បណ្ដឹងជំទាស់របស់មេធាវីមេបក្សប្រឆាំង លោក កឹម សុខា ដែលកំពុងស្ថិតនៅក្រោមសំណុំរឿងចោទប្រកាន់ពីបទ«ក្បត់ជាតិ»នោះ នឹងត្រូវបើកសវនាការជំនុំជម្រះនៅសប្ដាហ៍ក្រោយនេះ។
ក្នុងដីកាកោះមួយចុះថ្ងៃទី៣០ ខែមេសាកន្លងមកនេះ ព្រះរាជអាជ្ញាសាលាឧទ្ធរណ៍ លោក តាន់ សេណារ៉ុង បានកោះហៅអតីតមេដឹកនាំគណបក្សសង្គ្រោះជាតិ លោក កឹម សុខា ឱ្យចូលរួមសវនាការជំនុំជម្រះមួយ នៅរសៀលថ្ងៃទី១៣ ខែឧសភាខាងមុខនេះ។
លោក ចាន់ ចេន សហមេធាវីការពារក្ដីឱ្យលោក កឹម សុខា បានប្រាប់វីអូឌីនៅថ្ងៃនេះថា ក្រុមមេធាវីរបស់មេដឹកនាំបក្សប្រឆាំងរូបនេះ បានសម្រេចប្ដឹងទៅសាលាឧទ្ធរណ៍កាលពីថ្ងៃទី២៥ ខែមីនាកន្លងមក ដើម្បីជំទាស់ទៅនឹងចៅក្រមសាលាដំបូងរាជធានីភ្នំពេញ ដែលបានទទួលយកភស្តុតាងបន្ថែមទៅតាមសំណើរបស់តំណាងអយ្យការដែលជាភាគីដើមបណ្ដឹងតំណាងរដ្ឋាភិបាល។
មេធាវីរូបនេះបញ្ជាក់ថា ក្រុមមេធាវីការពារក្ដីរបស់លោក កឹម សុខា បានឃើញភស្តុតាងបន្ថែមនោះហើយ ដែលត្រូវបានបង្ហាញអំឡុងពេលសវនាការកន្លងមក។ លោកប្រាប់ថា ភស្តុតាងបន្ថែមដែលតំណាងអយ្យការដាក់បន្ថែមទៅក្នុងសំណុំរឿងចោទប្រកាន់លោក កឹម សុខា នោះ គឺជាវីដេអូខ្លីៗដែលតំណាងអយ្យការទទួលបានពីសមត្ថកិច្ច ហើយវីដេអូទាំងនោះមានចំនួន ៥ ឬក៏ ៦ឃ្លីប បង្ហាញលោក កឹម សុខា ថ្លែងអំឡុងពេល និងក្រោយការបោះឆ្នោតថ្នាក់ជាតិឆ្នាំ២០១៣។
លោក ចាន់ ចេន ប្រាប់ថា៖ «វីដេអូហ្នឹង គឺជាវីដេអូដែលសមត្ថកិច្ចផ្ដល់មកឱ្យហ្នឹង មានដូចជា ៥ ឬ ៦វីដេអូ ពាក់ព័ន្ធអារឿងលោក កឹម សុខា ថ្លែងអំឡុងពេលបោះឆ្នោត និងក្រោយបោះឆ្នោត [ឆ្នាំ២០១៣]»។
អ្នកស្រី ម៉េង សុភារី សហមេធាវីមួយរូបទៀតដែលការពារក្ដីឱ្យលោក កឹម សុខា បានប្រាប់ថា ក្រុមមេធាវីមិនឯកភាពទៅនឹងប្រធានចៅក្រមជំនុំជម្រះនៃសាលាដំបូងរាជធានីភ្នំពេញ លោក កូយ សៅ ដែលបានសម្រេចទទួលយកភស្តុតាងបន្ថែមពីតំណាងអយ្យការនោះឡើយ។
មេធាវីរូបនេះ បានចោទសួរថា ហេតុអ្វីបានជាត្រូវទទួលយកភស្តុតាងបន្ថែម បន្ទាប់ពីតំណាងអយ្យការបានធ្វើសេចក្ដីសន្និដ្ឋានរួចរាល់ហើយនៅលើដីកាបញ្ជូន ដែលបញ្ជាក់ថា មានភស្តុតាងគ្រប់គ្រាន់សម្រាប់ដាក់បន្ទុកលើកូនក្ដីរបស់អ្នកស្រីហើយនោះ។
