ជំនួបដ៏កម្រក្រោយខកខានជួបគ្នាអស់រយៈពេលប្រមាណ ៤ឆ្នាំ រវាងអតីតមេបក្សសង្គ្រោះជាតិ លោក កឹម សុខា និងលោកនាយករដ្ឋមន្ត្រី ហ៊ុន សែន បានធ្វើឱ្យមានការចាប់អារម្មណ៍ច្រើនពីសាធារណជន ដោយក្រុមអ្នកឃ្លាំមើលយល់ឃើញថា ជំនួបនេះជាការបើកផ្លូវទៅរកកិច្ចសន្ទនានយោបាយ ដែលនឹងផ្តល់ភាពវិជ្ជមាននៅថ្ងៃខាងមុខ។
យោងតាមសេចក្ដីរាយការណ៍របស់សារព័ត៌មានស្និទ្ធរដ្ឋាភិបាល Fresh News ជំនួបឥតព្រាងទុកមុន មានរយៈពេលជិត ១ម៉ោងនោះ កើតឡើងក្នុងឱកាសដែលលោក កឹម សុខា ដឹកនាំសហការីជាច្រើនរូបទៅចូលរួមគោរពវិញ្ញាណក្ខន្ធមហាឧបាសិកា ប៊ុន ស៊ាងលី ដែលជាម្តាយក្មេកលោកនាយករដ្ឋមន្ត្រី ហ៊ុន សែន និងជាម្តាយបង្កើតលោកស្រី ប៊ុន រ៉ានី នាគេហដ្ឋានលោក ហ៊ុន សែន ក្បែរវិមានឯករាជ្យកាលពីរសៀលថ្ងៃម្សិលមិញ។
ប្រធានមជ្ឈមណ្ឌលអប់រំប្រជាពលរដ្ឋដើម្បីការអភិវឌ្ឍ និងសន្តិភាព លោក យ៉ង់ គិមអេង យល់ឃើញថា ជំនួបនេះគឺជាទិដ្ឋភាពដ៏ល្អប្រសើរមួយ ដែលនឹងអាចបង្ហាញផ្លូវជាវិជ្ជមានសម្រាប់នយោបាយជាតិនាពេលខាងមុខ ដោយផ្តើមចេញពីការយល់គ្នារវាងបុគ្គល និងបុគ្គលជាមុន។
លោកមានប្រសាសន៍ថា៖ «ខ្ញុំក៏ឃើញថា អាចជាសញ្ញាមួយនៃការស្វែងរកភាពល្អប្រសើរនៅក្នុងនយោបាយក្នុងប្រទេសកម្ពុជា ជាពិសេសគឺការធ្វើឱ្យមានការដោះស្រាយ [បញ្ហាជាតិ] ការរួបរួមនៃអ្នកនយោបាយដើម្បីផលប្រយោជន៍ជាតិ»។
អតីតប្រធានគណបក្សសង្គ្រោះជាតិ លោក កឹម សុខា បានដឹកនាំសហការីចូលរួមគោរពវិញ្ញាណក្ខន្ធសពមហាឧបាសិកា ប៊ុន ស៊ាងលី ដោយផ្ទាល់ គឺមួយថ្ងៃក្រោយពេលដែលលោកបានផ្ញើសាររំលែកទុក្ខទៅក្រុមគ្រួសារលោក ហ៊ុន សែន។
ចំណែកអតីតមេបក្សប្រឆាំងមួយរូបទៀតដែលកំពុងរស់នៅនិរទេសខ្លួនឯងនៅក្រៅប្រទេស លោក សម រង្ស៊ី ក៏បានបង្ហោះលិខិតរំលែកទុក្ខសោកជាមួយក្រុមគ្រួសារលោកនាយករដ្ឋមន្ត្រីផងដែរ។
