មន្ត្រីជាន់ខ្ពស់ក្រសួងកសិកម្ម បានអះអាងថា រយៈពេល ៥ខែដើមឆ្នាំ២០២០ ការនាំអង្ករកម្ពុជាចេញទៅទីផ្សារអន្តរជាតិមានការកើនឡើងគួរឱ្យកត់សម្គាល់ ពោលគឺមានការកើនឡើងជាង ៤២ភាគរយ បើប្រៀបធៀបទៅនឹងរយៈពេលដូចគ្នាកាលពីឆ្នាំ២០១៩។
ថ្លែងក្នុងសន្និសីទកាសែតនៅទីស្តីការគណៈរដ្ឋមន្ត្រីនាព្រឹកថ្ងៃម្សិលមិញនេះ អគ្គនាយកនៃអគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ លោក ងិន ឆាយ មានប្រសាសន៍ថា បរិមាណអង្ករដែលបាននាំចេញទៅទីផ្សារអន្តរជាតិក្នុងរយៈពេល ៥ខែឆ្នាំ២០២០នេះ មានចំនួនជាង ៣សែន ៥ម៉ឺនតោន (៣៥៦ ០៩៧)។
លោកថា ចំនួននេះមានការកើនឡើងជាង ១សែនតោន (១០៥ ៩២៥) ឬមានកំណើន ៤២,៣៤ភាគរយ បើប្រៀបធៀបនឹងរយៈពេល ៥ខែដូចគ្នាកាលពីឆ្នាំ២០១៩ ដែលអង្ករកម្ពុជានាំចេញ មានចំនួនត្រឹមតែជាង ២៥ម៉ឺនតោន (២៥០ ១៧២)។
លោកថា ទិន្នន័យអង្ករនាំចេញទៅទីផ្សារអន្តរជាតិមានការកើនឡើងទាំងនោះ រួមមាន សហភាពអឺរុប មានការកើនឡើង ៥១,១០ភាគរយ ប្រទេសចិនកើនឡើង ២៥,២៦ភាគរយ បណ្ដាប្រទេសនានាក្នុងតំបន់អាស៊ានកើនឡើង ៤៥,៣៩ភាគរយ និងទីផ្សារប្រទេសដទៃទៀតកើនចំនួន ៧៩,៤០ភាគរយ។
លោកបន្តថា នេះជាសញ្ញាវិជ្ជមានសម្រាប់កម្ពុជា ហើយក៏ប្រហែលដោយសារបញ្ហាវិបត្តិវីរុសកូរ៉ូណា ដែលធ្វើឱ្យតម្រូវការស្បៀង ពិសេសអង្ករ មានការកើនឡើង។
លោក ងិន ឆាយ មានប្រសាសន៍ថា៖ «៥ខែដើមឆ្នាំនេះ ការនាំចេញអង្កររបស់យើងមានការកើនឡើង រហូតដល់ ៤២,៣៤ភាគរយ។ នេះគឺជាសញ្ញាមួយល្អ ហើយប្រហែលជាដោយសារជំងឺកូវីដ១៩ ក៏មិនដឹង ឬក៏ដោយសារបញ្ហាផ្សេងៗ។ បាទ! យើងសង្កេតឃើញថា នៅបណ្តាប្រទេសមួយចំនួន គឺគេបានកុម្ម៉ង់អង្ករ ពិសេសអង្ករក្រអូបទៅកាន់សហគមន៍អឺរ៉ុបហ្នឹងមានការកើនឡើង»។
អគ្គនាយកនៃអគ្គនាយកដ្ឋានកសិកម្ម នៃក្រសួងកសិកម្មដដែល បង្ហាញក្តីរំពឹងថា ក្នុងឆ្នាំ២០២០ ការនាំចេញអង្ករកម្ពុជាទៅកាន់ទីផ្សារអន្តរជាតិ អាចនឹងឈានទៅដល់ជិត ១លានតោន ឬ១លានតោន។
របាយការណ៍របស់ក្រសួងកសិកម្ម ឱ្យដឹងថា នៅឆ្នាំ២០១៩ កម្ពុជាបាននាំចេញអង្ករទៅកាន់ទីផ្សារអន្តរជាតិបានចំនួនជាង ៦២ម៉ឺនតោន (៦២០ ១០៦) ប៉ុន្តែ ចំនួនេះមានការថយចុះចំនួនជិត ១ភាគរយ(០.៩០ភាគរយ) បើប្រៀបធៀបនឹងឆ្នាំ២០១៨ ដែលមានចំនួន ៦២៦,២២៥តោន៕