អាជ្ញាធរខេត្តព្រះសីហនុ បានលើកឡើងថា ពួកគេបានបង្ខំឱ្យម្ចាស់សំណង់អគារខុសច្បាប់ចំនួន ១៦កន្លែង ផ្អាកការសាងសង់ និងត្រូវរុះរើចេញជាបន្ទាន់ ហើយម្ចាស់សំណង់ទាំងនោះមួយចំនួនក៏បានរុះរើចេញបន្តបន្ទាប់ហើយដែរ។
ថ្លែងប្រាប់អ្នកសារព័ត៌មានក្រោយបញ្ចប់សន្និសីទកាសែតនៅទីស្តីការគណៈរដ្ឋមន្ត្រី នៅព្រឹកថ្ងៃទី៩ ខែមិថុនានេះ អភិបាលខេត្តព្រះសីហនុ លោក គួច ចំរើន មានប្រសាសន៍ថា សំណង់អគារតូចធំនៅខេត្តនេះ មានចំនួនជាង ១ពាន់កន្លែង ដែលកំពុងសាងសង់។
លោកបន្តថា ដោយឡែក សំណង់អគារមានកម្ពស់ចាប់ពី ៥ជាន់ឡើង មានចំនួនជាង ៥រយគម្រោង ឬ ៥រយអគារ ដោយក្នុងនោះសំណង់អគារខុសច្បាប់ចំនួន ១៦កន្លែង ត្រូវបានអាជ្ញាធរខេត្តចុះទៅផ្អាកការសាងសង់ និងតម្រូវឱ្យម្ចាស់សំណង់ទាំងនោះរុះរើចេញជាបន្ទាន់ ដើម្បីបញ្ចៀសនូវហានិភ័យណាមួយកើតមានឡើង។
លោក គួច ចំរើន មានប្រសាសន៍បន្តថា៖ «យើងបានបង្ខំឱ្យម្ចាស់អគារ [ខុសច្បាប់] ហ្នឹង ត្រូវតែធ្វើការរុះរើចេញវិញ ដោយសារសំណង់អគារទាំងអស់នោះ វាមិនត្រឹមត្រូវតាមបទដ្ឋានបច្ចេកទេស។ អីចឹង មកដល់ពេលនេះ បើទោះបីជាអគារទាំងនោះមិនទាន់រើអស់ទេ ប៉ុន្តែ ចាប់ផ្តើមរើ និងចាប់ផ្តើមសម្រាលបន្ទុកដែលនៅលើអគារហ្នឹងចេញអស់ហើយ ដើម្បីកុំឱ្យមានគ្រោះថ្នាក់ ឬហានិភ័យ។ មានអគារមួយចំនួនបានរុះរើអស់រលីងដែរ ព្រោះវាមានការពាក់ព័ន្ធគ្នា ដោយយើងទុកឱកាសឱ្យម្ចាស់អគារ និងម្ចាស់ដី គាត់ចរចាគ្នា។»
ថ្លែងនៅក្នុងសន្និសីទកាសែតនៅព្រឹកនេះដែរ ប្រធានមន្ទីររៀបចំដែនដី នគរូបនីយកម្ម សំណង់និងសុរិយោដីខេត្តព្រះសីហនុ លោក ចេង ស្រុង លើកឡើងថា ការរីកលូតលាស់នូវវិស័យសំណង់លឿនហួសកំណត់នេះ ខណៈការសាងសង់របស់អ្នកវិនិយោគចិនមានភាពប្រញាប់ប្រញាល់ និងលឿនផង ដែលធ្វើឱ្យការត្រួតពិនិត្យ ឬគ្រប់គ្រងរបស់អាជ្ញាធរ និងមន្ត្រីជំនាញកន្លងមក នៅមានភាពខ្វះចន្លោះ រហូតធ្វើឱ្យកើតមានហេតុការណ៍បាក់រលំអគារកម្ពស់ ៧ជាន់កាលពីថ្ងៃទី២២ ខែមិថុនា ឆ្នាំមុន បណ្តាលឱ្យពលរដ្ឋចំនួន ២៨នាក់ស្លាប់ និងរងរបួសចំនួន ២៦នាក់។ ប៉ុន្តែ មកដល់ពេលនេះ បញ្ហាសំណង់អគារខុសច្បាប់ មិនមានអ្វីចោទជាបញ្ហាទៀតឡើយ។
