រដ្ឋាភិបាលបានប្រកាសដាក់ឱ្យប្រើនូវប្រព័ន្ធចុះបញ្ជីអាជីវកម្មលើអនឡាញ ដោយថា ដើម្បីលើកកម្ពស់ការប្រកួតប្រជែង និងធ្វើឱ្យប្រសើរឡើងនូវបរិយាកាសវិនិយោគនៅកម្ពុជា។
ថ្លែងក្នុងពិធីប្រកាសដាក់ឱ្យដំណើរការប្រព័ន្ធបច្ចេកវិទ្យាព័ត៌មានរួមសម្រាប់ការចុះបញ្ជីអាជីវកម្មនៅព្រឹកថ្ងៃទី១៥ ខែមិថុនា ឆ្នាំ២០២០នេះ រដ្ឋលេខាធិការក្រសួងសេដ្ឋកិច្ច លោក ផាន់ ផល្លា មានប្រសាសន៍ថា តាមរយៈប្រព័ន្ធថ្មីនេះ អ្នកចុះបញ្ជីនឹងចុះបញ្ជីតែមួយលើកគត់ក្នុងការស្នើសុំបើកអាជីវកម្មខ្លួននៅកម្ពុជា ដែលទិន្នន័យដែលបានចុះ នឹងត្រូវបញ្ជូនទៅក្រសួងស្ថាប័នពាក់ព័ន្ធដើម្បីអនុម័តយល់ព្រម។
លោកបន្ថែមថា៖ «និយាយជារួម ថ្នាលបច្ចេកវិទ្យាព័ត៌មាននេះ ធុរជនអាចធ្វើការចុះបញ្ជីពាណិជ្ជកម្មនៅក្រសួងពាណិជ្ជកម្ម ចុះបញ្ជីពន្ធដារនៅអគ្គនាយកដ្ឋានពន្ធដារ ធ្វើសេចក្តីប្រកាសជូនព័ត៌មានពីការបើកសហគ្រាសទៅក្រសួងការងារ និងបណ្ដុះបណ្ដាលវិជ្ជាជីវៈក្នុងពេលតែមួយ និងត្រូវការពេលវេលាយ៉ាងយូរត្រឹម៨ថ្ងៃនៃថ្ងៃធ្វើការតែប៉ុណ្ណោះ»។
បើតាមលោក ផាន់ ផល្លា ការចុះបញ្ជីតាមអនឡាញថ្មីនេះ បានជួយកាត់បន្ថយចំណាយជាច្រើនដល់ម្ចាស់អាជីវកម្មដែលចង់បើកអាជីវកម្ម។
រដ្ឋមន្ត្រីក្រសួងសេដ្ឋកិច្ច លោក អូន ព័ន្ធមុនីរ័ត្ន មានប្រសាសន៍ថា កន្លងមក វិស័យឯកជនបានបង្ហាញពីកង្វល់ និងលើកឡើងបញ្ហាប្រឈមមួយចំនួនពាក់ព័ន្ធនឹងដំណើការចុះបញ្ជីអាជីវកម្មនៅកម្ពុជា ដែលត្រូវប្រើពេលយូរ ចំណាយថវិកាច្រើន ឆ្លងកាត់នីតិវិធីច្រើន និងស្មុគស្មាញ នៅតាមក្រសួងស្ថាប័នជាច្រើនដាច់ដោយឡែកពីគ្នា ដែលតម្រូវឱ្យមានការផ្ដល់ព័ត៌មានច្រើនដង និងច្រំដែល។ លោកជឿថា តាមរយៈការបង្កើតនូវប្រព័ន្ធចុះបញ្ជីអាជីវកម្មថ្មីនេះ នឹងជួយកាត់បន្ថយនូវបញ្ហាប្រឈមរបស់វិនិយោគិន ក៏ដូចជាលើកទឹកចិត្តដល់អាជីវកម្មថ្មីៗផងដែរ។
