មន្ត្រីអង្គការសង្គមស៊ីវិល បានលើកឡើងថា ពលរដ្ឋខ្មែរមួយចំនួនបានចាប់ផ្តើមសម្រុកវិលត្រឡប់ទៅធ្វើការងារនៅប្រទេសថៃវិញ ហើយមានមួយចំនួនទៀត បានទៅដោយខុសច្បាប់ និងត្រូវបានអាជ្ញាធរថៃចាប់បញ្ជូនមកកម្ពុជាវិញ ដោយសារពួកគេគ្មានជម្រើសផ្សេង។
ការលើកឡើងនេះ បន្ទាប់ពីមានសេចក្តីរាយការណ៍ពីការសម្រុកទៅធ្វើការងារនៅប្រទេសថៃដោយប្រថុយប្រថាន ឬខុសច្បាប់ពីសំណាក់ពលរដ្ឋខ្មែរមួយចំនួន បើទោះបីជាភាគីកម្ពុជា-ថៃ កំពុងបន្តរឹតបន្តឹងការចេញចូលតាមព្រំដែន ដោយសារស្ថានភាពជំងឺកូវីដ១៩ក្តី។
មន្ត្រីគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ (Central) លោក ឃុន ថារ៉ូ មានប្រសាសន៍ថា ពលរដ្ឋខ្មែរមួយចំនួនបានត្រឡប់ទៅធ្វើការងារនៅប្រទេសថៃវិញដោយលួចលាក់ ឬខុសច្បាប់ ដោយសារពួកគេគ្មានជម្រើសផ្សេង គ្មានការងារក្នុងស្រុកធ្វើ និងគ្មានចំណូលផ្គត់ផ្គង់គ្រួសារ ពិសេសគ្មានប្រាក់ដោះស្រាយបំណុលតែម្តង។
លោក ឃុន ថារ៉ូ មានប្រសាសន៍ថា៖ «ហ្នឹងហើយ ជាការពិតហើយនៅត្រង់ហ្នឹង បញ្ហានៅត្រង់ហ្នឹងហើយ [គាត់ទៅធ្វើការងារនៅប្រទេសថៃដោយប្រថុយប្រថាន ដោយសារគ្មានជម្រើស] ទីមួយ បើសិនគាត់គ្មានការងារ ហើយទទួលបានការឧបត្ថម្ភ ឬការគាំពារអីពីរដ្ឋាភិបាល ប្រហែលជាគាត់មិនជាប្រថុយប្រថានប៉ុន្មានទេ ហើយរឿងដែលសំខាន់បំផុត គឺរឿងបំណុលហ្នឹងហើយដែលពិបាកនឹងគេចវេស។ គាត់មានតែសម្រេចចិត្តទៅរកការងារធ្វើអ៊ីចឹងទេ»។
លោកមិនដឹងប្រាកដពីចំនួនពលរដ្ឋខ្មែរដែលចេញទៅថៃ និងពលរដ្ឋដែលត្រូវបានអាជ្ញាធរថៃចាប់បញ្ជូនមកកម្ពុជាវិញនោះទេ។
មន្ត្រីសង្គមស៊ីវិលដដែល ឱ្យដឹងថា ការវិលត្រឡប់ទៅរកការងារធ្វើនៅស្រុកថៃវិញនេះ ចាប់ផ្តើមកើតឡើងក្រោយពេលបុណ្យចូលឆ្នាំថ្មីចប់ ដោយពួកគេទាំងនោះបានត្រឡប់មកកម្ពុជាកាលពីមុនពេលបុណ្យចូលឆ្នាំ អំឡុងពេលប្រទេសទាំងពីរប្រកាសបិទព្រំដែន ដោយសារវិបត្តិកូវីដ១៩។
វី.អូ.ឌី មិនអាចទាក់ទងអ្នកនាំពាក្យក្រសួងការបរទេសកម្ពុជា លោក កុយ គួង និងអ្នកនាំពាក្យក្រសួងមហាផ្ទៃ លោក ខៀវ សុភ័គ បានទេនៅថ្ងៃនេះ។
ប៉ុន្តែ អភិបាលខេត្តបាត់ដំបង លោក ងួន រតនៈ បានអះអាងក្នុងសន្និសីទកាសែតនៅព្រឹកនេះ ដោយទទួលស្គាល់ថា ពិតជាមានពលរដ្ឋខ្មែរមួយចំនួន បានចំណាកស្រុកទៅរកការងារធ្វើនៅប្រទេសថៃដោយប្រថុយប្រថានប្រាកដមែន ហើយក៏ត្រូវបានអាជ្ញាធរថៃចាប់បញ្ជូនមកកម្ពុជាវិញផងដែរ ប៉ុន្តែ លោកថា មានចំនួនតិចតួចប៉ុណ្ណោះ។