លោក ចេង ស្រុង បន្ថែមថា៖ «អីចឹង ទាំងការអនុវត្តផ្លូវច្បាប់ ទាំងការពន្យល់ណែនាំដល់ម្ចាស់ការដ្ឋានសំណង់ទាំងអស់នោះ ឥលូវយើងឃើញថា យើងគ្រប់គ្រងបាន ដោយពួកគាត់មានការយល់ដឹងច្រើន។ ឥលូវនេះ យើងឃើញថា គុណភាពនៃការសាងសង់សំណង់យើង មានការរីកលូតលាស់ ហើយនិងអនុវត្តទៅតាមគោលការណ៍ច្បាប់បានច្រើន និងមិនមានបញ្ហាអីទៀតទេ»។
ប្រធានសហព័ន្ធសហជីពកម្មករសំណង់ និងព្រៃឈើកម្ពុជា លោក សុខ គីន កត់សម្គាល់ថាក្រោយព្រឹត្តិការណ៍បាក់រលំអគារកម្ពស់ ៧ជាន់ កាលពីពាក់កណ្តាលឆ្នាំមុន ដែលបណ្តាលឱ្យមានមនុស្សស្លាប់ និងរបួសច្រើននោះ រដ្ឋាភិបាល និងអាជ្ញាធរខេត្តព្រះសីហនុ មានការរឹតបន្តឹងច្បាប់សំណង់ខ្លាំងជាងពេលមុន។
យ៉ាងនេះក្តី លោកថា ដើម្បីជាប្រយោជន៍ទាំងនិយោជក និងកម្មករនិយោជិត អាជ្ញាធរគប្បីបន្តរឹតបន្តឹងការអនុវត្តច្បាប់ ពិសេសតម្រូវឱ្យក្រុមហ៊ុនវិនិយោគទាំងអស់ត្រូវចុះបញ្ជីអាជីវកម្ម ព្រមទាំងជំរុញឱ្យពួកគេអនុវត្តច្បាប់ជាដើម។
លោកបន្ថែមថា៖ «ទីមួយ ប្រសិនបើក្រុមហ៊ុនហ្នឹងមានការចុះបញ្ជីអាជីវកម្ម នឹងអាចមានផលចំណេញទាំងអស់គ្នា ចំណេញទាំងកម្មករ ចំណេញទាំងរដ្ឋ ចំណេញទាំងក្រុមហ៊ុនខ្លួនឯង។ ទីមួយ [ទៀត] ប្រសិនបើក្រុមហ៊ុនចុះបញ្ជីត្រឹមត្រូវ ក្រុមហ៊ុននោះត្រូវការបង់ពន្ធជូនរដ្ឋ អីចឹងរដ្ឋមានប្រាក់ចំណូលពីក្រុមហ៊ុន ហើយកម្មករក៏ពួកគាត់ទទួលបានអត្ថប្រយោជន៍ផ្សេងៗដែលធ្លាប់ទទួលបានពីរដ្ឋដែរ»។
លោក គួច ចំរើន បញ្ជាក់ថា ព្រឹត្តិការណ៍បាក់រលំអគារកម្ពស់ ៧ជាន់ នៅខេត្តព្រះសីហនុបណ្តាលឱ្យពលរដ្ឋខ្មែរស្លាប់ និងរបួសជាង ៥០នាក់ កាលពីខែមិថុនា ឆ្នាំ២០១៩ សមត្ថកិច្ចបានចាប់ខ្លួនអ្នកពាក់ព័ន្ធបញ្ហានេះ ចំនួន ៦នាក់ មានទាំងជនជាតិចិន និងខ្មែរ ហើយសំណុំរឿងនេះកំពុងស្ថិតនៅដៃតុលាការ។
យ៉ាងនេះក្តី លោក សុខ គីន យល់ថា ការចាប់ខ្លួនអ្នកពាក់ព័ន្ធយកមកផ្តន្ទាទោសតាមផ្លូវច្បាប់ ជាផ្នែកមួយអាចផ្តល់យុត្តិធម៌ដល់ជនរងគ្រោះ ប៉ុន្តែ មិនទាន់ពេញលេញនៅឡើយទេ។ លោកថាយុត្តិធម៌ពេញលេញទៅបាន លុះត្រាមានការផ្តន្ទាទោសអ្នកពាក់ព័ន្ធរឿងនេះទៅតាមផ្លូវច្បាប់ ហើយក្រុមជនរងគ្រោះត្រូវទទួលបានសំណងរដ្ឋប្បវេណី ទើបអាចធ្វើឱ្យជនរងគ្រោះស្ងប់ចិត្ត៕
