អាណាព្យាបាលសិស្សដែលរៀននៅសាលាអន្តរជាតិ CIA FIRST (អន្តរជាតិ ស៊ី អាយ អេ ហ្វីសត៍) ប្រមាណជាជិត ២០០នាក់ បានប្រមូលផ្តុំគ្នានៅមុខសាលា ដើម្បីតវ៉ាទាមទារឱ្យនាយកសាលាបញ្ចុះតម្លៃសិក្សា ៥០ភាគរយ អំឡុងពេលរៀនតាមអនឡាញ។
លោក ពេជ្យ សុភាព ដែលអះអាងថា ជាឪពុកសិស្សម្នាក់រៀននៅសាលាអន្តរជាតិ CIA ស្ថិតនៅផ្លូវ២០០៤ ភូមិត្រពាំងឈូក សង្កាត់ទឹកថ្លា ខណ្ឌសែនសុខ រាជធានីភ្នំពេញ បានឱ្យដឹងថា ជាច្រើនសារមកហើយដែលឪពុកម្តាយរបស់សិស្សស្នើសុំទៅនាយកសាលាបញ្ចុះតម្លៃរៀនតាមអនឡាញ (Online) ដល់សិស្ស ៥០ភាគរយ។ ក្រោយមក នាយកសាលា និងគណៈកម្មការសាលា បានជួបជាមួយឪពុកម្តាយរបស់សិស្ស ៣ ទៅ ៤ដងដែរ ប៉ុន្តែ សាលាមិនព្រមបញ្ចុះតម្លៃសិក្សាតាមការស្នើសុំនោះទេ ដោយថា សាលាមានលទ្ធភាពចុះឱ្យសិស្សរៀនថ្នាក់មតេយ្យ ២៥ភាគរយ និងថ្នាក់ទី១ ដល់ថ្នាក់ទី១២ ចុះត្រឹម១៥ភាគរយតែប៉ុណ្ណោះ។
ករណីនេះ លោកថា ធ្វើឱ្យឪពុកម្តាយសិស្សនាំគ្នាតវ៉ាទាមទារឱ្យនាយកសាលាចុះតម្លៃដល់សិស្សទាំងនោះ ពីព្រោះសេដ្ឋកិច្ចក្នុងគ្រួសារកំពុងធ្លាក់ចុះ ខណៈជំងឺកូវីដ១៩ កំពុងរីករាលដាល។
លោកនិយាយបន្តថា៖ «អ្វីដែលគាត់ចង់បានគឺកូនតូចៗ ត្រឹម K3 K4 K5 [ថ្នាក់មតេយ្យ] ឱ្យគាត់វិស្សមកាលទៅ ព្រោះអីគាត់រៀនអនឡាញអត់កើតទេ ហើយបើសិនជាកូនរៀន Grade 1 [ថ្នាក់ទី១] ដល់ Grade 12 [ថ្នាក់ទី១២] គាត់រៀនក៏រៀនទៅ ដោយសារគាត់រៀនអត់ពេញលេញ អញ្ចឹងគួរតែគិតយក ៥០ភាគរយទៅ»។
លោក ប៉ា ចន្ទរឿន ដែលមានកូនរៀននៅសាលា CIA FIRST ដែរ បាននិយាយថា កាលពីម្សិលមិញ អ្នកដឹកនាំក្រុមតវ៉ាបានដាក់ញត្តិទៅក្រសួងអប់រំឱ្យជួយអន្តរាគមន៍ដែរ ប៉ុន្តែ រហូតមកដល់ពេលនេះ មិនទាន់បានដំណោះស្រាយនៅឡើយ។ លោក ចន្ទរឿន ថាបើនាយកសាលាមិនធ្វើតាមការស្នើសុំទេ ឪពុកម្តាយសិស្សនឹងនាំគ្នាតវ៉ាទ្រង់ទ្រាយធំនៅមុខសាលា នាថ្ងៃសៅរិ៍ចុងសប្តាហ៍នេះបន្តទៀត។
លោកបញ្ជាក់ថា៖ «យើងទុកពេលឱ្យសាលាពិចារណាដល់ថ្ងៃសុក្រ។ បើសិនជាត្រឹមម៉ោង ១២យប់ថ្ងៃសុក្រ មិនមានចម្លើយវិជ្ជមាន ពួកយើងនឹងធ្វើការតវ៉ាម្តងទ្រង់ទ្រាយធំជាងនេះទៀតនៅព្រឹកថ្ងៃសៅរ៍។ បើសិនជាមិនមានដំណោះស្រាយទៀត យើងនឹងបន្តធ្វើការតវ៉ាបន្តទៀត»។
