កម្ពុជាគ្រោងនឹងបើកទ្វារសារមន្ទីរនៅទូទាំងប្រទេសឱ្យភ្ញៀវទេសចរចូលទស្សនាឡើងវិញនៅខែក្រោយនេះ បន្ទាប់ពីប្រទេសនេះពុំបានរកឃើញករណីឆ្លងវីរុសកូរ៉ូណាថ្មី និងក្រោយពីអ្នកជំងឺកូវីដ១៩ទាំងអស់ ត្រូវបានព្យាបាលជាសះស្បើយ។
គិតចាប់ពីចុងខែមករាមក កម្ពុជាបានរកឃើញករណីឆ្លងវីរុសកូរ៉ូណាលើមនុស្សសរុប ១២២នាក់នៅទូទាំងប្រទេស ក្នុងនោះបានឆ្លងលើពលរដ្ឋកម្ពុជា ៥១នាក់ និងជនបរទេស ៧១នាក់។
ប៉ុន្តែ ក្រសួងសុខាភិបាលបានប្រកាសថា អ្នកឆ្លងវីរុសកូរ៉ូណាទាំងអស់នៅកម្ពុជា ត្រូវបានជាសះស្បើយអស់ហើយ បន្ទាប់ពីស្ត្រីវ័យ ៣៦ឆ្នាំ ដែលជាអ្នកជំងឺចុងក្រោយគេ ត្រូវបានព្យាបាលជាសះស្បើយកាលពីថ្ងៃសុក្រសប្ដាហ៍មុន។
ទន្ទឹមគ្នានេះដែរ ក្រសួងសុខាភិបាលបានប្រកាសពីការរកមិនឃើញករណីឆ្លងថ្មីអស់រយៈពេលជាង ១ខែមកហើយ ចាប់តាំងពីថ្ងៃទី១២ ខែមេសាកន្លងមក ជាថ្ងៃចុងក្រោយដែលកម្ពុជាបានប្រកាសពីការរកឃើញករណីឆ្លងចុងក្រោយ ដែលត្រូវបានរកឃើញលើបុរសសញ្ជាតិកាណាដាដើមកំណើតចិន អាយុ ៥០ឆ្នាំ និងនារីជនជាតិវៀតណាម អាយុ ២៤ឆ្នាំ នៅម្ដុំសង្កាត់បឹងកេងកង ក្នុងរាជធានីភ្នំពេញ។
ក្នុងលិខិតចុះថ្ងៃទី១៩ ខែឧសភា រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានជម្រាបទៅរដ្ឋមន្ត្រីក្រសួងវប្បធម៌ និងវិចិត្រសិល្បៈ អ្នកស្រី ភឿង សកុណា ថា សារមន្ទីរនានានៅទូទាំងប្រទេសនឹងត្រូវអនុញ្ញាតឱ្យបើកដំណើរការឡើងវិញចាប់ពីខែមិថុនា។
បើតាមលិខិតដដែលនេះ ការសម្រេចអនុញ្ញាតឱ្យសារមន្ទីរទាំងឡាយបើកដំណើរការឡើងវិញនេះ ត្រូវបានធ្វើឡើងបន្ទាប់ពីចំណារឯកភាពពីលោកនាយករដ្ឋមន្ត្រី ហ៊ុន សែន កាលពីថ្ងៃទី១៣ ខែឧសភា តែពីរថ្ងៃប៉ុណ្ណោះមុនក្រសួងសុខាភិបាលប្រកាសថា អ្នកជំងឺកូវីដ១៩ទាំងអស់ បានជាសះស្បើយអស់ហើយ។
រដ្ឋមន្ត្រីសុខាភិបាល លោក ម៉ម ប៊ុនហេង ក៏បានប្រាប់ទៅក្រសួងវប្បធម៌ និងវិចិត្រសិល្បៈ ឱ្យអនុវត្តតាមវិធានការការពារនានានៅតាមបណ្ដាសារមន្ទីរនៅទូទាំងប្រទេស ដើម្បីទប់ស្កាត់ការឆ្លងវីរុសកូរ៉ូណាផងដែរ។
វិធានការការពារដែលលោក ម៉ម ប៊ុនហេង ណែនាំនោះ មានការវាស់កម្ដៅភ្ញៀវទេសចរមុនចូលសារមន្ទីរ ការរក្សាគម្លាតសុវត្ថិភាព ការលាងដៃនឹងអាល់កុល ឬជែល និងពាក់ម៉ាស់។
រដ្ឋាភិបាលបានសម្រេចចេញបញ្ជាឱ្យបិទសារមន្ទីរ ក្លិបកម្សាន្ត ហាងខារ៉ាអូខេ និងសាលារៀនទាំងអស់នៅទូទាំងប្រទេសកាលពីពាក់កណ្ដាលខែមីនាកន្លងមក ចំពេលដែលករណីឆ្លងវីរុសកូរ៉ូណាត្រូវបានរកឃើញកាន់តែច្រើន។
បន្ទាប់មកទៀត រដ្ឋាភិបាលបានហាមឃាត់ការជួបជុំបែបសាសនា កម្មវិធីប្រមូលផ្ដុំមនុស្សច្រើន ផ្អាកការប្រារព្ធពិធីបុណ្យចូលឆ្នាំថ្មី និងដាក់បម្រាមលើការធ្វើដំណើរឆ្លងកាត់រវាងខេត្ត និងរាជធានីភ្នំពេញ និងខេត្តទូទាំងប្រទេសអស់រយៈពេល ១សប្ដាហ៍កាលពីខែមេសាកន្លងមក។
ករណីឆ្លងវីរុស ត្រូវបានរកឃើញតែមួយករណីប៉ុណ្ណោះនៅចន្លោះចុងខែមករារហូតដល់ដើមខែមីនា។ ការឆ្លងរីករាលដាលនៃវីរុសនេះនៅកម្ពុជា បានស្ទុះពី ២ករណីឡើងរហូតដល់ ១២២ករណីនៅចន្លោះថ្ងៃទី២ ខែមីនា និងថ្ងៃទី១២ ខែមេសាកន្លងមក៕
