មន្ត្រីជាន់ខ្ពស់ទទួលបន្ទុកកិច្ចការព្រំដែនកម្ពុជា អះអាងថា គណៈកម្មាធិការនេះ កំពុងពិនិត្យលើរបាយការណ៍សមត្ថកិច្ចជាមុនសិន មុននឹងធ្វើកំណត់ទូតតវ៉ាជាមួយភាគីវៀតណាម បន្ទាប់ពីកម្ពុជារកឃើញទាហានវៀតណាមបោះតង់លើតំបន់មិនទាន់ឯកភាពគ្នារវាងប្រទេសទាំងពីរ។
កាលពីថ្ងៃទី២៦ ខែមេសា ឆ្នាំ២០២០ ស្នងការដ្ឋាននគរបាលខេត្តកណ្ដាល បានសរសេរលើទំព័រហ្វេសប៊ុកថា នគរបាលខេត្តនេះ បានចុះពិនិត្យតាមបណ្ដោយព្រំដែននៅស្រុកកោះធំ។ ការចុះទៅពិនិត្យនោះ សមត្ថកិច្ចបានរកឃើញទាហានវៀតណាមបោះតង់ចំនួន ៩កន្លែងនៅលើតំបន់ភាគីកម្ពុជា-វៀតណាមមិនទាន់ឯកភាពគ្នា។
អ្នកនាំពាក្យក្រសួងការបរទេសកម្ពុជា លោក កុយ គួង ប្រាប់វីអូឌីតាមប្រព័ន្ធតេឡេក្រាមថា ក្រសួងកំពុងរង់ចាំរបាយការណ៍វាយតម្លៃរបស់គណៈកម្មាធិការព្រំដែនចម្រុះកម្ពុជា។
លោក កុយ គួង ប្រាប់ថា៖ «ពេលនេះ ក្រសួងកំពុងរង់ចាំរបាយការណ៍វាយតម្លៃរបស់គណៈកម្មាធិការព្រំដែនចម្រុះកម្ពុជា»។
ប្រធានគណៈកម្មាធិការព្រំដែនកម្ពុជា លោក វ៉ា គឹមហុង អះអាងប្រាប់វីអូឌីនៅថ្ងៃនេះថា អាជ្ញាធរខេត្តកណ្ដាលបានបញ្ជូនរបាយការណ៍អំពីបញ្ហានេះកាលពីម្សិលមិញ។ លោកបន្តថា ខាងគណៈកម្មាធិការកំពុងពិនិត្យឱ្យបានច្បាស់ មុននឹងធ្វើកំណត់ទូតតវ៉ាទៅភាគីវៀតណាម។
លោក វ៉ា គឹមហុង ប្រាប់ថា៖ «យើងកំពុងអង្គុយមើល អង្គុយធ្វើកិច្ចការហ្នឹង។ យូរ! យើងថាមិនបានទេ ព្រោះយើងធ្វើកិច្ចការហ្នឹង វាច្រើន ត្រូវការយកយាមការអីហ្នឹង ខ្ញុំមិនបន្ទោសខេត្តទេ។ យើងត្រូវយកយាមការអីឱ្យប្រាកដប្រជា ច្បាស់នៅត្រង់ណាៗអី បានយើងសរសេរលិខិតតវ៉ាគេ»។
នៅពេលអ្នកសារព័ត៌មានវីអូឌីសួរថា តើមកដល់ថ្ងៃនេះ វៀតណាមរុះរើតង់ទាំងនោះអស់ហើយឬនៅនោះ លោក វ៉ា គឹមហុង សុំមិនធ្វើអត្ថាធិប្បាយលម្អិតទេ ដោយលោកប្រាប់ឱ្យទៅសួរអាជ្ញាធរខេត្តកណ្ដាលវិញ។
អភិបាលខេត្តកណ្ដាល លោក គង់ សោភ័ណ្ឌ មានប្រសាសន៍ថា ភាគីវៀតណាមមិនទាន់រុះរើតង់ដែលបានបោះនោះនៅឡើយទេ។ លោកបន្តថា អាជ្ញាធរបានធ្វើលិខិតដាក់ទៅភាគីវៀតណាមកាលពីមិ្សលមិញ ដើម្បីឱ្យភាគីវៀតណាមរុះរើតង់ចេញ ដោយមិនត្រូវរង់ចាំទាល់តែចប់កូវីដ១៩នោះទេ។
