ក្រសួងការបរទេសកម្ពុជា បានអះអាងថា ពលរដ្ឋខ្មែរ ១៥០នាក់ ដែលត្រូវបានខកខានក្នុងការវិលត្រឡប់មកកម្ពុជា ដើម្បីចូលរួមបង្ការការរីករាលដាលជំងឺកូវីដ១៩ នឹងអនុញ្ញាតឱ្យមកកម្ពុជានៅពេលស្ថានភាពជំងឺនេះបានប្រសើរ។
អ្នកនាំពាក្យក្រសួងការបរទេសកម្ពុជា លោក កុយ គួង មានប្រសាសន៍នៅថ្ងៃនេះថា ស្ថានភាពរស់នៅរបស់ពលរដ្ឋខ្មែរ ១៥០នាក់ គឺប្រព្រឹត្តជាធម្មតា ក្រោមការយកចិត្តទុកដាក់ជាប្រចាំពីសំណាក់មន្ត្រីស្ថានទូតខ្មែរប្រចាំទីក្រុងកូឡាឡាំពួរ សហការជាមួយអាជ្ញាធរម៉ាឡេស៊ីផង ដើម្បីសម្រួលដល់ការរស់នៅរបស់ពួកគាត់។ លោកបន្តថា រង់ចាំស្ថានភាពជំងឺកូវីដ១៩ បានប្រសើរ និងចាំការវិនិច្ឆ័យពីក្រសួងសុខាភិបាលជាមុន ទើបអនុញ្ញាតឱ្យពលរដ្ឋខ្មែរទាំងនោះត្រឡប់មកកម្ពុជាវិញ។
លោកមានប្រសាសន៍បន្ថែមថា៖ «អាស្រ័យទៅហ្នឹង យើងចាំមើលខាងក្រសួងសុខាភិបាលធ្វើតេស្ត។ រង់ចាំមើលការវាយតម្លៃពីខាងក្រសួងសុខាភិបាលសិន»។
កាលពីថ្ងៃទី៧ ខែមេសា លោកនាយករដ្ឋមន្ត្រី ហ៊ុន សែន បានប្រកាសមិនអនុញ្ញាតឱ្យពលរដ្ឋខែ្មរចំនួន ១៥០នាក់ ដែលត្រៀមនឹងចេញដំណើរមកពីប្រទេសម៉ាឡេស៊ីចូលប្រទេសកម្ពុជាក្នុងអំឡុងពេលនេះឡើយ ដោយលោកបារម្ភខ្លាចអ្នកទាំងនោះ មានផ្ទុកជំងឺកូវីដ១៩ ហើយនាំជំងឺមកឆ្លងរាលដាលដល់ពលរដ្ឋនៅក្នុងប្រទេសដូចករណីមុនៗទៀត ។
និស្សិតខ្មែរនៅប្រទេសម៉ាឡេស៊ីដែលខកខានក្នុងការត្រឡប់មកកម្ពុជាម្នាក់ លោក ស្លះ សាព្រី បានឱ្យដឹងថា ស្ថានភាពពួកគាត់ ១៥០នាក់ បច្ចុប្បន្នគឺដោះស្រាយរៀងៗខ្លួន ដោយត្រឡប់ទៅកន្លែងរស់នៅ ឬកន្លែងការងារ ឬសាលារៀនរបស់ខ្លួនវិញ។
យ៉ាងនេះក្តី លោកថា ពលរដ្ឋជាច្រើននៅតែទន្ទឹងរង់ចាំការវិលត្រឡប់មកស្រុកកំណើតក្នុងពេលឆាប់ៗនេះ ដោយថា មានពលរដ្ឋខ្លះអត់មានការងារធ្វើ និងមានខ្លះទៀតមិនមានថវិកាសម្រាប់ចាយវាយជាដើម។
លោក ស្លះ សាព្រី បន្តថា៖ «មួយទៀត ក្នុងចំណោមអ្នកធ្វើដំណើរហ្នឹង គឺមានស្ត្រីម្នាក់ដែលមានផ្ទៃពោះ ហើយប្តីគាត់ស្លាប់ចោល។ គាត់មានផ្ទៃពោះជិតកើតហើយអីចឹងណ៎ា។ គាត់នៅលំបាក ហើយអត់មានលុយទៀត។ អីចឹងខ្មែរយើងដែលនៅម៉ាឡេស៊ីហ្នឹងបានរៃលុយគ្នាជួយគាត់បានខ្លះ»។
