មន្ត្រីជាន់ខ្ពស់ទទួលបន្ទុកកិច្ចការព្រំដែនកម្ពុជា អះអាងថា វៀតណាមបានរំលោភបំពានលើកិច្ចព្រមព្រៀងឆ្នាំ១៩៩៥ បន្ទាប់ពីកម្ពុជារកឃើញទាហានវៀតណាមបោះតង់លើតំបន់មិនទាន់ឯកភាពគ្នារវាងប្រទេសទាំងពីរ ប៉ុន្តែ កម្ពុជាមិនធ្វើកំណត់ទូតតវ៉ាទៅរដ្ឋាភិបាលវៀតណាមនោះឡើយ។
ក្នុងទំព័រហ្វេសប៊ុករបស់ស្នងការដ្ឋាននគរបាលខេត្តកណ្ដាល ឱ្យដឹងថា កាលពីថ្ងៃទី២៦ ខែមេសា ឆ្នាំ២០២០ នគរបាលខេត្តនេះ បានចុះពិនិត្យតាមបណ្ដោយព្រំដែនស្ថិតនៅស្រុកកោះធំ ខេត្តកណ្ដាល។ ការចុះទៅពិនិត្យនោះ សមត្ថកិច្ចបានរកឃើញតង់ចំនួន ៩កន្លែង ដែលទាហានវៀតណាមសាងសង់នៅតំបន់ភាគីកម្ពុជា-វៀតណាមមិនទាន់ឯកភាពគ្នា។
បន្ទាប់ពីរកឃើញនោះ ស្នងការខេត្តកណ្ដាល និងមេបញ្ជាការវរៈការពារព្រំដែន បានស្នើទៅទានហានវៀតណាម ឱ្យរុះរើតង់ចំនួន ៩កន្លែង ចេញពីតំបន់ដែលភាគីកម្ពុជា-វៀតណាមមិនទាន់ឯកភាពគ្នា ស្ថិតនៅស្រុកកោះធំ ខេត្តកណ្ដាល។
អ្នកនាំពាក្យស្នងការនគរបាលខេត្តកណ្ដាល លោក ចាន់ សាវឿន បានប្រាប់ថា មន្ត្រីយោធាព្រំដែនវៀតណាម បានបោះតង់នៅតំបន់នោះ ដើម្បីចូលរួមប្រយុទ្ធប្រឆាំងនឹងការរីករាលដាលនៃវីរុសកូវីដ១៩។ លោកបន្ថែមថា លោកមិនបានដឹងថា តើខាងមន្ត្រីយោធាវៀតណាមនឹងបន្តបោះតង់នៅតំបន់នោះរហូតដល់ពេលណានោះទេ។
លោក ចាន់ សាវឿន ប្រាប់ថា៖ «គេបោះតង់នៅពេលដែលយើងចាប់ផ្ដើមអនុវត្តចូលរួមប្រយុទ្ធប្រឆាំងវីរុសកូវីដ១៩។ ខាងគេធ្វើដូចយើងដែរ។ ការល្បាត វាតួនាទីផ្សេងគ្នា តួនាទីយើងល្បាតនៅតាមផ្លូវរបស់យើង។ ការពិតគេរឹតបន្តឹងការឆ្លងដែនមែន នៅពេលដែលគេប្រយុទ្ធប្រឆាំងជំងឺកូវីដ១៩ គេតឹងតែង ការឆ្លងដែនមិនឱ្យប្រជាពលរដ្ឋឆ្លងដែនអ៊ីចឹង»។
ប្រធានគណៈកម្មាធិការព្រំដែនកម្ពុជា លោក វ៉ា គឹមហុង អះអាងប្រាប់វីអូឌីនៅថ្ងៃនេះថា ចំណុចដែលមន្ត្រីយោធាវៀតណាមបោះតង់នោះ គឺជាតំបន់មិនទាន់មានការឯកភាពគ្នារវាងប្រទេសទាំងពីរនៅឡើយទេ ហើយលោកថា ទង្វើរបស់ភាគីវៀតណាម គឺជាការរំលោភបំពានលើកិច្ចព្រមព្រៀងរវាងមេដឹកនាំប្រទេសទាំងពីរ ចុះថ្ងៃទី១៧ ខែមករា ឆ្នាំ១៩៩៥។
លោក វ៉ា គឹមហុង ប្រាប់ថា៖ «រឿងហ្នឹង យើងមិនអនុញ្ញាតឱ្យគេធ្វើដូច្នេះទេ ព្រោះថា តំបន់ហ្នឹងមិនទាន់ឯកភាពគ្នាក្នុងការកំណត់ខណ្ឌសីមាបោះបង្គោលក៏ដោយ ក៏ជាតំបន់ដែលយើងរក្សាទុកឱ្យនៅស្ថានភាពដដែល ដូចជា ការឯកភាពគ្នានាយករដ្ឋមន្រ្តីទាំងពីរ ចុះថ្ងៃទី១៧ ខែមករា ឆ្នាំ១៩៩៥ រក្សាស្ថានភាពដដែល។ ការដែលវៀតណាមបោះតង់នោះ វាជាការរំលោភការឯកភាពគ្នារវាងនាយករដ្ឋមន្ត្រីទាំងពីរហើយ។ អ៊ីចឹងហើយបានយើងស្នើសុំឱ្យរុះរើដកថយទៅខាងដីវៀតណាមវិញ»។
