សមត្ថកិច្ចជំនាញឱ្យដឹងថា មន្ទីរប្រឆាំងគ្រឿងញៀន នៃអគ្គស្នងការដ្ឋាននគរបាលជាតិ បានចាប់ខ្លួនជនបរទេសពីរនាក់ និងបង្រ្កាបបទល្មើសកែច្នៃ ជួញដូរគ្រឿងញៀន និងរឹបអូសថ្នាំញៀនប្រភេទអិចស្តាស៊ី ចំនួន ១៤ម៉ឺនគ្រាប់ ឬស្មើ ៥៧គីឡូក្រាម នៅរាជធានីភ្នំពេញ។
អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន លោក មាស វិរិទ្ធិ ប្រាប់ថា ការបង្ក្រាបនេះ ធ្វើឡើងនៅចំណុចភូមិត្រពាំងពោធិ៍ សង្កាត់ចោមចៅ ខ័ណ្ឌពោធិសែនជ័យ កាលពីរសៀលថ្ងៃម្សិលមិញ។ លោក មាស វិរិទ្ធិ មានប្រសាសន៍ថា បរទេសទាំងពីរនាក់នោះជាប្តីប្រពន្ធនឹងគ្នា ដោយបុរសជាជនជាតិចិន និងស្ត្រីជាជនជាតិភូមា ហើយពួកគេ និងវត្ថុតាង បច្ចុប្បន្នស្ថិតនៅមន្ទីរប្រឆាំងគ្រឿងញៀន ដែលកំពុងត្រួតពិនិត្យករណីនេះឡើងវិញ។
លោក មាស វិរិទ្ធិ ប្រាប់ថា៖ «បន្តទៀត នឹងរកឱ្យឃើញថា តើអាហ្នឹង [គ្រឿងញៀន] វា [ជនល្មើស] ផលិត ឬមួយវាយ៉ាងម៉េច វាកែច្នៃ ដើម្បីសន្និដ្ឋានឱ្យបានត្រឹមត្រូវ»។
របាយការណ៍របស់មន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិ បង្ហាញថា ក្នុងឆ្នាំ២០១៩ សមត្ថកិច្ចបង្ក្រាបគ្រឿងញៀនបានជិត ១ម៉ឺន (៩៨០៦) ករណី និងបានឃាត់ខ្លួនអ្នកពាក់ព័ន្ធជិត ២ម៉ឺន ៥រយ (២០ ៤៨៩) នាក់ ព្រមទាំងរឹបអូសគ្រឿងញៀនបានចំនួនជាង ៧៥០គីឡូក្រាម។
កាលពីខែកុម្ភៈ រដ្ឋមន្ត្រីក្រសួងមហាផ្ទៃ លោក ស ខេង ថ្លែងថា ទោះបីរដ្ឋាភិបាលខិតខំកសាងពន្ធនាគារយ៉ាងណាក៏មិនគ្រប់គ្រាន់ដែរ ដោយសារការចាប់ខ្លួនអ្នកពាក់ព័ន្ធគ្រឿងញៀន មានចំនួនច្រើនក្នុង១ថ្ងៃៗ ស្របពេលដែលពន្ធនាគារមួយចំនួនពេញទៅដោយអ្នកជាប់ឃុំ និងខ្លះទៀតកំពុងចង្អៀតណែន។
លោក ស ខេង ផ្តល់ជាគំនិតពេលនោះថា ដើម្បីដោះស្រាយការចង្អៀតណែនក្នុងពន្ធនាគារ គឺធ្វើយ៉ាងណា ពន្លឿនការកាត់ទោសអ្នកជាប់ឃុំទាំងនោះឱ្យបានឆាប់រហ័ស ឬលើកលែងទោសមួយចំនួនពាក់ព័ន្ធករណីគ្រឿងញៀនជាដើម៕