មន្ត្រីជាន់ខ្ពស់ក្រសួងការបរទេស លោក កុយ គួង ដដែលបន្តថា កន្លងមក មន្ត្រីស្ថានទូតខ្មែរប្រចាំនៅប្រទេសម៉ាឡេស៊ី ក៏បានជួបជាមួយពួកគាត់ និងបានជួយជាស្បៀងអាហារខ្លះដល់ពួកគាត់ផងដែរ។
លោកបន្តថា៖ «បាទ! ខាងស្ថានទូតយើងបានទៅជួបពួកគាត់មួយចំនួន ហើយបានយកម្ហូបម្ហា និងសម្ភារមួយចំនួនទៅប្រគល់ជូនគាត់។ ហើយកន្លងមក ក៏មានសប្បុរសជននៅម៉ាឡេស៊ីហ្នឹងដែរ បានបរិច្ចាគនូវធនធានជាស្បៀងអាហារហ្នឹងទៅចែកជូនពួកគាត់ជាបន្តបន្ទាប់អីចឹងដែរ។ ហើយអារឿងគ្នាគាត់ជួយគ្នាគាត់ អាហ្នឹងជារឿងល្អមួយបន្ថែមទៀតហើយបាទ»។
មន្ត្រីសម្របសម្រួលកម្មវិធី នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅថា សង់ត្រាល់ (Central) លោក ឃុន ថារ៉ូ មានប្រសាសន៍ថា រដ្ឋាភិបាលគប្បីមានការសម្របសម្រួលជាមួយរដ្ឋាភិបាលម៉ាឡេស៊ី ដើម្បីអនុញ្ញាតឱ្យពលរដ្ឋទាំងនោះបានវិលមកកម្ពុជាវិញ ដូចករណីកម្ពុជាបានធ្វើជាមួយរដ្ឋាភិបាលប្រទេសក្នុងតំបន់អាស៊ាន និងប្រទេសមួយចំនួនទៀត។
លោកថា រដ្ឋាភិបាលកម្ពុជាគ្រាន់តែអនុវត្តតាមវិធានក្រសួងសុខាភិបាល ដូចជាការរកកន្លែងណាមួយសមរម្យដាក់ពួកគេនៅដាច់ដោយឡែក ១៤ថ្ងៃ ជាជាងការបណ្តោយឱ្យពួកគេរស់នៅទីនោះបន្តទៀត។
លោកបន្តថា៖ «ចំពោះពួកគាត់នៅណោះ អ្វីដែលខ្ញុំដឹងហ្នឹង គឺគាត់មានបញ្ហាប្រឈមទៅហ្នឹងការគាំពារមូលដ្ឋានចាំបាច់របស់គាត់ប្រចាំថ្ងៃ។ អ្នកខ្លះអត់មានការងារធ្វើ អ្នកខ្លះជានិស្សិត អ្នកខ្លះវីសាររបស់ពួកគាត់ផុតកំណត់។ អីចឹងអាហ្នឹងរដ្ឋត្រូវមានវិធានការជួយសម្របសម្រួលណាមួយដើម្បីឱ្យគាត់បានត្រឡប់មកប្រទេសកម្ពុជា ហើយនៅពេលពួកគាត់មក យើងអនុវត្តនូវវិធានការចាំបាច់ដែលក្រសួងសុខាភិបាល ជាមួយនឹងអង្គការសុខភាពពិភពលោកបានធ្វើកន្លងមកហ្នឹងទៅ ខ្ញុំគិតថា វាជារឿងមួយដែលប្រសើរណាស់ហើយ»។
ក្រសួងសុខាភិបាលអះអាងថា គិតត្រឹមថ្ងៃនេះ អ្នកឆ្លងជំងឺកូវីដ១៩ សរុបមានចំនួន ១២២នាក់។ ក្នុងចំណោម អ្នកជំងឺទាំងនោះ មានអ្នកជំងឺចំនួន ១១០នាក់ហើយដែលត្រូវបានព្យាបាលជាសះស្បើយ នៅឡើយសល់ ១២នាក់ទៀតប៉ុណ្ណោះ ដែលកំពុងសម្រាកព្យាបាលនៅមន្ទីរពេទ្យរដ្ឋ។ លើសពីនេះ ក្រសួងបញ្ជាក់ថា រយៈពេលជាង ១សប្តាហ៍មកហើយ ដែលកម្ពុជារកមិនឃើញអ្នកឆ្លងជំងឺកូវីដ១៩ ថ្មីនោះឡើយ៕