ក្រសួងមហាផ្ទៃព្រមានចាត់វិធានការច្បាប់លើមេខ្យល់ដែលនាំពលរដ្ឋខ្មែរឆ្លងដែនទៅប្រទេសជិតខាង ដើម្បីជួយការពារសុវត្ថិភាពពលករខ្មែរ និងរួមគ្នាទប់ស្កាត់ការឆ្លងរីករាលដាលនៃជំងឺកូវីដ១៩។
ក្នុងលិខិតចុះផ្សាយកាលពីម្សិលមិញ ក្រសួងមហាផ្ទៃលើកឡើងថា នាពេលថ្មីៗនេះ មានប្រជាពលរដ្ឋខ្មែរមួយចំនួន ត្រូវបានមេខ្យល់នាំឆ្លងដែនដោយខុសច្បាប់ចូលទៅក្នុងប្រទេសជិតខាង ខណៈដែលប្រទេសជិតខាងទាំងនោះ កំពុងដាក់ប្រទេសក្នុងគ្រាអាសន្ន ដើម្បីបង្ការការរីករាលដាលនៃជំងឺកូវីដ១៩។
ករណីនេះ ក្រសួងមហាផ្ទៃបញ្ជាទៅអាជ្ញាធរពាក់ព័ន្ធ ជាពិសេសអាជ្ញាធរខេត្ត និងកងកម្លាំងឈរជើងនៅតាមតំបន់ព្រំដែន សហការគ្នាទប់ស្កាត់ និងស្រាវជ្រាវរក ឬចាប់មេខ្យល់ ដែលអូសទាញប្រជាពលរដ្ឋខ្មែរឱ្យឆ្លងដែនខុសច្បាប់តាមច្រករបៀងនានាទៅប្រទេសជិតខាង ដើម្បីការពារសណ្តាប់ធ្នាប់សាធារណៈ រួមទាំងផលប្រយោជន៍ប្រជាពលរដ្ឋ និងចូលរួមទប់ស្កាត់ការរីករាលដាលជំងឺកូវីដ១៩នៅកម្ពុជាផងដែរ។
បន្ថែមពីនេះ ក្រសួងមហាផ្ទៃថា បើករណីសមត្ថកិច្ចប្រទេសជិតខាងចាប់ ឬឃាត់ខ្លួនប្រជាពលរដ្ឋខ្មែរ ដែលឆ្លងដែនខុសច្បាប់ចូលទៅប្រទេសជិតខាងតាមច្រករបៀងនោះ រដ្ឋបាលខេត្តនៅតំបន់នោះ ត្រូវទំនាក់ទំនងសម្របសម្រួលជាមួយសមត្ថកិច្ចប្រទេសជិតខាងដែលជាប់ព្រំប្រទល់គ្នាឱ្យបានឆាប់ ដើម្បីស្នើសុំឱ្យបញ្ជូនពលរដ្ឋខ្មែរមកកម្ពុជាវិញ ហើយពលរដ្ឋទាំងនោះត្រូវទុកត្រួតពិនិត្យសុខភាព ១៤ថ្ងៃ មុននឹងដឹកជញ្ជូនពួកគេទៅលំនៅឋានវិញ។
ក្រសួងមហាផ្ទៃក៏ជំរុញទៅសមត្ថកិច្ច ធ្វើការណែនាំ និងផ្សព្វផ្សាយដល់ប្រជាពលរដ្ឋក្នុងមូលដ្ឋានរបស់ខ្លួន កុំឱ្យធ្វើដំណើរទៅកាន់ប្រទេសជិតខាងក្នុងអំឡុងពេលនេះដាច់ខាត និងត្រូវអនុវត្តតាមការណែនាំរបស់រដ្ឋាភិបាល ក្រសួងសុខាភិបាល ទើបវិធានការរួមគ្នាបង្ការ និងទប់ស្កាត់ជំងឺកូវីដ១៩ ទទួលបានប្រសិទ្ធភាពខ្ពស់។
អនុប្រធានអចិន្រ្តៃយ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស លោកស្រី ជូ ប៊ុនអេង មានប្រសាសន៍ថា កន្លងមក មានមេខ្យល់មួយចំនួនបំផុសព័ត៌មានមិនពិតថា ប្រទេសថៃបើកច្រកឱ្យប្រជាពលរដ្ឋខ្មែរចូលទៅរកការងារធ្វើវិញដូចដើម។ ករណីនេះ លោកស្រីថា ជាការបំភ្លៃខុសពីការពិត ហើយក្រុមការងារជំនាញសហការជាមួយអាជ្ញាធរពាក់ព័ន្ធនៅតាមបណ្តាព្រំដែន ស្រាវជ្រាវចាប់មេខ្យល់ និងអ្នកឃុបឃិតគ្នា ដើម្បីយកមកផ្តន្ទាទោសតាមច្បាប់។