អ្នកស្រី ម៉េង សុភារី និយាយថា៖ «បើមានភស្តុតាងថ្មីដែលត្រូវដាក់មក សួរថា តើការស៊ើបអង្កេតកន្លងមកនេះ គឺមិនទាន់មានភស្តុតាងគ្រប់គ្រាន់ ឬយ៉ាងណា។ នេះជាសំណួរដែលយើងខ្ញុំចោទសួរ»។
ក្នុងអត្ថបទរបស់វីអូឌីកាលពីខែមីនាកន្លងមក ចៅក្រមជំនុំជម្រះនៃសាលាដំបូងរាជធានីភ្នំពេញ លោក កូយ សៅ ដែលបានដឹកនាំដំណើរការសវនាការជម្រះក្ដីសំណុំរឿងលោក កឹម សុខា បានសម្រេចទទួលយកភស្តុតាងថ្មីដែលស្នើឡើងដោយតំណាងអយ្យការ និងក្រុមមេធាវីតំណាងរដ្ឋាភិបាល នៅក្នុងសវនាការជំនុំជម្រះកាលពីថ្ងៃទី១១ ខែមីនាកន្លងមកនេះ។
ភស្តុតាងថ្មីដែលត្រូវបានស្នើឡើងក្នុងសវនាការនាពេលនោះ មានមួយផ្នែកត្រូវបានយកចេញពីការផ្សាយរបស់វិទ្យុសំឡេងសហរដ្ឋអាមេរិក (VOA) ដែលនិយាយអំពីការបង្កើតគណបក្សសង្គ្រោះជាតិនៅឆ្នាំ២០១២ និងវីដេអូបង្ហាញពីបាតុកម្មរបស់ក្រុមកម្មករនៅបណ្ដោយផ្លូវវេង ស្រេង នៅក្រោយការបោះឆ្នោតឆ្នាំ២០១៣។
ក្រោយចាកចេញពីបន្ទប់សវនាការនៅថ្ងៃទី១២ ខែមីនា អគ្គរដ្ឋទូតអាមេរិកប្រចាំនៅកម្ពុជា លោក Patrick Murphy បានច្រានចោលនូវការចោទប្រកាន់អំពីការពាក់ព័ន្ធរបស់រដ្ឋាភិបាលអាមេរិកនៅក្នុងសំណុំរឿង«ក្បត់ជាតិ»ដែលចោទទៅលើលោក កឹម សុខា។
លោក Murphy ប្រាប់អ្នកសារព័ត៌មាននៅក្រៅបរិវេណសាលាដំបូងរាជធានីភ្នំពេញថា រដ្ឋាភិបាលអាមេរិកមិនសប្បាយចិត្តដែលបានដឹងថា តំណាងអយ្យការបានភ្ជាប់អាមេរិកទៅនឹងសំណុំរឿងលោក កឹម សុខា។
លោក កឹម សុខា ត្រូវបានចាប់ខ្លួនកាលពីដើមខែកញ្ញា ឆ្នាំ២០១៧កន្លងមក ហើយត្រូវបានបញ្ជូនទៅដាក់ឃុំនៅពន្ធនាគារត្រពាំងផ្លុង ស្ថិតនៅខេត្តត្បូងឃ្មុំ ជាប់ព្រំដែនកម្ពុជា-វៀតណាម ក្រោមការចោទប្រកាន់ពីរដ្ឋាភិបាលថា បាន«រួមគំនិតជាមួយរដ្ឋបរទេសដើម្បីផ្ដួលរំលំរដ្ឋាភិបាល» នេះបើតាមសេចក្ដីរាយការណ៍របស់សារព័ត៌មាន ភ្នំពេញ ប៉ុស្តិ៍ នាពេលនោះ។
អតីតមេដឹកនាំបក្សប្រឆាំងរូបនេះ ត្រូវបានដោះលែងឱ្យស្ថិតនៅក្រៅឃុំកាលពីខែវិច្ឆិកាឆ្នាំមុន បន្ទាប់ពីត្រូវបានផ្ទេរពីពន្ធនាគារត្រពាំងផ្លុង និងមកដាក់ឱ្យស្ថិតនៅក្រោមការឃុំខ្លួនក្នុងផ្ទះកាលពីខែកញ្ញា ឆ្នាំ២០១៨៕
