តម្លៃសាំងបានហក់ឡើងមកវិញ ក្រោយពីកម្ពុជាបានប្រកាសថា អ្នកជំងឺកូវីដ១៩ចុងក្រោយបានជាសះស្បើយ ហើយរកមិនឃើញករណីឆ្លងថ្មីអស់រយៈពេលជាង១ខែហើយនោះ។
ក្រសួងសុខាភិបាលបានប្រកាសកាលពីថ្ងៃសៅរ៍សប្ដាហ៍មុនថា ស្ត្រីម្នាក់វ័យ ៣៦ឆ្នាំដែលជាអ្នកជំងឺកូវីដ១៩ចុងចុងក្រោយ បានជាសះស្បើយ និងត្រូវបានអនុញ្ញាតឱ្យចាកចេញពីមន្ទីរពេទ្យមិត្តភាពខ្មែរ-សូវៀត ជាទីដែលគាត់ត្រូវបានផ្ទេរពីមន្ទីពេទ្យបង្អែកខេត្តបន្ទាយមានជ័យ មកសម្រាកព្យាបាលដាច់ដោយឡែកចាប់តាំងពីថ្ងៃទី៨ ខែឧសភា។
បច្ចុប្បន្នភាពតារាងតម្លៃប្រេងឥន្ធនៈនៅកម្ពុជាដែលចេញដោយក្រសួងពាណិជ្ជកម្មនៅថ្ងៃនេះ បង្ហាញថា តម្លៃលក់រាយនៃប្រេងសាំងធម្មតា បានកើនឡើងខ្ទង់ ១១ភាគរយ ពីតម្លៃ ២,២៥០រៀលក្នុងមួយលីត្រសម្រាប់ប្រេងសាំងធម្មតាពាក់កណ្ដាលទី១នៃខែឧសភានេះ ឡើងមកដល់តម្លៃ ២,៥០០រៀលចាប់ពីពាក់កណ្ដាលទី២នៃខែនេះ។ ចំណែកឯប្រេងម៉ាសូតវិញ បានកើនឡើងពីតម្លៃ ២,១៥០រៀលនៅកន្លះខែដំបូង មកដល់តម្លៃ ២,៣០០រៀលនៅពាក់កណ្ដាលទី២ក្នុងខែនេះ។
អ្នកនាំពាក្យក្រសួងពាណិជ្ជកម្ម លោក ស៊ាង ថៃ បានប្រាប់វីអូឌីនៅថ្ងៃនេះថា តម្លៃប្រេងឥន្ធនៈចុះធ្លាក់នៅពាក់កណ្ដាលទីមួយនៃខែនេះ ដោយសារតែតម្លៃទីផ្សារអន្តរជាតិធ្លាក់តម្លៃ ហើយតម្លៃនេះបានកើនឡើងមកវិញ ដោយសារទីផ្សារអន្តរជាតិ បានឡើងថ្លៃផងដែរ។
សេចក្ដីរាយការណ៍របស់ទីភ្នាក់ងារព័ត៌មានរ៉យទ័រ ផ្សាយថា តម្លៃប្រេងលើទីផ្សារអន្តរជាតិបានហក់ឡើងមកវិញនៅថ្ងៃចន្ទនេះ ដោយសារតែក្ដីសង្ឃឹមអំពីការបើកសេដ្ឋកិច្ចឡើងវិញ និងការកាត់បន្ថយផលិតកម្មប្រេងរបស់បណ្ដាប្រទេសផលិតប្រេងធំៗ។
រ៉យទ័ររាយការណ៍បន្ថែមថា តម្លៃប្រេងនៅទីផ្សារអាមេរិក បានកើនឡើង ៣.៣៥ដុល្លារ ឬស្មើនឹងកំណើនជិត ១១.៤ភាគរយ ឬកើនឡើងមកដល់ ៣២.៧៨ដុល្លារក្នុងមួយបារ៉ែល ដែលជាតម្លៃខ្ពស់បំផុតចាប់តាំងពីពាក់ណ្ដាលខែមីនាមក។
តម្លៃប្រេងឥន្ធនៈនៅកម្ពុជាបានងើបមកឡើងថ្លៃវិញចំពេលដែលកម្ពុជាបានប្រកាសថា អ្នកឆ្លងវីរុសកូរ៉ូណានៅកម្ពុជាបានជាសះស្បើយអស់ហើយ បន្ទាប់ពីស្ត្រីម្នាក់ ៣៦ឆ្នាំដែលជាអ្នកជំងឺកូវីដ១៩ចុងក្រោយ ត្រូវបានប្រកាសថា ជាសះស្បើយកាលពីថ្ងៃសៅរ៍សប្ដាហ៍មុន។
តម្លៃប្រេងឥន្ធនៈដែលត្រូវបានដាក់លក់រាយនៅលើទីផ្សារប្រទេសកម្ពុជា បានធ្លាក់ចុះពីតម្លៃ ៣,៤៥០រៀលក្នុងមួយលីត្រកាលពីដើមខែមីនា មកនៅត្រឹមតម្លៃ ២,២៥០លីត្រនៅពាក់កណ្ដាលទីមួយនៃខែឧសភានេះ៕