សហព័ន្ធកីឡាបាល់ទាត់កម្ពុជា បានប្រកាសថា អតីត និងមន្ត្រីរបស់ស្ថាប័ននេះចំនួន ៤រូប ត្រូវបានព្យួរការងារ និងបញ្ជូនទៅតុលាការចាត់វិធានការច្បាប់ពាក់ព័ន្ធនឹងអំពើពុករលួយ។
ក្នុងសេចក្តីប្រកាសព័ត៌មានចុះផ្សាយកាលពីថ្ងៃទី៥ ខែឧសភាម្សិលមិញនេះ សហព័ន្ធកីឡាបាល់ទាត់កម្ពុជា ប្រកាសថា អតីត និងមន្ត្រីរបស់សហព័ន្ធកីឡាបាល់ទាត់កម្ពុជា ចំនួន ៤រូប បានប្រព្រឹត្តកំហុសធ្ងន់ធ្ងរ ផ្ទុយនឹងក្រមសីលធម៌ និងវិន័យរបស់សហព័ន្ធបាល់ទាត់កម្ពុជា។
អតីត និងមន្ត្រីទាំង ៤រូបនោះ រួមមាន លោក ម៉ៃ តុលា លោក ទុយ វិច្ឆិកា លោក ឆាំង ពិសិដ្ឋ និងលោក គល់ សុភារម្យ ត្រូវបានសហព័ន្ធកីឡាបាល់ទាត់ព្យួរគ្រប់សកម្មភាពកីឡាបាល់ទាត់អស់មួយជីវិត។
ចំណែក លោក ម៉ៃ តុលា ត្រូវបានបញ្ជូនសំណុំរឿងប្រព្រឹត្តអំពើពុករលួយទៅតុលាការចាត់វិធានការច្បាប់ផងដែរ៕
