា-អាមេរិក នឹងត្រូវបានបង្កើនប្រសើរឡើងថែមទៀត ក្រោយពីអាមេរិកផ្ញើសារអបអរពិធីចូលឆ្នាំខ្មែរកាលពីចុងសប្ដាហ៍មុន។
ក្នុងលិខិតឆ្លើយតបចុះថ្ងៃទី១៣ ខែមេសា អ្នកនាំពាក្យក្រសួងការបរទេសកម្ពុជា បានអរគុណចំពោះការការជូនពររបស់សហរដ្ឋអាមេរិក ជូនដល់ប្រជាជនកម្ពុជា ក្នុងឱកាសដែលកម្ពុជាប្រារព្ធពិធីបុណ្យចូលឆ្នាំប្រពៃណីជាតិនៅពេលនេះ។
ក្រសួងការបរទេសបានសរសេរថា៖ «រដ្ឋាភិបាល និងប្រជាជនកម្ពុជា បានវាយតម្លៃចំពោះមិត្តភាពជាមួយសហរដ្ឋអាមេរិក និងជឿជាក់យ៉ាងមុតមាំថា ទំនាក់ទំនងជិតស្និទ្ធ និងកិច្ចសហប្រតិបត្តិការល្អប្រសើររវាងប្រទេសទាំងពីរ នឹងត្រូវបានលើកកម្ពស់ថែមទៀតជាមួយនឹងការប្ដេជ្ញាចិត្តរួមគ្នា»។
ការឆ្លើយតបនេះ គឺបន្ទាប់ពីក្រសួងការបរទេសអាមេរិកផ្ញើសារជូនពរប្រជាជនកម្ពុជា កាលពីថ្ងៃទី៩ ខែមេសា ដែលមានអត្ថន័យខុសពីឆ្នាំមុន។
ការជូនពរក្នុងឱកាសពិធីបុណ្យចូលឆ្នាំខ្មែរឆ្នាំ២០២០នេះ លោកស្រី MORGAN ORTAGUS អ្នកនាំពាក្យក្រសួងការបរទេសសហរដ្ឋអាមេរិក បានជូនពរដល់ប្រជាជនកម្ពុជាឱ្យមានសេចក្តីសុខសប្បាយ និងបានវាយតម្លៃខ្ពស់នៃទំនាក់ទំនងប្រទេសទាំងពីរ និងសង្ឃឹមថា មិត្តភាពរបស់ប្រទេសទាំងពីរនឹងមានភាពកាន់តែជ្រាលជ្រៅរាប់ឆ្នាំទៅមុខទៀតផងដែរ។
ក្នុងសារជូនពរនោះបានលើកឡើងថា៖ «ឆ្នាំនេះ ពេលនេះ បង្ហាញឱ្យឃើញនូវវប្បធម៌ដ៏សម្បូរបែបរបស់ព្រះរាជាណាចក្រកម្ពុជា។ ប្រជាជនអាមេរិក វាយតម្លៃខ្ពស់ចំពោះវប្បធម៌របស់អ្នក និងទំនាក់ទំនងរវាងប្រជាជន និងប្រជាជន នៃប្រទេសយើងទាំងពីរ។ ទំនាក់ទំនងនេះ ធ្វើឱ្យយើងមានការតាំងចិត្តក្នុងការដោះស្រាយបញ្ហាប្រឈមជាសកលដែលកំពុងមាននៅចំពោះមុខយើង ហើយយើងពិតជាជឿថា មិត្តភាពរបស់យើងនឹងមានភាពកាន់តែជ្រាលជ្រៅនៅក្នុងពេលរាប់ឆ្នាំទៅមុខទៀត»។
ការជូនពរនេះមានភាពខុសប្លែកពីការជូនពរកាលពីឆ្នាំ២០១៩ ដោយនៅពេលនោះ ក្រសួងការបរទេសអាមេរិកបានសរសេរយ៉ាងខ្លីតែក្នុងអត្ថន័យជំរុញមួយថា៖
«ទំនាក់ទំនងរវាងប្រជាជនកម្ពុជា និងអាមេរិក គឺផ្អែកលើកិច្ចខិតខំប្រឹងប្រែងលើកកម្ពស់ សន្តិភាព វិបុលភាព និងសេរីភាព។ សូមឱ្យចំណងមិត្តភាពនេះកាន់តែស៊ីជម្រៅនៅឆ្នាំខាងមុខ»។
ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា លោកបណ្ឌិត គិន ភា យល់ថា ការខិតចូលជិតគ្នានៃប្រទេសទាំងពីរនៅពេលនេះ ជាការបញ្ជាក់នៃការរក្សាទំនាក់ទំនង ៧០ឆ្នាំរបស់ប្រទេសទាំងពីរ ក៏ដូចជាការជួយសង្គ្រោះគ្នាក្នុងពេលមានវិបត្តិកូវីដ១៩ កើតឡើងក្នុងប្រទេសទាំងពីរផងដែរ។
លោកបណ្ឌិត គិន ភា៖ «ជានិច្ចជាកាល ខ្ញុំមើលទៅទំនាក់ទំនងកម្ពុជាសហរដ្ឋអាមេរិក តាំងពីដើមទីមក គឺជាទំនាក់ទំនងផ្អែមល្ហែម និងល្វីងជូរចត់ គឺកម្រឃើញថា ផ្អែមរហូត ឬល្វីងរហូតណាស់។ ដោយសារតែទំនាក់ទំនងនោះ វាហាក់បីដូចជាចងភ្ជាប់ជាមួយហ្នឹងរបៀបវារៈនយោបាយច្រើនជាង។ ជាទូទៅ សហដ្ឋអាមេរិក គាត់មានរបៀបវារៈនយោបាយរបស់គាត់ ហើយប្រទេសកម្ពុជាវិញ ក៏ស្ថិតនៅក្នុងជម្រើសការបរទេសដ៏លំបាកមួយដែរ»។
លោកឱ្យជាយោបល់ថា ដើម្បីរក្សាភាពផ្អែមល្ហែមនៃទំនាក់ទំនងប្រទេសទាំងពីរឱ្យបានយូរអង្វែង កម្ពុជា អាមេរិកត្រូវបង្ហាញនូវភាពជឿទុកចិត្តរវាងគ្នានិងគ្នា ដោយឈរលើគោលការណ៍ផលប្រយោជន៍នៃប្រជាជនទាំងពីរប្រទេស។
កាលពីថ្ងៃទី៨ ខែមេសា ក្នុងការជួបសំណេះសំណាលរវាងនាយករដ្ឋមន្ត្រីកម្ពុជា លោក ហ៊ុន សែន និងរដ្ឋមន្ត្រីការបរទេសអាមេរិក លោក Mike Pompeo បានធ្វើអំណរគុណគ្នាទៅវិញទៅមក ចំពោះការជួយរបស់ប្រទេសទាំងពីរក្នុងពេលពិភពលោកមានវិបត្តិកូវីដ១៩។ នៅពេលនោះ លោក ហ៊ុន សែន ក៏បានអគុណចំពោះក្រុមអ្នកស្ម័គ្រចិត្តអាមេរិក Pease Corps ដែលត្រូវបានលោក ហ៊ុន សែន ចាត់ទុកថា ជាការជំរុញទំនាក់ទំនងល្អរវាងប្រទេសទាំងពីរផងដែរ។
ទំនាក់ទំនងកម្ពុជា-អាមេរិក ត្រូវបានប្រែជាសោះអង្គើយកាលពីឆ្នាំ២០១៧ កន្លងទៅ ក្រោយពីរដ្ឋាភិបាលចាប់ខ្លួនលោក កឹម សុខា និងប្រកាសកម្ចាត់ចលនាបដិវត្តន៍ពណ៌ដែលមានការរៀបចំដោយបរទេសចេញពីប្រទេស។ ក្នុងយុទ្ធនាការនេះមានអង្គការជាច្រើនរបស់សហរដ្ឋអាមេរិក ដែលមានដូចជា NDI USAID Peace corps ជាដើម ត្រូវបានរដ្ឋាភិបាលចោទថា ជាក្រុមគាំទ្រចលនាបដិវត្តន៍ពណ៌ទាំងនោះ៕