លោក សម រង្ស៊ី បានរំឭកឡើងវិញថា ក្រោយពីម្ដាយក្មេករបស់លោកទទួលមរណភាពកាលពីខែវិច្ឆិកា ឆ្នាំ២០១៦ លោក ហ៊ុន សែន បានទូរសព្ទចូលរួមមរណទុក្ខជាមួយក្រុមគ្រួសារលោក ហើយកូនប្រុសពៅរបស់លោក គឺលោក ហ៊ុន ម៉ានី ក៏បានទៅចូលរួមបុណ្យសពផងដែរ។
លោក សម រង្ស៊ី បន្ថែមថា ទោះបីជាស្ថានភាពនយោបាយពេលនោះ លោកពុំអាចវិលមកចូលរួមបុណ្យសពម្តាយក្មេករបស់ខ្លួនក៏ដោយ ប៉ុន្តែ លោកមិនអាចបំភ្លេចបានឡើយនូវសមានចិត្តរបស់លោក ហ៊ុន សែន និងគ្រួសាររបស់លោកពេលនោះ។
ប្រធានគណៈកម្មាធិការនាយកនៃគណបក្សប្រជាធិបតេយ្យមូលដ្ឋាន លោក យ៉ង សាំងកុមារ បញ្ចេញមតិលើទំព័រហ្វេសប៊ុករបស់លោក ដោយភ្ជាប់រូបថតលោក ហ៊ុន សែន និងលោក កឹម សុខា អង្គុយជាប់គ្នា។ លោករៀបរាប់ថា នេះអាចជាឱកាសនៃការចាប់ផ្តើមនៃការសម្របសម្រួលគ្នារវាងលោក ហ៊ុន សែន និងលោក កឹម សុខា ក្នុងការសហការគ្នាកសាងប្រជាធិបតេយ្យសេរីពហុបក្សនៅកម្ពុជា ដែលជាមូលដ្ឋានគ្រឹះនៃសន្តិភាពយូរអង្វែង និងការអភិវឌ្ឍប្រកបដោយសមធម៌។
លោកសរសេរថា៖ «យើងខ្ញុំនឹងនៅបន្តចូលរួមក្នុងដំណើរកសាងសង្គមជាតិ តាមគោលការណ៍ប្រជាធិបតេយ្យសេរីពហុបក្សដែរ»។
លោកស្រី ម៉េង សុភារី សហមេធាវីការពារក្ដីឱ្យលោក កឹម សុខា និងជាមនុស្សម្នាក់ដែលបានអមដំណើរអតីតមេបក្សប្រឆាំងរូបនេះទៅគោរពវិញ្ញាណក្ខន្ធមហាឧបាសិកា ប៊ុន ស៊ាងលី បានប្រាប់វីអូឌីកាលពីយប់មិញថា ក្នុងជំនួបនោះ លោក កឹម សុខា បានសម្ដែងការចូលរួមមរណទុក្ខជាមួយលោក ហ៊ុន សែន ហើយលោកទាំងពីរក៏បានសាកសួរសុខទុក្ខគ្នាទៅវិញទៅមក។
លោកស្រីមិនបានដឹងថា លោកទាំងពីរនិយាយរឿងអ្វីខ្លះទៀតនោះទេ ដោយសារលោកស្រីអង្គុយនៅឆ្ងាយពីកិច្ចសន្ទនារបស់អ្នកទាំងពីរប្រមាណ ៤ម៉ែត្រ ហើយសំឡេងអ៊ូអរក្នុងពិធីបុណ្យសពស្តាប់មិនបាន។
ដោយឡែក អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា លោកមិនដឹងអំពីខ្លឹមសារនៃកិច្ចសន្ទនាគ្នារវាងថ្នាក់ដឹកនាំនយោបាយទាំងពីរនោះឡើយ។