លោកស្រី ជូ ប៊ុនអេង ប្រាប់ថា៖ «មុនដំបូង គាត់ [អាជ្ញាធរខ្លះ] យល់ថា គាត់អាណិតប្រជាពលរដ្ឋ គឺគាត់ចង់ឱ្យចេញទៅ ដើម្បីបានការងារធ្វើ ហើយបានលុយខ្លះដាក់ហោប៉ៅគាត់ ប៉ុន្តែ គាត់ភ្លេចថា គាត់កំពុងធ្វើបាបប្រជាពលរដ្ឋ ហើយគាត់ចូលក្នុងការឃុបឃិតជាមួយជនទុច្ចរិត[មេខ្យល់] ហើយប្រសិនជានៅតែមានអ្នកព្យាយាមបោកប្រជាពលរដ្ឋ យ៉ាងហោចណាស់ក៏គាត់មានទោសឆបោកដែរ ហើយបើគាត់នាំចេញទៅទៀត ចូលក្នុងទោសគេហៅថា ជួញដូរមនុស្សឆ្លងដែន បានន័យថា គាត់នាំចេញមិនស្របច្បាប់ គេមានចែងក្នុងច្បាប់»។
មន្ដ្រីកម្មវិធីការពារសិទ្ធិពលករចំណាកស្រុកនៃមជ្ឈមណ្ឌលសង់ត្រាល់ លោក ឌី ថេហូយ៉ា មានប្រសាសន៍ថា ដើមចមដែលនាំឱ្យមានមេខ្យល់នាំប្រជាពលរដ្ឋឆ្លងដែនតាមច្រករបៀងខុសច្បាប់ទៅប្រទេសជិតខាងបាន ទំនងជាមានការឃុបឃិតជាមួយអាជ្ញាធរនៅតំបន់នោះ។ ករណីនេះ លោកថា ដើម្បីស្វែងរការពិត និងបង្ហាញពីតម្លាភាពក្នុងការអនុវត្តច្បាប់ ក្រសួងត្រូវស្រាវជ្រាវឱ្យច្បាស់លាស់ មុននឹងដាក់ទោសទណ្ឌលើមេខ្យល់ និងអាជ្ញាធរថ្នាក់ក្រោមជាដើម។
លោក ឌី ថេហូយ៉ា និយាយថា៖ «មិនបាច់និយាយឱ្យចំ ក៏យល់ដែរថា វាជាប់ពាក់ព័ន្ធគ្នា ផលប្រយោជន៍រវាងមេខ្យល់ រវាងអ្នកមានតួនាទីនៅក្នុងការគ្រប់គ្រងច្រករបៀងទាំងអស់ បើពួកគេមិនឱ្យចូល ក៏អត់ចែកលុយគ្នា ក៏វាមិនអាចធ្វើចឹងបានដែរ នៅពេលមន្ត្រីថ្នាក់ក្រោមប្រព្រឹត្តបទល្មើសដាក់ទោសទណ្ឌម៉េច មើលអាហ្នឹង[ច្បាប់]ទៅ ហើយអ្នកណាដែលពាក់ព័ន្ធនឹងច្បាប់ជួញដូរមនុស្សហ្នឹងទៅ ទោះបីជាមន្ត្រី [រដ្ឋាភិបាលតាមព្រំដែន] ក៏ដោយ»។
លោក ប្រាក់ ភក្ត្រា អះអាងថា លោកជាពលករនៅស្រុកថៃ។ លោកបានឱ្យដឹងតាមរយៈទំព័រហ្វេសប៊ុករបស់ខ្លួនថា ចាប់តាំងពីចុងខែមេសា មកដល់ថ្ងៃទី៩ ខែឧសភា មានពលរដ្ឋខ្មែរជាង ១០០នាក់ ត្រូវបានសមត្ថកិច្ចថៃ ខេត្តស្រះកែវ បានចាប់ខ្លួន និងបញ្ជូនត្រឡប់មកកម្ពុជាវិញ។លោកបន្តថា ការចាប់ខ្លួននោះ ដោយសារពលរដ្ឋខ្មែរឆ្លងដែនដោយខុសច្បាប់ក្នុងបំណងទៅស្វែងរកការងារធ្វើនៅប្រទេសថៃ។
កាលពីថ្ងៃទី២២ ខែមេសា រដ្ឋមន្ត្រីក្រសួងមហាផ្ទៃ លោក ស ខេង បញ្ជាក់ថា ពលករខ្មែរដែលវិលត្រឡប់ពីថៃមុនពេលបុណ្យចូលឆ្នាំ មានចំនួនជិត ១០ម៉ឺននាក់ (៨៥០០០)។
លោកអះអាងថា ក្នុងចំណោមពលករជិត ១០ម៉ឺននាក់នោះ ភាគច្រើនពួកគេអាចផ្គត់ផ្គង់ជីវភាពគ្រួសារបានតែក្នុងរយៈពេលខ្លីប៉ុណ្ណោះ ដោយពួកគេរំពឹងត្រឡប់ទៅធ្វើការងារនៅស្រុកថៃវិញ ក្រោយចប់បុណ្យចូលឆ្នាំ។ ប៉ុន្តែ ប្រទេសទាំងពីរបន្តរឹតបន្តឹងការឆ្លងកាត់តាមព្រំដែននៅឡើយ ដោយមិនទាន់កំណត់ពេលបើកវិញទេ៕