លោក គង់ សោភ័ណ្ឌ មានប្រសាសន៍ថា៖ «នៅម្ដុំក្អមសំណ គាត់ក៏រើទៅក្នុងបន្តិច តាមរយៈដែលកម្លាំងយើងទៅប្រាប់ផ្ទាល់ ប៉ុន្តែ រើជារួមតែម្ដង គឺនៅទេ ប៉ុន្តែ យើងបានធ្វើលិខិតរដ្ឋបាលជម្រាបទៅខាងខេត្តអាងយ៉ាង [វៀតណាម] ហើយថា សូមឱ្យមានវិធានការរុះរើ ព្រោះរឿងនេះ យើងអត់ទាន់បានជជែកពិភាក្សាគ្នាទេ ព្រោះរាល់កិច្ចការទាំងអស់មុននឹងយើងធ្វើកិច្ចការអីមួយពាក់ព័ន្ធនឹងព្រំដែនរវាងគ្នាហ្នឹង យើងតែងតែមានការជូនដំណឹងគ្នាទៅវិញទៅមក ហើយប្រកាន់លើកិច្ចការច្បាប់នៅក្នុងកិច្ចសហប្រតិបត្តិការនឹងគ្នា»។
លោក គង់ សោភ័ណ្ឌ បន្តថា អាជ្ញាធរបានពង្រឹងការចុះល្បាតនៅទីតាំងនោះ បើទោះបីជាវៀតណាមបោះតង់នៅតំបន់នោះ ដើម្បីចូលរួមប្រយុទ្ធប្រឆាំងនឹងការរីករាលដាលនៃវីរុសកូវីដ១៩ក៏ដោយ។
ក្រុមប្រឹក្សាឃ្លាំមើលកម្ពុជា កាលពីម្សិលមិញនេះ បានអំពាវនាវទៅរដ្ឋាភិបាលឱ្យពិចារណាលុបចោលនូវសន្ធិសញ្ញាព្រំដែនបំពេញបន្ថែមឆ្នាំ២០០៥ និងសន្ធិសញ្ញាឆ្នាំ២០១៩ ដែលបានបំពេញខ្លឹមសារបន្ថែមទៅលើសន្ធិសញ្ញាកំណត់ព្រំដែនរដ្ឋឆ្នាំ១៩៨៥ ដោយក្រុមប្រឹក្សានេះថា ជាសន្ធិសញ្ញាខុសច្បាប់ ដែលផ្ទុយនឹងកិច្ចព្រមព្រៀងទីក្រុងប៉ារីសឆ្នាំ១៩៩១ និងផ្ទុយមាត្រា២ និងមាត្រា៥៥ នៃរដ្ឋធម្មនុញ្ញារបស់កម្ពុជា។
សមាជិកប្រឹក្សាឃ្លាំមើលកម្ពុជា និងជាអ្នកតាមដានបញ្ហាព្រំដែន លោក រ៉ុង ឈុន ជំរុញទៅរដ្ឋាភិបាលធ្វើកំណត់ទូតតវ៉ាទៅរដ្ឋាភិបាលវៀតណាមឱ្យបានច្បាស់លាស់ ដើម្បីកុំឱ្យភាគីវៀតណាមរំលោភចូលអធិបតេយ្យកម្ពុជាទៀត។ ក្រៅពីធ្វើកំណត់ទូតទៅភាគីវៀតណាមហើយ លោកថា កម្ពុជាត្រូវធ្វើកំណត់ទូតមួយទៀត ដាក់ទៅសហគមន៍អន្តរជាតិឱ្យដឹងលឺចំពោះរឿងនេះ។
លោក រ៉ុង ឈុន ប្រាប់ថា៖ «យើងធ្វើលិខិតមួយដាក់ទៅជូនប្រទេសហត្ថលេខីនៃកិច្ចព្រមព្រៀងទីក្រុងប៉ារីស ជម្រាបអាជ្ញាធរយួនរំលោភបំពានឈ្លានពានមកលើអធិបតេយ្យដែនដីនៃកម្ពុជាយើង។ បើយើងដាក់លិខិតទៅប្រទេសម្ចាស់ហត្ថលេខី អាហ្នឹង យើងមានភាពរឹងមាំជាង ដើម្បីឱ្យប្រទេសម្ចាស់ហត្ថលេខីជួយដឹងលឺ ហើយជូយធ្វើអន្តរាគមន៍ទៅលើការរំលោភបំពានពីសំណាក់អាជ្ញាធរយួនមកលើកម្ពុជា»។
កម្ពុជា និងវៀតណាម មានព្រំដែនគោករួមគ្នាប្រវែង ១២៧០គីឡូម៉ែត្រ ដោយនាយករដ្ឋមន្រ្តីប្រទេសទាំងពីរបានចុះហត្ថលេខាទទួលស្គាល់បង្គោលព្រំដែនគោកបោះរួមចំនួន ៣១៤បង្គោល ស្មើនឹង ៨៤ភាគរយ។ ចំណែកចំណុចមិនឯកភាពគ្នានៅសេសសល់ ១៦ភាគរយទៀត នឹងបោះបន្ត បន្ទាប់ពីភាគីបារាំងផ្តល់ផែនទីមក៕