លោកបន្តថា ទោះបីជាភាគីវៀតណាមបានបោះតង់ចូលតំបន់មិនទាន់ឯកភាពគ្នាក៏ពិតមែន លោកថា គណៈកម្មាធិការព្រំដែនមិនធ្វើកំណត់ទូតតវ៉ាផ្ញើទៅភាគីវៀតណាមនោះទេ ប្រសិនវៀតណាមយល់ព្រមរុះរើតង់ចេញវិញ។
លោក គឹមហុង បន្តថា៖ «ខាងគណៈកម្មាធិការព្រំដែនមិនធ្វើអីទៀតទេ បើសិនជាគេព្រមទទួលស្គាល់ គេរុះរើ បានន័យថា គេទទួលស្គាល់ខុសច្បាប់ហើយ។ បើគេរុះរើហើយ យើងមិនចាំបាច់ទៅសរសេរអីទៀតទេ តវ៉ាជាកំណត់ទូតជាលាយលក្ខណ៍អក្សរអីទៀតទេ ដូចជាមិនចាំបាច់ទេ។ អាហ្នឹងជាសេចក្ដីសម្រេចខាងក្រសួងការបរទេសទេ ប៉ុន្តែ ខ្ញុំខាងព្រំដែន ខ្ញុំគិតថា មិនធ្វើអីទៀតទេ ប៉ុន្តែ បើគេមិនព្រមរុះរើ អាហ្នឹងយើងធ្វើលិខិតលាយលក្ខណ៍អក្សរខាងព្រំដែន ប៉ុន្តែ កំណត់ទូត ខាងក្រសួងការបរទេស»។
អ្នកនាំពាក្យក្រសួងការបរទេសកម្ពុជា លោក កុយ គួង មានប្រសាសន៍ថា ក្រសួងកំពុងធ្វើការសិក្សាចំពោះករណីនេះ។
លោក កុយ គួង ប្រាប់ថា៖ «យើងកំពុងសិក្សារបាយការណ៍ កំពុងតាមដានសភាពការណ៍ហ្នឹងសិន ហើយនិងរបាយការណ៍ពីអាជ្ញាធរមូលដ្ឋានសិន»។
សមាជិកឃ្លាំមើលកម្ពុជា និងជាអ្នកតាមដានបញ្ហាព្រំដែន លោក រ៉ុង ឈុន ហៅការមិនសរសេរលិខិតជាលាយលក្ខណ៍អក្សរទៅភាគីវៀតណាមនេះថា ជារឿងមិនត្រឹមត្រូវ។ លោកបន្តថា ប្រសិនបើរដ្ឋាភិបាលមិនសរសេរលិខិតជាលាយលក្ខណ៍អក្សរទៅប្រទេសដែលបានរំលោភចូលអធិបតេយ្យកម្ពុជា លោកថា នៅថ្ងៃខាងមុខ ករណីនេះនឹងកើតឡើងបន្តទៀត។
លោក រ៉ុង ឈុន ប្រាប់ថា៖ «ថ្ងៃក្រោយទៅ ពេលយើងភ្លេចខ្លួន ពេលណាមួយនឹងមានចូលបន្តបន្ទាប់ទៀត។ បើនៅតែស្ងៀមយូរៗ គេកាន់តែចូលស៊ីជម្រៅ។ អ៊ីចឹងហើយបានជាខ្ញុំចង់ឱ្យគណៈកម្មាធិការព្រំដែន ឬមួយរដ្ឋាភិបាលកម្ពុជា ត្រូវតែកំណត់ទូតមួយទៅដល់រដ្ឋាភិបាលយួន ដើម្បីបញ្ជាក់អំពីសកម្មភាពការរំលោភបំពានមកលើអធិបតេយ្យភាពកម្ពុជាយើងហ្នឹង»។
កម្ពុជា និងវៀតណាម មានព្រំដែនគោករួមគ្នាប្រវែង ១២៧០គីឡូម៉ែត្រ ដោយនាយករដ្ឋមន្រ្តីប្រទេសទាំងពីរបានចុះហត្ថលេខាទទួលស្គាល់បង្គោលព្រំដែនគោកបោះរួមចំនួន ៣១៤បង្គោល ស្មើ ៨៤ភាគរយ។ ចំណែកចំណុចមិនឯកភាពគ្នានៅសេសសល់ ១៦ភាគរយទៀត នឹងធ្វើបន្តបន្ទាប់ពីភាគីបារាំងផ្តល់ផែនទីចម្លងតាមមាត្រដ្ឋានបំប្លែងពីខ្នាត ១/១០០,០០០ មកខ្នាត ១/៥០០,០០០ តាមកិច្ចព្រមព្រៀងទ្វេភាគី៕