ប្រធានសមាគមគ្រូបង្រៀនកម្ពុជាឯករាជ្យ លោកស្រី អ៊ុក ឆាយ៉ាវី មានប្រសាសន៍ថា បើសាលាអន្តរជាតិ CIA មិនរកដំណោះស្រាយរួមទេ នឹងធ្វើឱ្យខាតប្រយោជន៍ទាំងសងខាង។
លោកស្រីមានប្រសាសន៍ថា៖ «នាយកសាលាគួរតែធ្វើចិត្តឱ្យទូលាយ រួមចំណែកទាំងអស់គ្នា ក្នុងពេលមានជំងឺកូវីដ បញ្ហាប្រឈមដូចជា រឿងសេដ្ឋកិច្ចក៏ធ្លាក់ចុះ មិនថាយើង [កម្ពុជា] ប្រទេសគេក៏អញ្ចឹងដែរ។ បើសិនជាយើង [នាយកសាលា] ធ្វើឱ្យគាត់ [ឪពុកម្តាយ] បាត់ទំនុកចិត្ត ដូចថាអត់មានការយល់យោគ ដល់ពេលបញ្ចប់កូវីដ១៩ អាចធ្វើឱ្យពួកគេលែងឱ្យកូនទៅរៀននៅសាលាហ្នឹង»។
សេចក្តីជូនដំណឹងរបស់សាលាអន្តរជាតិ ស៊ី អាយ អេ ហ្វីសត៍ ដែលចេញផ្សាយនៅថ្ងៃនេះ បានលើកឡើងថា កាលពីថ្ងៃ១៧ ខែមេសា បន្ទាប់ពីជំនួបជាមួយអាណាព្យាបាលសិស្ស សាលាបានសម្រេចលុបចោលអាហារូបករណ៍ ៥០ភាគរយ ដែលខ្លួនផ្តល់ឱ្យសិស្សចំនួន ២០០នាក់ ដោយប្តូរទៅជាការបញ្ចុះតម្លៃជារួម ក្នុងន័យអនុវត្តន៍ការទទួលខុសត្រូវផ្នែកសង្គមរបស់ក្រុមហ៊ុនធុរកិច្ច។ សម្រាប់ថ្នាក់មត្តេយ្យ សាលាបញ្ចុះតម្លៃជូន ២៥ភាគរយ ហើយសម្រាប់ថ្នាក់ទី១ ដល់ថ្នាក់ទី១២ សាលាបញ្ចុះតម្លៃ ១៥ភាគរយ។
ក្រសួងអប់រំ យុវជន និងកីឡា កាលពីថ្ងៃទី១៧ ខែមេសានេះ ប្រកាសពន្យារពេលចូលរៀនវិញសម្រាប់ការសិក្សាគ្រប់កម្រិតទាំងអស់នៅទូទាំងប្រទេស ដោយមិនកំណត់ពេលរហូតដល់មានការប្រកាសថ្មី ដើម្បីបង្ការជំងឺឆ្លងកូវីដ១៩។ ក្រសួងក៏បានជំរុញដល់អាជ្ញាធរដែនដី សហការជាមួយមាតាបិតាសិស្ស សហការគ្នាជំរុញឱ្យសិស្សានុសិស្សរៀនពីចម្ងាយ។
ក្រសួងអប់រំចេញបានដាក់ចេញនូវកម្មវិធីសិក្សាពីចម្ងាយដែលចាប់ផ្តើមពីថ្ងៃទី២០ ខែមេសា រហូតតទៅ ដោយមិនទាន់កំណត់ថេរវេលាបញ្ចប់ឡើយ។ ការបង្រៀននេះផ្សាយតាមរយៈទូរទស្សន៍ខ្សែកាបតាមបណ្ដាខេត្តទូទាំងប្រទេស ទូរទស្សន៍ជាតិកម្ពុជាទី២ TVK2 ដែលផ្សាយសាកល្បងតាមប្រព័ន្ធផ្កាយរណប DTV ប៉ុស្តិ៍លេខ២២ ផ្សាយតាមទំព័រហ្វេសប៊ុកផ្លូវការ យូធូបផ្លូវការ និងមជ្ឈមណ្ឌលសិក្សាអេឡិចត្រូនិចរបស់ក្រសួងអប់រំ៕