លោក អូន ព័ន្ធមុនីរ័ត្ន មានប្រសាសន៍ថា៖ «គឺជាការកែទម្រង់ដ៏ធំមួយក្នុងវិស័យរដ្ឋបាលសាធារណៈ ជាពិសេសគឺការកែទម្រង់ផ្នត់គំនិត និងរបៀបធ្វើការរបស់មន្ត្រី ទាំងការប្រែក្លាយពីការពិនិត្យឯកសារជាទម្រង់រូបីទៅជាទម្រង់អេឡិចត្រូនិច ការពង្រឹងកិច្ចសហការរវាងស្ថាប័ន និងការពង្រឹងប្រសិទ្ធភាពក្នុងការផ្ដល់សេវាសាធារណៈ ព្រមទាំងការលើកកម្ពស់អភិបាលកិច្ចល្អ តាមរយៈការលុបបំបាត់នូវការតម្រូវឱ្យមានការជួបគ្នារវាងមន្ត្រី និងអតិថិជនដែលត្រូវការសេវារបស់ស្ថាប័នរដ្ឋ»។
ធុរជនដែលចង់ធ្វើការចុះបញ្ជីអាជីវកម្ម អាចចូលទៅធ្វើការចុះបញ្ជីបានតាមរយៈគេហទំព័រ www.registrationservices.gov.kh។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី មានប្រសាសន៍ថា ការចុះបញ្ជីអាជីវកម្មកាលពីពេលកន្លងមក បង្កឱ្យមានភាពស្មុគស្មាញ និងភាពមិនប្រក្រតីច្រើន ជាពិសេសគឺអំពើពុករលួយតែម្ដង។ លោកបន្ថែមថា ការចុះបញ្ជីតាមអនឡាញ នឹងលុបបំបាត់នូវបញ្ហាទាំងនេះ ដែលនឹងជួយដល់វិស័យឯកជនឱ្យរីកចម្រើនផងដែរ។
លោកបន្ថែមថា៖ «វាជាគំនិតផ្ដួចផ្ដើមមួយដែលយើងស្វាគមន៍ ហើយសុំឱ្យមានការអនុវត្តគំនិតផ្ដួចផ្ដើមនេះឱ្យមានប្រសិទ្ធភាពខ្ពស់ ព្រោះប្រសិនជាយើងអាចធ្វើកិច្ចការនេះបានមានប្រសិទ្ធភាព យើងអាចជួយក្រុមហ៊ុនឯកជនទទួលសេវាបានលឿន ហើយសម្រួលកិច្ចប្រតិបត្តិការអាជីវកម្មរបស់គាត់»។
កាលពីឆ្នាំ២០១៩ សភាពាណិជ្ជកម្មអឺរ៉ុបនៅកម្ពុជា បានសរសេរក្នុងសៀវភៅ«ស» របស់ខ្លួនថា គម្រោងវិនិយោគរបស់អ្នកវិនិយោគមួយចំនួន បានជួបប្រទះឧបសគ្គ ឬមានការយឺតយ៉ាវខ្លាំងដោយសារនីតិវិធីស្មុគស្មាញនៃការចុះបញ្ជីពាណិជ្ជកម្មតែម្ដង ដែលអឺរ៉ុបជំរុញឱ្យរដ្ឋាភិបាលពិនិត្យឡើងវិញពីបញ្ហានេះ និងជំរុញដល់កម្ពុជាឱ្យបង្កើតតុលាការរដ្ឋបាលមួយផងដែរ។
ក្នុងសេចក្តីប្រកាសព័ត៌មានចេញផ្សាយនៅថ្ងៃនេះ ក្រសួងសេដ្ឋកិច្ចបញ្ជាក់ថា ក្រោមប្រព័ន្ធចុះបញ្ជីថ្មីនេះ អ្នកចុះបញ្ជីគឺធ្វើការចុះតែម្ដងគត់ ហើយទិន្នន័យនឹងត្រូវបញ្ជូនទៅស្ថាប័នពាក់ព័ន្ធទាំងអស់ ដើម្បីពិនិត្យ និងអនុម័ត ដោយថា នឹងលែងបង្កភាពស្មុគស្មាញដល់ការចុះបញ្ជី ក៏ដូចជាការប្រើប្រាស់ក្រដាសច្រើនដូចពីមុនទៀតដែរ៕
