ប្រមុខរដ្ឋស្ដីទី លោក សាយ ឈុំ បានសម្រេចបញ្ចប់តួនាទីរបស់លោក សុខសុវណ្ណ វឌ្ឍនាសាប៊ុង ប្រធានគណបក្សខ្មែរក្រោក ពីសមាជិកនៃឧត្ដមក្រុមប្រឹក្សាពិគ្រោះ និងផ្ដល់យោបល់នៅថ្ងៃនេះ តែ២ថ្ងៃប៉ុណ្ណោះក្រោយក្បួនរថយន្តរបស់លោកបានប្រឈមមុខដាក់គ្នាជាមួយក្រុមមន្ត្រីបរិស្ថាន ស្ថិតនៅស្រុកព្រៃនប់ ខេត្តព្រះសីហនុ។
ក្នុងលិខិតនៅថ្ងៃនេះ ប្រមុខរដ្ឋស្ដីទី លោក សាយ ឈុំ បានសម្រេចបញ្ចប់តំណែងមេបក្សខ្មែរក្រោក លោក សុខសុវណ្ណ វឌ្ឍនាសាប៊ុង ពីសមាជិកឧត្ដមក្រុមប្រឹក្សាពិគ្រោះ និងផ្ដល់យោបល់។ នៅក្នុងក្រុមប្រឹក្សានេះ មេបក្សនយោបាយរូបនេះ មានឋានៈស្មើនឹងទេសរដ្ឋមន្ត្រី។
លោក សាយ ឈុំ បានសម្រេចបែបនេះទៅតាមការស្នើសុំពីលោកនាយករដ្ឋមន្ត្រី ហ៊ុន សែន។
ការបញ្ចប់តំណែងរបស់លោក សុខសុវណ្ណ វឌ្ឍនាសាប៊ុង កើតឡើងតែពីរថ្ងៃប៉ុណ្ណោះ ក្រោយពីមេបក្សខ្មែរក្រោករូបនេះ និងសហការីរបស់លោក ប្រឈមមុខនឹងក្រុមមន្ត្រីអភិរក្សបរិស្ថាននៅស្រុកព្រៃនប់ ខេត្តព្រះសីហនុ។
ក្នុងវីដេអូដែលផ្សាយផ្ទាល់លើទំព័រហ្វេសប៊ុករបស់លោកកាលពីថ្ងៃទី០២ ខែឧសភាសប្ដាហ៍មុន មេបក្សខ្មែរក្រោករូបនេះ បានរៀបរាប់ថា លោក និងសហការីរបស់លោក បានព្យាយាមចូលស្វែងរកការពិតរឿងបង្ខាំងប្រជាពលរដ្ឋនៅតំបន់ស្មាច់ដែង ស្ថិតនៅក្នុងឃុំរាម ប៉ុន្តែ ក្បួនរថយន្តរបស់លោកត្រូវបានរារាំងដោយមនុស្សមួយក្រុមស្លៀកពាក់ឈុតមន្ត្រីបរិស្ថាន និងមួយក្រុមទៀតស្លៀកពាក់ឈុតសន្តិសុខពណ៌ខ្មៅ។
លោក សុខសុវណ្ណ វឌ្ឍនាសាប៊ុង បានអះអាងថា លោកទទួលដំណឹងថា អាជ្ញាធរបានប្រើប្រាស់ហិង្សាបង្ខាំងពលរដ្ឋមានចំនួនចន្លោះពី ៣០ ទៅ ៥០នាក់ នៅភូមិស្មាច់ដែង។
មេបក្សរូបនេះ បានចោទមន្ត្រីពាក់ព័ន្ធថា បានព្យាយាមបិទបាំងការពិត និងបង្កើតចលនា«អប្បគមន៍»នៅទីនោះ។
ប៉ុន្តែ ការចោទប្រកាន់នេះ ត្រូវបានក្រសួងបរិស្ថានចេញសេចក្ដីប្រកាសព័ត៌មានច្រានចោលកាលពីថ្ងៃម្សិលមិញនេះ ដោយថា មេបក្សនយោបាយរូបនេះ មិនយល់ពីនីតិវិធីនៃការបំពេញការងារ និងមានចរិត«ក្រអឺតក្រទម»។
ឧត្ដមក្រុមប្រឹក្សាពិគ្រោះ និងផ្ដល់យោបល់ ប្រមូលផ្ដុំទៅដោយសមាសភាពមកពីគណបក្សនយោបាយចំនួន ១៦ ក្នុងចំណោមបក្សនយោបាយចំនួន ២០ ដែលបានចូលរួមការបោះឆ្នោតជាតិឆ្នាំ២០១៨។
ឧត្ដមក្រុមប្រឹក្សាមួយនេះ ត្រូវបានបង្កើតឡើងកាលពីដើមខែកញ្ញា ឆ្នាំ២០១៨ តែជាង ១ខែប៉ុណ្ណោះក្រោយពីការបោះឆ្នោតជាតិខែកក្កដា ដែលមានគណបក្សនយោបាយចំនួន១៩ ចូលរួមប្រកួតប្រជែងនឹងគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន ប៉ុន្តែ គ្មានការចូលរួមពីគណបក្សសង្គ្រោះជាតិដែលត្រូវបានរំលាយចោល និងហាមឃាត់ធ្វើនយោបាយនោះឡើយ៕