លោកបន្តថា ចំពោះការលើកឡើងរបស់អ្នកវិភាគ ឬពលរដ្ឋថា ស្ថានភាពនយោបាយនឹងប្រែជាវិជ្ជមានក្រោយជំនួបនេះ គឺជាការយល់ឃើញរបស់មនុស្សម្នាក់ៗប៉ុណ្ណោះ ប៉ុន្តែ នីតិវិធីសំណុំរឿងរបស់លោក កឹម សុខា ដែលស្ថិតនៅក្នុងដៃតុលាការនោះ គឺនៅតែបន្តដដែល។
លោកមានប្រសាសន៍ថា៖ «អ៊ីចឹង ការអញ្ជើញទៅគោរពវិញ្ញាណក្ខន្ធ និងចូលរួមរំលែកមរណទុក្ខរបស់លោកយាយមហាឧបាសិកា ប៊ុន ស៊ាងលី វាគ្រាន់តែជាសណ្តានចិត្ត ហើយក៏ជាការគោរពសីលធម៌ មនោសញ្ចេតនា និងទំនៀមទម្លាប់ប្រពៃណីរបស់ជាតិយើងដែលមានតាំងពីដើមមក។ ហើយមិនអាចយកមនោសញ្ចេតនានេះ មកលុបបំបាត់ចោលនូវការអនុវត្តគោលការណ៍លទ្ធិប្រជាធិបតេយ្យ និងនីតិរដ្ឋនៅកម្ពុជាបានទេ»។
ទោះបីជាយ៉ាងនេះក្តី អ្នកវិភាគនយោបាយមួយរូបគឺលោក ឯម សុវណ្ណរ៉ា កត់សម្គាល់ថា គ្រានេះទើបតែឃើញឥរិយាបថរបស់មេដឹកនាំគណបក្សនយោបាយធំៗទាំងពីរអាចនិយាយគ្នាបាន ដែលជាឥរិយាបថដ៏ល្អមួយនាំទៅដល់ការជជែកគ្នាដើម្បីដោះស្រាយបញ្ហាផ្សេងៗ ប៉ុន្តែ សញ្ញាណវិជ្ជមាននៅមិនទាន់ឃើញនៅឡើយទេ ដរាបណាសំណុំរឿងលោក កឹម សុខា និងសកម្មជនអតីតបក្សប្រឆាំងមិនទាន់បញ្ចប់ ហើយលក្ខខណ្ឌទាមទាររបស់អឺរ៉ុប រដ្ឋាភិបាលនៅមិនទាន់បានធ្វើតាម។
លោកមានប្រសាសន៍បន្ថែម៖ «ព្រោះមធ្យោបាយនៃការដោះស្រាយបញ្ហា គឺការជជែក ការចរចាគ្នា។ អានេះ គឺជាចំណុចល្អសម្រាប់អ្នកនយោបាយដែលប្រឈមដាក់គ្នាហ្នឹង ឱ្យមកចេះចរចាគ្នា ចេះប្រើយន្តការចរចា ខ្ញុំគិតថាល្អហើយ។ ប៉ុន្តែ អ្វីដែលយើងសង្ឃឹមទៅថ្ងៃអនាគតនឹងមានភាពធូរស្បើយនៅកម្ពុជា ឬជាមួយសហគមន៍អន្តរជាតិ យើងហាក់ដូចជាមិនទាន់ឃើញមានសញ្ញាណណាមួយបង្ហាញទេ»។
សពមហាឧបាសិកា ប៊ុន ស៊ាងលី បានទទួលមរណភាពកាលពីទៀបភ្លឺថ្ងៃទី៤ ខែឧសភា ហើយនៅថ្ងៃពុធនេះ សពត្រូវបានក្រុមគ្រួសារ និងសាច់ញាតិដង្ហែទៅបញ្ចុះនៅឯស្រុកកំណើតរបស់គាត់ ស្ថិតនៅឃុំរកាខ្នុរ ស្រុកក្រូចឆ្មារ ខេត្តត្បូងឃ្មុំ៕