លោកបន្តថា ការចំណាកស្រុកទៅរកការងារធ្វើនៅស្រុកថៃរបស់ពលរដ្ឋទាំងនោះ ដោយសារពួកគេចាញ់បោកការអូសទាញពីមេខ្យល់ ឬអ្នកស្វែងរកកម្លាំងពលកម្មនៅស្រុកថៃ ក្នុងខេត្តជាប់កម្ពុជា។
លោក ងួន រតនៈ បន្តថា៖ «ប្រហែលជាអ្នកត្រូវការកម្លាំងពលកម្មក្បែរព្រំដែនហ្នឹងត្រូវការ។ ឧបមាថា បម្រើការងារនៅក្នុងចម្ការ។ រដូវនេះ រដូវបេះផ្លែឈើ រដូវដាក់ជីថ្នាំ កាត់ស្មៅ ឬក៏បាចទឹក។ល។ គឺត្រូវការកម្លាំងពលកម្មណាស់។ នៅជាប់ខេត្តជាប់ព្រំដែន មានខេត្តច័ន្ទបុរី ខេត្តស្រះកែវហ្នឹង ត្រូវការកម្លាំងពលកម្មបែបនេះណាស់ បែបកម្លាំងជាកម្លាំងបាយ។ អីចឹង ប្រហែលជាមានអ្នកបង្កលក្ខណៈបែបហ្នឹង។ មានទៅ ប៉ុន្តែ នៅពេលសមត្ថកិច្ចគេឃើញ គេក៏ហៅយើងទៅយកមកវិញ»។
ពលរដ្ឋខ្មែរមួយរូបដែលអះអាងថា ខ្លួនជាពលករនៅស្រុកថៃ លោក ប្រាក់ ភក្ត្រា បានឱ្យដឹងតាមរយៈទំព័រហ្វេសប៊ុករបស់ខ្លួនថា ចាប់តាំងពីចុងខែមេសា មកដល់ថ្ងៃទី៩ ខែឧសភា មានពលរដ្ឋខ្មែរជាង ១រយនាក់ ត្រូវបានសមត្ថកិច្ចថៃខេត្តស្រះកែវ បានចាប់ខ្លួន និងបញ្ជូនត្រឡប់មកកម្ពុជាវិញ។
លោកបន្តថា ការចាប់ខ្លួននោះ ដោយសារពលរដ្ឋខ្មែរឆ្លងដែនដោយខុសច្បាប់ ក្នុងបំណងទៅស្វែងរកការងារធ្វើនៅប្រទេសថៃ។
ប្រភពដដែលឱ្យដឹងថា ក្នុងការឆ្លងដែនខុសច្បាប់នោះ ពលករខ្មែរម្នាក់ត្រូវចំណាយប្រាក់ឱ្យមេខ្យល់ ២០០០បាត ឬជាង ២០ម៉ឺនរៀល ដោយមានរថយន្តខាងថៃចាំដឹកពួកគេយកទៅដាក់កន្លែងធ្វើការ ដូចជា ខេត្ដឈុនបុរី ខេត្តសាមុតសាខន និងទីក្រុងបាងកក ជាដើម។
កាលពីថ្ងៃទី២២ ខែមេសា ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក ស ខេង បញ្ជាក់ថា ពលករខ្មែរដែលវិលត្រឡប់ពីថៃមុនពេលបុណ្យចូលឆ្នាំ មានចំនួនជិត ១០ម៉ឺននាក់ (៨៥០០០)។
លោកអះអាងថា ក្នុងចំណោមពលករជិត ១០ម៉ឺននាក់នោះ ភាគច្រើនពួកគេអាចផ្គត់ផ្គង់ជីវភាពគ្រួសារបានតែក្នុងរយៈពេលខ្លីប៉ុណ្ណោះ ដោយពួកគេរំពឹងត្រឡប់ទៅធ្វើការងារនៅស្រុកថៃវិញ ក្រោយចប់បុណ្យចូលឆ្នាំ។ ប៉ុន្តែ ប្រទេសទាំងពីរបន្តរឹតបន្តឹងការឆ្លងកាត់តាមព្រំដែននៅឡើយ ដោយមិនទាន់កំណត់ពេលបើកវិញទេ៕
